2007年4月23日 星期一

好味到要打包返香港的 --- 【深圳毛家飯店】

大家睇完上面o個張相,都可能嘩一聲:「唔係下話?由深圳打包番香港?!」

我都係咁話,仲要加句注腳:「仲要係未搬入元朗,屋企o係市區,轉轉折折先返到!」

 

雖則大家都知我係慳妹兼環保支持者,但咁山長水遠,正常o黎講我又唔會傻成咁o既 ... 只因為實在好味得緊要!(話時話,佢地用的膠盒是可以生物降解,抵讚!)

 

識得去毛家飯店,要多得 blog 友 FiON 的好介紹 ~ 唔係講笑,一月份我睇到佢介紹呢間超正湘菜館,第一時間已 bookmark 了,但次次都唔記得帶埋地址上去 (每次只掛心帶相機、帶尺、帶新屋平面圖 ...)  幸好畀我有次搭的士經過春風路,見到o個度都有分店,即刻記住,上星期終於有得試!

 

毛家飯店無論在外觀或內部裝修來看,都是一間頗高檔的食肆 (但原來價錢非常實惠!) ~ 一坐低見到本厚厚的、印制極精美、似係食譜多過菜譜的 menu,雙眼已經發晒光,簡直想叫晒所有菜式來試!可惜我地得兩個人,又試唔得太多款,所以我地叫左

小食 --- 小魚乾一碟、孜然骨二支、葱油雞一碟

湯 --- 鈣香骨

主食 --- 炒鱔片、雜糧包

呢個配搭係咪好合理呢 ~ 如果在香港食肆吃的話,應該份量剛好。之但係,有在深圳吃過飯的朋友都知道,佢地o的碟頭係好大的!!!上桌後,我和笨 B 爸爸都傻了眼 --- 簡直係四人份量!

 

因為樣樣都好好味,我地決定食唔晒的都打包番香港,用o黎送粥都好呀!所以,我地就好努力地清晒o的帶唔走的湯和有汁菜餚 ~ 而乾身的小魚仔、炒鱔片和雜糧包就統統拿走 ~

 

【下圖】非常精美的菜譜 ~ 有好多好多款菜想試,下次一定要 call 一大班人上去食!

【下圖】鈣香骨 (唔知有冇記錯) 其實是骨湯,個鍋非常大,我保守估計直徑冇一尺都應該有十寸!!
  超級好味,所以就算得兩個人,寧願打包其他食物,都要清左佢 --> 結論係每人飲左五六碗 (小碗)!!!

飯店仲會畀埋膠手套和吸管,原來是用來吸啜骨髓的!正到無倫,必試!

【下圖】孜然骨,是逐支計錢的 (好像才 RMB 5 一支)  呢味菜惹起我和笨 B 爸爸一番爭論:我話好味過小羔羊的孜然羔羊骨,因為o的肉好嫩滑唔乾身 (不過呢支係豬骨);但笨 B 爸爸就話小羔羊的好味o的,因為孜然粉份量較恰當,仍吃得出肉味,呢支就重手左,食唔到太多肉味。

查實,羊肉味係重過豬肉味架嘛 ... 都唔係 apple to apple comparison

   拗乜丫,總之兩間都好味啦!

【下圖】好惹味的小魚乾 ~ 因於容易帶走,我地試味後基本上都冇乜再食 (因為要留肚清晒其他帶唔走的菜式)  攞番香港送粥,正正正

【下圖】毛家飯店有口水雞和葱油雞,因為口水雞在香港吃得多,所以點了葱油雞 ~ 非常香口!鋪面的炸蒜蓉炸得剛剛好,香得來不會過燶
  成碟掃清晒!

【下圖】好可愛的雜糧包 ~ 吃的時候才發現包包的底部是凹進去的,剛好可以用來盛配料 (是炒梅菜吧?) 好細心呢
    好飽肚的,所以只吃了三個,帶了三個回港

【下圖】一睇呢碟炒鱔片咁多辣椒,就知係我同笨 B 爸爸o既至愛喇!
  鱔片炒得剛剛好,外層帶少許脆、但肉裡保持嫩滑,非常好味!掃掉了一半,又帶了一半回來回味回味  



【下圖】原來毛家飯店在深圳也有好多分店哩 ~ (按此放大)

毛家飯店官方網頁:http://www.chinamaojia.com/index.html 

 

後記:我地當晚吃了約 RMB 150,但份量足夠四人吃!所以好抵架!

47 則留言:

  1. 嘩, 好大碟, 好多野食.

    回覆刪除
  2. 包怪好想試吓雜糧包呀!

    回覆刪除
  3. 好吸引呀....簡直流哂口水 隻 孜然骨望落好惹味, 好想試下!!!

    回覆刪除
  4. 你呢排跟笨b爸爸成日上去啵, 開始改觀啦?!

    回覆刪除
  5. 巫婆:yeah ~ 為了睇建材,我地上左去好幾次了,發覺深圳其實是一個購物 & 美食天堂 (是講緊有質素的貨品和食物,不是人們以前上去抬回來那些翻版冒牌貨)! 你講得冇錯,我以前對深圳是頗有偏見的 治安方面,只要穿戴唔好咁惹人注目,其實都好安全 (而家國內大把人有錢過我地呀,所以我地著得 causal,人地望都唔望下我地呀 )

    回覆刪除
  6. 笨B媽媽:咁第時我同 Hubby 上去玩要揾你帶路啦!個湯好似好吸引咁!

    回覆刪除
  7. 兩個人點食到咁多野架 但樣樣都咁有睇頭,的確要打包打包喇

    回覆刪除
  8. Fiona/ 露絲:第時搵埋你地上去咪得囉 有兩三 pair 人,會食得高興好多!

    回覆刪除
  9. 好介紹 平時聽人講得多, 但去到深圳次次都唔記得 今次有埋相睇, 一定加深印象.....下次必試

    回覆刪除
  10. b媽 你終於搵到呢間喇! 呢間都係我同老公嘅至愛黎架 我地覺得近黃崗海濱廣場嘅分店係最正架 下次你一定要試試 同埋你地鍾意食辣 就一定要試試佢地嘅剁椒魚頭同埋金沙湯圓 呢兩味係我地必叫架 亦係大部份人都會點嘅 魚頭我地會少辣 你地可以加辣呀! 必試呀!

    回覆刪除
  11. 黃夫人:好 ~ 預埋你 你去深圳都好方便啊! See:深圳有咁多間分店兼咁出名,我諗問的士司機,都應該實車到你去o既 ~ 可能唔駛 print 地址都得 小魚兒:哇哈哈!原來係你至愛!咁我地下次可以一齊去啦!皇崗o個間最正呀?咁仲好,好近我地呀!

    回覆刪除
  12. b媽 好呀! 不過逢辣的食物都要叫兩碟先得 一碟大辣一碟少辣 因為我地只能接受少辣呀!

    回覆刪除
  13. 幫到人等於幫到自己大家要開開心心,反對任何人抄人家答案作為自己答案,希望大家知識日日增~2007年4月23日 下午4:15

    嘩嘩嘩,點會咁大碟架,我毛毛蟲開得咁辛苦先開左咁多間,但現在比班伙計咁倒我米,唔得,都係要上去食下先,唔係都唔知我毛毛蟲開左間咁好食既餐館,重要食都咁多人係Blog Post出黎唷。

    回覆刪除
  14. 小魚兒:啊哈!那我要對你們「特訓」一下咯 一起鬥辣才過癮嘛 毛毛蟲:係喎,這是你的餐館 (毛家飯店) 啊 係咯,你o的伙記整咁大碟畀客人吃啊

    回覆刪除
  15. 春桔, 我地都去深圳啵! 早之一齊食飯啦唔駛外帶啦!

    回覆刪除
  16. Hi ... 我睇左你個Blog好耐 ... 今次係第一次留言比你 ... 廣州都有呢間"毛家飯店"架 ... 佢個麻辣串蝦 ... 連殼都可以一齊食架 ... 正正正呀 ... 蟹黃豆腐 ... 送飯一流 ... 仲有個蒜蓉津白 ... 又係正正正呀 ... 你下次可以試下呀 ...

    回覆刪除
  17. b媽 死症黎架 無得訓練呀 老公喉嚨好敏感 多少少辣就會立即喉嚨痛 咁就咩胃口都無晒嘅喇! 小辣嘅剁椒魚頭係佢極限黎嘅喇!

    回覆刪除
  18. 苯媽:好正窩!!您估如果我去黃崗過關,坐的會唔會好遠路??

    回覆刪除
  19. 笨b媽媽, 為咗間屋 你同笨b爸爸真係變咗個深圳通囉~~ 真係好介紹, 下次我都要去!!

    回覆刪除
  20. 好抵!!! i want to try it when i go back to mainland too it is too expensive to eat in the U.S. and ....... not tasting good

    回覆刪除
  21. 我哋通常去親褔田都會經過一間,但次次都係話去食,但最後都唔就腳 . . . . .

    回覆刪除
  22. 原來係fion介紹 ! yes, 毛家飯店好好味架 ! 不過打包, 好似會見返好多油果喎~

    回覆刪除
  23. 等我都mark低佢先.

    回覆刪除
  24. 真係巧抵巧正咁喎 好, 等我都bookmark佢先

    回覆刪除
  25. 嘩, 睇到流晒口水, 下次去深圳一定去試, 多謝妳&fion既推介 我都拿拿聲bookmark左fion既blog呀^_^

    回覆刪除
  26. 好似好正咁喎....等我今個星期日上去試下先...

    回覆刪除
  27. MRS.KWONG 黃崗附近有一間 行路都去到 唔駛十分鐘 打的就唔駛跳錶呀! 你同司機講海濱廣場毛家飯店佢就會識車你去嘅喇!

    回覆刪除
  28. 珍妮仔:竟然如此 ~ 哎o也,下次北上要 call 你問下你o係邊! 小詠日誌:其實呢 ... 我乜都想食呀 佢本 menu 實在太太太吸引啦!真係要分幾次去試埋其他菜式至得,多謝你的好介紹呢! 小魚兒:噢!那沒辦法了,特訓不成功添 話時話,原來皇崗o個間近得咁緊要,正喎! Mrs Kwong:照小魚兒說法,由我地屋企去,加埋可能半個鐘都唔駛啊 (唔計過關)!正正正 咪咪吉:冇錯,我地開始認識深圳地形啦 penny:去了外國的朋友,通常都會非常懷念香港/ 中國的美食 ~ 你快o的番來大擦一餐喇! v 姨:咁你下次必定要試下啦,真係冇介紹錯啊! GG:我地第二日整返熱來食,又唔見出左好多油呢 ... 可能佢炸得通透? 幾好呀! 皮 2/ GG/ 士蕉拔拔:yeah,必試呀!記住! 哈雷彗星:係啊,是 FiON 的好介紹,我簡直要錫佢一啖

    回覆刪除
  29. 幫到人等於幫到自己大家要開開心心,反對任何人抄人家答案作為自己答案,希望大家知識日日增~2007年4月24日 上午5:06

    咁我上去果陣,同D伙計講聲先,見到笨B媽媽到,再比大碟D先,食唔哂最多用多兩個外賣盒,冇所謂啦,同你地咁熟,再比多個九折又點話呢,最緊要大家開心呀埋。

    回覆刪除
  30. 你下次有機會再去深圳可以試吓「西湖春天」,真係好唔錯 之前 YKFAT 喺你講 香格里拉飲茶 嗰時都有介紹過你! 仲有仲有,果間煨湯館都好好好好味噃!

    回覆刪除
  31. Bee:哇哈哈,你今日咁好心機打中文畀我啊,感動-ing 你超好記性呀,仲記得 YK 之前介紹過畀我 ~ 好,下次就去試食下!

    回覆刪除
  32. 見倒你D招積推介即刻勾起我點滴味覺回憶…我成兩年無上過去嘆食嘞…好渴 不過我隻B唔好上去貢,所以唯有望梅止渴啦! 有機會就借D二黐埋你去食啦!

    回覆刪除
  33. 要打開菜牌唔睇價錢不顧儀態咁叫餸…只有「佢」先比倒呢種感覺我 ( 打呢幾隻字用咗成10分鐘呀)

    回覆刪除
  34. 食左咁多都係 RMB150 @.@ 好抵呀!!

    回覆刪除
  35. please advise which software you are using to collage the photos, they look so good.

    回覆刪除
  36. 笨B媽媽: 我試過深圳一間菜館都好得嫁! o個間野叫西湖春天,地點o係筍崗路,搭的士好易搵, o係火車站搭的士去o既話只不過係二十蚊多少少!

    回覆刪除
  37. 笨b 媽媽, 呢間我試過呀!!

    回覆刪除
  38. 笨B媽媽︰勁呀,你連菜譜都影到,我上次想影,被阻止呀,HAHA 另外想問你D相整得好好,係咪用你上次介紹的軟件 我又有北上新嘗試,有時間過來看看

    回覆刪除
  39. your photos are very nice, can you tell me what is the software you use to add the photo frame

    回覆刪除
  40. FiON/ HVBHK:相片拼圖是用 picasa 做的,你可以參閱這篇 blog --> 非常好用的相片管理工具及網上相簿

    回覆刪除
  41. Thanks for sharing, I will go and try.

    回覆刪除
  42. Try Try la 戴上帽子的紅豆冰

    回覆刪除
  43. 雜糧包 ~~ 好正 !! 我有機會去試下

    回覆刪除
  44. 兩個人叫咁多野食??? 不過d賣相非常得

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: