2007年4月15日 星期日

【屋仔近況 20070415】勤力地包包包 ...

之前提過,因為屋仔工程的延誤,有部分預先訂落的傢俬不能再拖,一定要送貨了 ~ 所以最近都忙於收貨同埋包、包、包 ... 事關仲有少許工程未完成,為免撞崩傢俬/ 牆壁,也為免鋪晒塵,唔可以偷懶啦  (大家見我之前 show 出o黎o個對做左 mud mask o既鞋 ... 都知屋仔地盤幾咁沙塵滾滾) ~

 

今日送了書檯、椅子和鞋櫃來,我和笨 B 爸爸就地取材,用紙皮剪成一塊塊貼滿角位,再鋪上膠檯布封好 ~ 這個簡單的工作,已弄得我們滿頭汗水了 ~

 

冷氣也裝好了 ~ 感謝 J 先生預先在冷氣機位下都留了去水管 Thanks (見下圖上方那幅)  令我們免卻日後冷氣機滴水的問題 ~

 

我地客廳裝左 1 部日立匹半窗口機 + 1 部日立 2 匹分體機 (很古怪的配搭?我攪出來的好事囉 ... 因為我覺得只裝一部三匹分體機的話,o的冷氣好似好唔均勻咁 ... )  而上層的小偏廳和 3 間睡房則各裝 1 部海爾 1 匹的窗口機。點解用海爾?因為想慳o的 $ 囉!海爾雖是國產但質素不錯、最重要的是它也有 1 級能源標籤呢。 因為冷氣機是耗電量很大的電器,所以 efficiency 是很重要的

 

安裝後試機,結論是兩個牌子都好夠凍,很快便把空間冷卻了 (當然也和天氣有關,今天都不太熱) 。唯一是日立冷氣始終是最夠寧靜的啊!

 

試完機之後,又要努力地將所有冷氣機 + 壓縮機包包包 ... 都係因為要防塵也!




 

勞動完一朝早後,下晝去左旺角睇廚房和浴室的 fitting ~ 哇,計計埋埋,淨係買 fitting 的錢都要好幾千元啊  ~

 

順道把有關安裝廚櫃的文章 print 出來送給不懂上網的紀先生 ~ 他很高興,不住的多謝我們。其實,作為一個勤勤懇懇的商人,那是他應得的。不用謝啊!



46 則留言:

  1. b媽 睇黎你應該好快就可以入伙喇 咁你屋企啲雜物打包好未呀?

    回覆刪除
  2. 小魚兒:我而家間屋 ... 由年頭開始,已經是一片大戰過後的模樣架啦 黃夫人介紹左間搬屋公司畀我,都係時候搵佢地上門 quote quote 價咯 ...

    回覆刪除
  3. 嘩﹗要洗好多錢呀﹗ 好彩你地冇擺酒,可以慳返一筆姐。 我登你地肉都赤埋呀﹗

    回覆刪除
  4. 妳就好啦!快要埋尾收樓入伙了,我的就真是有排煩了! 新傢俬倒容易處理,反而是搬舊的東西到新屋才是夠煩,妳要好好安排分類收拾,放在各紙皮箱封好, 然後用箱頭筆在上面寫上如三樓「睡房」、二樓「書房」、厨房......方便搬運工人放置到合適地方,也可 方便自己日後慢慢找回用品。 新居落成將會是很興奮的,尤其是這是你的心血結晶,更會有份成功感呢! 好好安排最後的工序,恭喜妳擁有如此甜美的安樂窩。相信笨B爸爸一定很引妳為榮呢!

    回覆刪除
  5. B 媽:我個洗衣機都係用海爾,邊個話國產唔好用? 海爾係國產頂級的,舊年先有特輯係介紹海爾, 我個洗衣機o係之前間屋係放天台, 日曬雨淋都不知幾襟用! 我當初都係諗住放天台先貪佢平平地, 但越用越覺佢值呀!

    回覆刪除
  6. 我上年都買了部日立機replace美國製飛歌機, 雖好靜, 但我仍覺得飛歌夠凍. 國產機其實都幾好, 海爾係大牌子啦.

    回覆刪除
  7. 祝你們搬遷成功。

    回覆刪除
  8. 小倫:是啊 我們就是因為這個大 Project,從年前已開始慳錢了 (所以你見我而家出街食飯都只去小店就知喇) ~ 螞蟻搬屋,勞心又勞力呀 不過都係一個非常值得回味的 experience 來的 ~ Rose:我們現在的家,從年頭開始已經是凌亂不堪的了 ~ 因為趁著年尾百貨公司大減價時,購置了不少用具呢 幸好我們兩口子,暫時雜物不算太多,應該沒你的搬屋 project 那麼大工程呢 多謝你的提點,我在執拾行裝時,一定會標誌清楚,方便事後執拾 雖然新居只是很簡單平凡的居所,但一磚一瓦都是我倆拖著手去尋覓、去挑選的,滿載了美好的回憶哩 ~ 相信你也會有同感呢

    回覆刪除
  9. 黃夫人:係啊!海爾其實在國際上很有名的,難得佢又好平啊 ~ 所以一定要支持下! 皮 2:我從未用過飛歌的電器啊 ~ 原來佢係最凍架?o個日o係豐澤 & 國美,sales 們都推介左日立先架呢 (莫非係 commission 高o的乎? ) anyway,日立都好好呀 ~ 賽文:多謝你呢 ~ 成你貴言

    回覆刪除
  10. 真係辛苦...屋又未收得, 仲要做多咗野

    回覆刪除
  11. 你同笨B爸爸今日的確巧勤勞喎

    回覆刪除
  12. See:冇計喇 仲以為包張枱好易,但原來包成半個鐘都未攪得掂!因為要保護晒所有角位、邊位,所以有殺錯冇放過,逐忽包 ... GG:係啊,用左好多 energy 呀

    回覆刪除
  13. 笨B媽媽, 其實你有無諗過返大陸買廚房同廁所既fitting呢? 因為我屋企都啱啱裝修完,我同屋企人都有去過旺角睇過fitting, 但講真真係幾貴。 所以我地就返大陸睇,點知完全覺得好好彩,因為無論係設計定係質量其實都同旺角o個D差不多, 但價錢係相差極之多! 好似一套浴室套裝(用泥擺牙刷,杯,牙膏),旺角好似買二百幾之四百幾,但大陸只不過係買一百蚊 樓下。淨係D杯,旺角單一隻買都要幾十蚊,但大陸都只不過係十幾蚊咋! 我lee個只不過係提供個人意見,你可以不妨考慮下!

    回覆刪除
  14. 包包包都呁辛苦, 第日抹抹抹咪仲甘 ?

    回覆刪除
  15. 雖然辛苦, 但做得開心嘛

    回覆刪除
  16. 笨b媽媽, 真係好喇, 快d執好d嘢準備搬屋去也~ 我都好想搬屋, 雖然依度只係住咗四年! 不過自己由一磚一瓦咁切出黎, 真係好有滿足感 而且我係一個鐘意搬屋嘅人, 因為... 天秤座鐘意新鮮感嘛~

    回覆刪除
  17. 笨b媽媽 加油努力呀!你地既目標就黎達到喇! 你地今日努力包包包既同時 我今日都努力整整整...... 整左幾樣野食,其中一樣係朱古力曲奇餅

    回覆刪除
  18. 第一次留言咋,有問題想請教笨b媽 ,見到你新居窗花好似無裝防蚊網,村屋唔係比較多蚊咩 我新居住六樓都有好多蚊呀,可能樓下有花草樹木又有水池啦,所以好鬼死多蚊呀 所以想裝防蚊網,你有無好介紹呀! 十萬個THANK YOU!!!

    回覆刪除
  19. 加油呀! 搬屋真是很勞累和用大量金錢的事情來的呢! 不過有新屋仔住又會好開心的呀!

    回覆刪除
  20. 你張書檯同門又好似係襯色o架喎,哈哈~~~不過張chair俾我坐實好快坐爛!真係羡慕你同笨b爸爸有間dream house!安頓好後就快d生笨b笨c笨d笨e笨f...笨z 啦~  

    回覆刪除
  21. 幸福小女人- Diana2007年4月15日 下午8:18

    見到你屋企裝咁多冷氣, 我諗你地裝修連傢俬全數都好甘!!!!!! 不過無法, 呢D錢又唔慳得.... 希望你地以後住落會開開心心, 舒舒服服啦!!!

    回覆刪除
  22. 就黎入伙, 笨b媽心情緊張/興奮?

    回覆刪除
  23. 哈哈哈, 苯B媽, 好多人都關心你裝唔裝蚊網的問題喎

    回覆刪除
  24. 哇!好玩呀!我最鐘意買屋企野架勒

    回覆刪除
  25. 一路都追你個blog....見到你間屋都裝俢得7788....又大又靚.....我都好開心呀....我都好想住村屋呀...但買村屋要比一半手期....而且比較要多d$裝俢....開支太大啦....我諗我儲十幾年$都買唔做...所以我覺得你地好叻咖....

    回覆刪除
  26. Suki:查實我同笨 B 爸爸都北上左幾次,亦見到唔少 fitting ~ 但好多人講國內製造不銹鋼的技術始終未到家,外表看來差唔多,但用用下會生銹,唔知係唔係呢? 如果你唔介意,可唔可以話我知你o係邊度買呢?用落 ok 嗎? Sheena 媽:冇錯,簡直係減肥最佳機會 ~ 我諗到時一定會練出強健o既二頭肌 饅頭媽:係啊,我同笨 B 爸爸都好樂在其中的 Yee:係呀?我一陣過來八下先! 咪咪吉:竟然如此?笨 B 爸爸都係天秤座架喎 ~ 不過我又唔覺佢貪新鮮啊 Ting Ting:我地暫時未裝但考慮緊 ... 其實都好視乎你間屋周遭環境多唔多樹、惹唔惹蚊 ... 如果你有需要,可以去羅生羅太o個度睇下,佢地都有做好多款蚊網的 (詳見 平靚正鍛鐵窗花 一文) Big Eyes:是啊 ~ 好在我地暫時兩口子,唔算太多雜物,都 ok o既 圓碌碌:哈哈,查實我地間屋設計好 basic 的 (基本上冇室內設計可言) 所以你見o的傢俬件件都差唔多色啦 ~ 我都鍾意 colorful,但我怕撞出來的效果不好就弊傢伙,所以諗住傢俬、牆身地磚都用o的簡單o的o既色,再利用其他小物如窗簾、枱布咕o臣等去配襯一下囉 Diana:係喇 ... 真係要駛好多錢 ... 好在笨 B 爸爸一早做左個 budget,先至唔會亂咁駛錢超出預算呀 Madame Pi:嘻,心情有o的緊張呀!因為驚唔習慣住村屋嘛 ... vyvy:我都係啊 ~ 我唔捨得買衫,但我好捨得買屋企野架 ~ 我可以約你行街街! 柯比布:查實而家都有銀行肯做 8 成村屋按揭架啦 ~ 不過始終都要預多o的現金 ... 我同笨 B 爸爸出來做野已 > 10 年,所以儲落o的錢慳慳地都夠o既 ... 你慢慢儲下彈藥,都可以好似我地咁,擁有自己的 dream house 架!祝你早日成功!

    回覆刪除
  27. 好快,可以入伙啦!恭喜恭喜!

    回覆刪除
  28. 你d相左黐右黐好得意呀, 請問係點樣整架? 可否教吓我 . (thanks )

    回覆刪除
  29. 裝修後都有排清潔呀!!! 笨B媽媽可以修身啦!!!

    回覆刪除
  30. 露絲公關手記2007年4月16日 上午6:51

    日立冷氣真係好夠靜,所以睡房我堅持要日立 ~ 反而廳就用豐澤牌,估佢唔倒咁好用喎! 見你周圍包包包,好似幾大工程喎  都快入伙喇,下話?

    回覆刪除
  31. 清潔真係好辛苦架

    回覆刪除
  32. 快啦快啦﹗快入伙﹗一路追看,好似自己有份咁﹗ 期待ing。

    回覆刪除
  33. 笨B媽媽:只要兩公婆甲手甲腳 慢事都可做到

    回覆刪除
  34. 點解你地好多香港人都唔裝分體冷氣既?因為我覺得用窗口機會令間屋好嘈,而且我覺得分體機比較美觀! 仲有我想講我阿姨佢之前都試過用內地既冷氣,但佢就有漏水問題.所以佢話都係用返日本牌子好0的(雖然佢知生產一定唔係日本)但始終信心有保証. 這些都係個人意見.希望你唔會有我阿姨個問題啦

    回覆刪除
  35. 幫到人等於幫到自己大家要開開心心,反對任何人抄人家答案作為自己答案,希望大家知識日日增~2007年4月16日 上午11:59

    笨B媽媽;點解唔用哂全屋分體既。 但我睇左你一個回應,所以有以下結論。 大多數既人都覺分體機要用好多電,其實,分體機同窗口機可以說是一樣,點解?其實係睇個師傅識唔識運用雪種多,如果調節得好,分體機不只是凍,還有幾會比窗口機冇用咁多電的,所以係師傅問題多一點吧,因為佢入雪種同佢包銅喉包得好,係有一定比佢原定既用電量為小,所以安裝既地方師傅係會對你的用電量會有一定影響的。 這個我打算用私人回應,你唔好嬲我多事先好wo。我係一個多事蟲。

    回覆刪除
  36. Cindy/ Angel:yeah ~ 我地都期待-ing Me:我用 picasa 整的,你可以睇下呢篇網誌 --> 非常好用的 online album 及相片管理工具 Yan Yan/ 郎媽:係啊,我一定會搵番o個對「失落的老鼠仔」 露絲:陳師傅屋企都係用豐澤牌架!都相當唔錯 ~ 只不過佢得 2 級能源標籤,我想買 1 級嘛 ~ 長江一號:要唔要練老鼠仔啊?等我拉埋你落水喇! Alice:其實我都鍾意分體機,原因和你說的一樣呀!不過笨 B 爸爸話分體機較「o徙電」,因為冷氣要從壓縮機經喉管傳送返入屋,o係過程之中,喉管會吸收外來熱量,所以令效能減低。條喉愈長就愈o徙電的了。 以我呢個慳家o既師奶仔,聽完咁o既原理之後,覺得都係慳電重要,所以同意選擇窗口機 ~ P.S. 而家好多新起的樓宇都會裝分體機,因為較美觀整齊呢。但較舊的屋苑,如要裝分體機,就可能要搭棚安裝壓縮機,那會花多些錢,所以很多人都沿用窗口機呢

    回覆刪除
  37. 如果你有好多野要包,試下去大d嘅書局買包裝用的保鮮紙吖!之唔係d運輸工人用來包貨果d呢!第時搬屋都用得架!

    回覆刪除
  38. 個啲叫拉膜紙 , 我見過係九龍灣個邊既五金舖有得買 , 幾年前就$30 一卷 , 好似保鮮紙咁用就得嘞. 宜家好多電器店都係用佢黎 pack 啲陳列品. 我搬屋都係用黎包裝傢俬什物 , 電視 , 音響用品都用佢黎包 , 好方便.

    回覆刪除
  39. 小胡子/ Eliza:一言驚醒夢中人 ~ 我知你地講緊邊o的啊 ~ 唔,都要買番碌番來用先 多謝多謝 ~

    回覆刪除
  40. 最好盡快搣甩貼係新枱上D膠紙呀!雖然你已經用左“奏紋“膠紙,但貼得耐加上溫度變化,都會好難整甩架。如果你買左包裝用保鮮紙,就用佢來固定護角紙皮,不過包嘅過程都要有D技巧,要一個人去固定紙皮,另一個人去包,努力呀!

    回覆刪除
  41. 睇怕你搬完一輪屋之後實會起碼瘦10磅8磅, 搬屋真係好辛苦嘅呢

    回覆刪除
  42. 笨B媽媽, 我地係o係東莞買架!我地新年既時候買,擺左o係廁所同廚房, 但係幾個月都未有生锈既現象!

    回覆刪除
  43. 可能呢! 我搬兩次都係搵呢間, 兩歙都唔同師傅上黎~~~ 但佢地真係好好呀,有多紙箱會好似 $3 定 $5 個回收!

    回覆刪除
  44. 你真係好有心機包包包wor~ 仲要包得咁鬼死正! 但係...d 膠紙會唔會留漬ga??

    回覆刪除
  45. 越黎越想有一個自己的小屋, 笨 B 媽媽可唔可以私人話我知, 一間小屋子, 加埋呢 d 咁既野, 大慨要幾多錢呀 ?

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: