2007年4月13日 星期五

湊熱鬧 - 【元朗嘉麗園】

 

本來呢o的相係兩個星期前影落,諗住做下儲備,無題材時才拿出來 (為免對得電腦太多變成隱蔽師奶仔,所以近期訓練緊自己一日只可寫一篇 blog

... )  但剛才揭揭下本飲食男女,赫然發現今期就係專訪嘉麗園!仲有成七版紙咁多!元朗街坊,快o的買本o黎睇耶 ~ 寫得好攪笑架

回想起,我地同嘉麗園都有段小故事架   話說 2005 年夏天第一次和笨 B 爸爸入元朗睇村屋時,完全唔識元朗地頭,簡直係胡亂咁行 ~ 途徑呢間裝修「突出」o既嘉麗園,見到成個門口掛晒大 banner,有個「潮州佬」大嘜頭,猛 sell 自己o的魚丸有幾咁好食,睇落好勁咁!最重要係o個時過左食飯時間,仲係坐滿晒人,我地心諗唔會差得去邊,所以就姑且入去一試喇 ~

 

一試之下,果然好味!o的魚片、魚丸果然好新鮮彈牙,仲好大碗添!其實佢o的粉麵款式超級多,o的名稱仲好攪笑添架!好似三寶、四寶、五寶 ... 到十寶都有!o的粉麵好好味,唯一唔好係個湯底太濃,食完有o的口渴呀 (事關佢話o的湯底係精心熬製的,所以飲左唔少 )!

 

故事o既高潮,係我地食過一次之後,完全唔記得呢間舖頭位處邊度!所以過去兩年間,係冇再食過架 !一直念念不忘,直至兩個禮拜前 (當然已對元朗熟悉好多了),又再貢下貢下,貢到呢條街啦!開心到我丫 ~ 即刻拉住笨 B 爸爸入去擦多次呀!今次醒左,攞埋咭片添啦

 

【元朗 - 嘉麗園潮州粉麵餐廳】

地址:元朗康景街 5 號地下

電話:2476-6882

 

【下圖】就係呢條 banner,吸引左我地入去試第一次架啦 ~

【下圖】令人印象非常難忘的門面設計
   不過冇左呢個「特色」,兩年後o既我都搵唔番呢間舖頭呀   話時話,嘉麗園門口經常泊滿小巴,如果佢唔做到咁「突出」,睇怕都冇人留意到佢!

【下圖】非常勁多款式,睇餐牌都睇到傻

【下圖】開放式廚房 - 最鍾意o個o的一樽樽吊起來的香料,睇見已流口水

【下圖】久別重逢,我食左個紫菜四寶米 ~ 好多料啊,食完好飽!

【下圖】笨 B 爸爸勁呀,挑戰「全套腩雜十寶」,清晒兼面不改容!

【下圖】除左極大量選擇o既粉麵之外,仲有好多潮州特食小食 ~ 我地叫左個炸大腸,好惹味呀!







45 則留言:

  1. 哈哈, 笨b媽你愈來愈似元朗人, 連呢間野都識得去食, 佢地d麵的確好味, 不過聽過太多傳言, 例如佢地係後巷處理食物好dirty, 又例如有些媽媽唔比帶bb車入去, 老闆娘唔憂無生意對客人惡到死, 加上一坐低就迫你叫野食, 一食完即收晒你枱面上既野, 講真, 我覺得佢地欠左一份人情味, 生意太好亦不需如此, 久唔久食一次我覺得ok, 不過佢做唔到我既飯堂, 我會去食不過唔會介紹佢囉, 而家上埋飲食男女, 咁佢地實唔憂做啦, 我地呢d帶住果細既, 都係幫襯唔到佢太多次 ~~~

    回覆刪除
  2. Sheena 媽:我都覺得佢旺到爆呀!所以必定要搭枱兼坐到逼逼夾 ~ o的侍應係比較「豪邁」的,不過我以為係潮州人一貫的大嗓門,所以冇特別反感o既 ~ 飲食男女寫到好鬼好笑架,第一版已經講左一大堆負面野 (e.g. 裝修騎呢、hard sell、嘈喧巴閉 ... etc etc) 但第二版就寫番o的食客o既正面評語 ~ anyway,佢o的野食都算幾 ok,所以我覺得都介紹得過o既 ~ 如果佢地有緣睇到我呢篇介紹 & 你的回應,希望佢地可以改善下o的服務喇 ~ 話時話,雖則我比起兩年前的元朗路盲是進步了,但都只限於大馬路、教育路和建材街一帶 ~ 有時o的 blog 友提起o的好味o既舖頭,我都仲係一頭霧水的,哈哈哈哈

    回覆刪除
  3. 全套腩雜十寶, 牛膀好好味! 我呢樹一定冇得食.....得d把鬼鬼佬牛肚

    回覆刪除
  4. 其實我以前都好鐘意食佢 d 野架, 特別係墨魚丸超正; 可惜而家佢紅咗, 價錢貴咗好多之外, 仲要細碗咗, 變相又貴又唔抵食

    回覆刪除
  5. 嘉麗園都係我入元朗必食的. 但千其唔好睇小佢的自製辣油, 真係小小都辣到飛起. 我都食得辣的, 記得係嘉麗園落同樣份量的辣油, 飲左2支可樂. 元朗朋友話因為落多左辣油, 中途叫伙計溝淡D湯的人成日有.

    回覆刪除
  6. 不過我覺得好嘈唔好鐘意食這個鋪頭呀!

    回覆刪除
  7. 通常呢d舖頭入得去都預佢無招呼 潮州人一貫的大嗓門<----未識大少爺前我都以為潮洲人個個係咁,但總有例外既 你就算唔隱蔽都仍然係一個師奶仔

    回覆刪除
  8. Fatgarfield 肥加菲2007年4月13日 下午3:54

    Everything looks so good! I love fish balls, it's perfect! Too bad it's so far... I would have no idea how to go there!

    回覆刪除
  9. 剛才未寫完按錯掣 ! 好彩潮洲大少爺唔鍾意食呢d,通常呢d舖頭入得去都預佢無招呼 潮州人一貫的大嗓門<----未識大少爺前我都以為潮洲人個個係咁,但總有例外既 你就算唔隱蔽都仍然係一個師奶仔

    回覆刪除
  10. Madame Pi:你o個度竟然有「把鬼鬼佬牛肚」食?我以為乜都冇添架 ... 話時話,不如你開番間,可能大收旺場 ~ 蝦毛:咦,我又唔知道呢o的故事背景啊 ~ 唔怪得知咁多人彈佢喇 (雜誌內都寫了不少,勁好笑的) 饅頭媽:佢樽辣油係幾辣啊,我都落左唔少!哇哈哈 珍妮仔:要坐得舒服的話,一定唔可以入呢間啦 ~ 因為趕頭趕命架 大少奶:我識o的年青潮州一輩都好斯文的,其實係生活環境唔同左,自然生活習慣都唔同埋 ~ 我認我係師奶仔架 ~ 要學下花師奶扭住 pat pat 洗碗先 ~ 哇哈哈 Fatgarfield:如果住開市區,一定 R 晒頭架

    回覆刪除
  11. 哈哈! 嘉麗園 老公至愛呀 次次都要食兩碗架(有時會逼我幫佢食半碗) 我愛墨魚丸 老公愛牛雜 我又係覺得湯底太濃 而家好多時都叫清湯呀!

    回覆刪除
  12. 哇!搞到我好想試下,不過十年都唔入一次元朗呢

    回覆刪除
  13. 小魚兒:哇蟹,睇唔出喎 (上次見到你老公,都幾瘦) 原來好擦得的呀!一定是你的美食訓練出他的大胃口呀 vyvy:唏 ~ 你o個度入元朗唔遠丫 ~ 順道過來探我囉

    回覆刪除
  14. 無留意依間野喎!!! 只知勝利好出名啫!!! 下次定要留意先!!!

    回覆刪除
  15. 你應該試吓 勝利手丸

    回覆刪除
  16. 呀! 我也到過! 車停在路邊 。。邊吃邊”監察”著 。。吃不出味道來 。。! 太愛車之故 。。

    回覆刪除
  17. 比你講到元朗好似個美食天堂咁,仲要真係大件夾抵食,好食過油尖旺啲食肆。 下次約人食飯,唔好去旺角同人逼啦,去元朗啦﹗

    回覆刪除
  18. 笨b媽媽, why do you always present delicious noodle soup when i want to eat?!!! but i have to go to work for the next 4 hours..... AND. far away from ME..................................... pls post some noodle soup recipes la, so i can make my own

    回覆刪除
  19. Christina 小魚仔2007年4月13日 下午6:37

    我成日同 honey去食架 ~ 我最愛吃四寶河 ~ Yummy

    回覆刪除
  20. 登~ 登~ 登~ 「凳」~ 蝦仔 、 蝦女 ~ 出世啦~

    回覆刪除
  21. 係呀! 我最鍾意食佢啲墨魚丸, 重有佢啲椒鹽鮮魷超讚!

    回覆刪除
  22. 好懷念呀!!! 我以前就係日日都係喺呢度坐小巴返屋企嫁~ 不過雖然我成日經過, 但一次都冇食過呀!!! 下次返黎一定要去食下先

    回覆刪除
  23. 我禽日本來都去果度食嫁, 點知朋友仔話想食第2 d野, 所以最後都無去到, 諗起佢門面嘅裝修真係好攪笑, 真係好多謝你呢個特派記者嘅實地採訪呀!

    回覆刪除
  24. 個樣好正咁喎 得閒真係要入去試下 但其實佢個紫菜四寶有d咩架? 好多時間間都會唔同

    回覆刪除
  25. 笨b媽: 如果你得閒, 咁我就約埋你一齊係元朗食飯囉, 咁我又可以帶埋sheena b出黎, 你話幾好呀!!!

    回覆刪除
  26. 睇落好有特色喔!

    回覆刪除
  27. 我每次入元朗, 都會食架~~~ 次次都係叫"淨墨丸"同埋"淨X寶", 真係好好味啊~~^O^

    回覆刪除
  28. 笨b媽媽, 哈哈, 個門面好搞笑, 你唔講仲以前賣拜神嘢果d地方... 不過, 近邊架? 龍少同我剩係識去大榮華咋!!!

    回覆刪除
  29. 好耐之前去過一次,覺得湯底味道太濃,濃到食唔到食物本身嘅味道,所以覺得勝利牛丸好味d,不過你又唔食牛... !

    回覆刪除
  30. 笨b媽﹕你個生日case 好詭異,大家都估唔到,你快啲過黎解釋下啦﹗

    回覆刪除
  31. 幸福小女人- Diana2007年4月14日 上午9:59

    笨B媽媽, 我好白痴呀!!!! 我頭先睇你個Subject一心以為你帶我地去睇元朗嘉麗園既示範單位....haaaaa 我以為嘉麗園係屋苑名稱呀!!!!! 越睇越唔對路... 原來呢間係食肆黎... 我真係大鄉厘到不得了呀~~~

    回覆刪除
  32. hi....我以前係天水圍住時... 都會經常去....可能我偏愛濃味...所以覺得好好味!

    回覆刪除
  33. 哈哈。。。原來您同我一樣。。。我都係入來元朗睇樓個地產話我知呢間係好嘢,之後我地想再去又搵唔返窩!後來要問人先知道0乍!!

    回覆刪除
  34. 我同diana一樣以為你介紹屋苑tim

    回覆刪除
  35. 阿愛:因為佢唔係位處大街,所以係冇咁覺眼的 C 人:我知呢間好出名,可惜佢真係淨食牛,而我又唔食牛呢 HubbyWhite:噢 ~ 那你下次要泊好車才能安心吃啦 小倫:香港係美食天堂,每區都有好味野食呢,唔駛特登跑入來元朗吃的呀 除非你來探我喇 poppennysun:我會煮 noodle 但好少特登做湯底的呀 (因為通常是懶o個排先煮麵吃 ) 我有個朋友的媽媽,每次煮麵都特登熬魚湯/ 骨湯來做湯底的,真是超有心機啊! 小魚仔:你有冇試晒佢咁多寶呀?查實分別大唔大架? 蝦佬:你同一女o岩o岩拉埋天窗,咁快整左蝦仔蝦女出o黎啦 發水麵飽:我都覺得佢o的墨魚丸唔錯,但椒鹽鮮魷就未食過,有機會要試下先 HOI man:佢門口就有一排小巴,旁邊又有另一排小巴 (去另一區的) 真係畀小巴陣圍住呀 布冧仔:佢個門面真係無得頂,但就係因為咁,令我再度認出佢呀! Yee:你睇下第三張相o既右下角丫 ~ 我明知自己會唔記得,特登影低「上湯四寶」有o的乜啊 Sheena 媽:好呀好呀 ~ 我都想見下 Sheena B ~ (因為笨 B 爸爸搣佢面珠登呀 ~ 呢個叔叔好曳架 ) 廣東小彥彥:係啊,真係好有特色架 ~ Candy:嘩 ~ 你咁愛佢呀 ?元朗仲有好多其他美食啊,有冇試過呢 ~ 咪咪吉:你知唔知大馬路有間舊式 HSBC 分行架 (泥黃色) o係o個個街口行入去,第一條橫街就係架啦! 小胡子:係啊,我都覺得個湯底濃得滯,明明餐牌寫「上湯」嘛 Diana:哇哈哈 ~ 竟然如此 笨 B 爸爸話咁下次不如真係介紹下o的樓盤咯! kwok330:鍾意食濃味的話,咁嘉麗園真係o岩晒你啊 ~ Mrs kwong:噢 ~ 我地竟然有唔少相同經歷啊 遲下仲做埋街坊,冇得頂呀 ~

    回覆刪除
  36. 幸福小女人- Diana2007年4月15日 上午12:31

    好呀好呀..我好鐘意睇樓架!!!! 其實都覓適緊樓盤....由笨B爸帶領睇樓團, 佢一定好有經驗!!

    回覆刪除
  37. 住左元朗咁耐,一次都無幫襯過啊~個門口太嚇人喇~但既然笨b 媽媽講得咁好食,搵日dup低個女去試下先~~~~~ (因為 Baby Sheena  話佢唔係好歡迎人地帶bb車入去嘛~)

    回覆刪除
  38. 多謝介紹, 好下次去元朗要試吓先 ...........不過下次唔知 係幾時呢

    回覆刪除
  39. 不好意思,我是路過的.請不要見怪~~>'< 我是元朗人.....其實元朗還有好多好食的地方...下次你可以去試下... 嘉麗園那條街一直行到冒險樂園,隔一間鋪是勝利牛丸...裡面的牛丸真的好好食...而且d姨姨都好好人.有次的飲凍檸茶時笨手笨腳,有個阿姨見到忍唔住教我'篤',幫我篤埋...=u=.... 另外元朗大棠道對住的周生生後面有條叫為食街.裡面d鋪頭雖然殘舊,但所以鋪頭各有得色都好好味的...國記的粥好食(稯就一般,我覺得自己包的更好)....國記對住的那間榮興粉麵(好似,應該冇記錯名)裡面的碗仔翅是我吃過全港最好的(我覺得啦).....而那裡的咖哩也是不錯的選擇) 另外水車管街(冇記錯),有一間好古意大利式的餐廳,祖凡尼餐廳的裝潢真的不錯.食物ok吧..... 最好的甜品不是b仔(聽聞好污糟).是在元朗廣場後面(朗屏街市??)那裡有間叫做甜心解果樂園,裡面的甜品好好食.....早幾個月電視有介紹過),最出名的是炒冰....真的好好食....夏天食最好....質地幼滑似雪糕,但感覺又似食刨冰.....食完透心涼.....真的!!! 而且服務態度又好.....^^

    回覆刪除
  40. 計潮洲粉麵黎講元朗係呢間最好食啊~自己都好鍾意食~0係新b仔附近一間叫「彪記」粉麵食牛腩牛丸及佢地d湯底亦都好好味呀~其實元朗真係有好多好野食,你介紹親d地方我都成日去食啊~仲有車仔麵亦都好惹味,佢地d豬腸簡直係一流呀~d辣汁十分惹味又夠辣,食得辣既人一定要去~

    回覆刪除
  41. 呢間我成日都經過啦...買過一次野 就係淨牛雜...不過都幾好食... 但係份量少呢...嘻

    回覆刪除
  42. Diana:哇哈哈 ~ 你都搬返杜拜喇,仲駛睇樓咩 ~ 你o個度又大又正呀! 許 bb 媽媽:你買外賣返屋企慢慢嘆咪得囉 ~ o個度真係坐得唔舒服架,唔知點解任何鐘數都咁多人 GG:總有機會o既 ~ 新界一日遊o既時候囉 yanmi:嘩!多謝你咁好心機打咁大篇回應畀我啊 各位街坊咁積極推介元朗美食畀我,我諗我第時唔駛煮飯都得咯 不過可能會第三度發「肉」 兩個寶貝:我好食得辣架! 你講o個間勁辣車仔麵都係指彪記嗎?咁搵日要去挑戰下先 阿懶:你成日經過架?咁下次去食o既時候,可能會撞見你喎

    回覆刪除
  43. 呢間嘉麗園我同老公去食過2次, 味道OK啦, 不過佢D服務真係差! 搞到我地要BADLIST佢~ 因為第2次去食時, 佢又唔同我地講就黎收工, 但就係我地食食下的時候, 係旁邊係咁倒水洗地拖地, 又野野都隊埋黎! 你知, 總有d人會覺得被掃把地拖隊到對腳係好唔老黎架麻! 咁岩我老公係正宗圍村人, 梗係會唔高興啦! 所以就badlist左佢lu~ 我老公話, "你就黎收工, 可以講聲, 最多下次早d, 唔洗d客仲食緊時拖地既!" 如果講雲吞麵果d, 有檔仲好食, 千色店大棠路果邊, 對面咪有間日本野既(以前叫三上, 而家好似改左名), 旁邊有條路, 入面係小巴站架呢, 沿住條路一直行, 第一間鋪就係啦~ 佢選擇唔算多, 雲吞麵, 牛肉麵都係我的"飛化"~ 10蚊碗架咋~ 但d雲吞真係好食又抵食(因為人地10蚊碗果d通常只會比3粒你, 但呢間會比4粒啊~) 呢間都係我的飯堂~ 仲有呀仲有呀, 你食得好辣的話, 要介紹你去食xx士多(唔好意思, 我唔記得左叫咩名, 如果有人記得, 可否補上), 係元朗商會中學正門對面, 不過佢收好早的, 最好都係下午去食, 不過好多人排隊的啊~ (因為我唔食辣, 所以唔知佢辣得有幾爽, 不過我老公話好好食架~)

    回覆刪除
  44. 呢間真的很好食嗎? 我經過過幾次, 每次佢都好多人食, 我本來都想試下. 但見價錢都幾貴, 成二十六蚊一碗粉/面.我給上次的勝利牛丸騙了.加上個個人的口味和食過既野唔同. 都唔知試唔試好.

    回覆刪除
  45. 涉 後 巷 違 例 洗 滌
    現 場 是 康 景 街 1 號 嘉 麗 園 潮 州 粉 茶 餐 廳 , 以 賣 牛 內 臟 及 牛 性 器 官 , 如 牛 鞭 及 牛 睾 丸 而 馳 名 。 報 道 指 潮 州 富 豪 李 嘉 誠 、 劉 鑾 雄 、 詹 培 忠 曾 來 幫 襯 , 故 有 潮 州 富 豪 店 之 稱 , 另 外 藝 人 成 龍 、 譚 詠 麟 及 李 克 勤 亦 不 時 到 來 光 顧 。 現 場 消 息 稱 , 店 負 責 人 將 部 份 後 巷 據 為 己 有 , 開 爐 處 理 生 熟 食 物 及 擺 放 煮 食 工 具 , 以 往 已 經 不 只 一 次 被 食 環 署 票 控 。 昨 晨 8 時 半 , 3 男 兩 女 食 署 職 員 巡 查 時 發 現 , 員 工 在 後 巷 露 天 位 置 洗 滌 供 食 肆 使 用 的 餐 具 , 違 反 食 物 業 條 例 , 即 時 向 東 主 發 告 票 。 姓 許 ( 51 歲 ) 東 主 最 初 軟 語 哀 求 : 「 唔 好 啦 ! 再 告 唔 掂 呀 ! 」 但 見 食 環 職 員 毫 不 留 手 即 發 難 怒 吼 : 「 淋 火 水 ! 最 多 攬 住 一 齊 死 。 」 拿 起 鐵 罐 猛 力 擲 在 地 上 ; 食 署 職 員 致 電 報 警 。 東 主 情 緒 激 動 破 口 謾 罵 , 又 阻 止 到 場 的 記 者 拍 照 , 喝 稱 要 「 拆 菲 林 」 。 直 至 警 員 到 場 調 解 , 才 肯 接 過 告 票 平 息 事 件 ; 警 方 經 調 查 證 實 事 件 並 無 人 受 傷 , 列 作 糾 紛 案 。 食 環 署 發 言 人 稱 , 在 後 巷 露 天 位 置 洗 滌 供 食 肆 使 用 的 餐 具 屬 違 法 行 為 , 一 經 定 罪 , 最 高 可 被 判 罰 款 1 萬 元 及 監 禁 3 個 月

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: