2007年4月30日 星期一

朝十晚六大勞動 の 乜都 DIY 篇



我不嬲都覺得男人專心工作時個樣係最吸引的 ~ 所以我成日偷影笨 B 爸爸 ~

 

尋日主腳其實係笨 B 爸爸,佢負責裝埋剩餘的 fitting (因為牆身太硬,佢上次攪唔晒,今次特別問人借個強勁的油壓鑽再來做過) 兼且 IKEA o個張餐枱 ~

我呢o的地盤女工,就負責收拾殘局、清理現場,以及將主腳o的工具搬來搬去 ~

啊呵呵呵 ~ 裝好了 ~ 足足六尺長的大枱,可以坐 8 個人呢

話時話,呢張枱好 good value ~ 是實木的,勁重呀!個樣好靚好典雅的 (大家記唔記得,我地一月o既時候已經o係 IKEA 睇中呢張

Markor 餐枱呢 ~ 我地o係灣仔某籐器店訂左 6 張籐餐椅來襯佢,但未送到 ~)

同場加映:買左 bubble 紙和皺紋膠紙了

(用來包門鎖、門邊、樓梯把手等,防止搬運傢俬時刮花) ~ 不過尋日太忙,未動工包呀   (都要快了,因為其他傢俬陸續要送來了 )






 


 

朝十晚六大勞動 の 新屋清潔篇 (附清潔小貼士)


尋日和笨 B 爸爸入了新屋勞動了整天,攪到我地兩副「老骨頭」都快要散了

  (哇哈哈,原來 blog 友們以為我們都很 young ... 其實,已經是「old bone」了 )  體力果真不復當年勇呢 ...

 

 

本來都想找鐘點來做清潔的,但這一兩個星期,經常在新屋等送貨、等人安裝呢樣o個樣,如果冇o的世藝,真係悶出鳥來 ~~~ 幸好上星期初已裝好水錶,可以開水用啦! 

(大家要明白,o係一個冇水用o既地盤發o牛哣,係一件幾咁痛苦o既事
... 悶不特止,人有三急都冇得用廁所o個下弊!)

 

洗左幾日 + 尋日o既朝十晚六大勞動之後,我發覺 ... 可能連鐘點都唔駛請啦 ...   話時話,失落多時的老鼠仔,又開始出現番了 ...

 

大家睇下我o既裝備

激落君海綿原來有英文名架 ---> Lec-King    在百貨公司家品部、或大間o的的日本城都有得賣。圖中呢款一包三件的賣 $10 ~ 仲有好多其他 size,但要留意有些是一大塊的,要自己切架 ~

水啊 ~ 水啊 ~   你終於來了 ~


【清潔小貼士 1 - 去除頑固的膠紙漬】

WD 40 果然是新居入伙清潔必備!

【清潔小貼士 2 - 去除牆身的擦痕】

以前都是用擦紙膠擦/ 濕布抹的,但而家發現,用「激落君」海綿效果最 good!(睇埋我段「曾 sir feel」 video 喇

)



2007年4月29日 星期日

安裝左電磁爐啦!


進入搬屋倒數階段,我開始有o的「甩 blog」狀態啦

 ~ 近來覆回應可能慢一點,請大家見諒 ~

好 ~ 今日有乜新消息呢 ?哇哈哈 ~ 咪就係我地千揀萬揀、千呼萬喚始出來o個個電磁煮食爐囉 ~ 前日卒之裝左啦 ~ 大家睇下佢幾靚仔 ~ 我仲即刻試左煲水,好快呀 (我咁都可以整條 video,大家話我幾咁無聊 )  正正正 ~

 

睇下 ...

近o的 ...

再近o的 ...


師傅o黎裝爐時,好驚訝我地點解曉o係廚櫃邊留通風位 ~ 因為佢話供應商「詐型」,話好多客冇預通風位,部機散唔到熱,好易「打柴」佢話如果見到o的客冇做,就會叫佢地煮食時打開個廚櫃門 or 拉開電磁爐下的廚櫃櫃桶,幫助散熱 ~

除左o係櫃o既盡頭開左疏氣百頁位外,在地櫃內亦預留了疏氣位 (見下圖) 

話時話,我地係買左 Rasonic 2800 W o個款電磁爐的 ~

在 Panashop 買,平過連鎖電器店 $800 咁多呀!只是 $3,100 o乍!禮品一樣咁多 (查實仲多左一款!) 正正正

贈品 list:

(1)  一個中式鑊、一個湯煲、一個小煲,當然全都是適用於電磁爐的 ~

(2) Rasonic 2000 W 火鍋電磁爐一個,冬天時已用過來打邊爐,加熱好快!

(3) 孖人牌刀叉一套 (Panashop 自己加送的,因缺貨,所以不在照片中)  




無聊片段:笨 B 媽媽試用新爐

2007年4月28日 星期六

【新屋採購日誌】電寶即熱式超薄熱水爐

好在我地得兩個浴室o者 ~ 否則買熱水爐都買到窮呀 ~

 

話說屋仔的合約是包括浴室熱水爐的,雖然都是我地用左好耐的牌子「電寶」,不過,當然是普通的款式喇!我們在市區的家就是用普通沒有電子恆溫的款式 (~$2xxx 一部),水溫較難控制,冬天沖涼時就最沮喪,唔係太熱就係太凍,永遠較唔o岩舒服o既溫度,激死!所以,就算要貼多一倍的價錢,我都堅持要買部新出的電子恆溫款式,因為住村屋冬天特別凍,較唔到適合水溫,我一定日日發脾氣呀!

 

電寶上年新出左一款電子恆溫熱水爐,好薄好型,最緊要係可以接駁太陽能熱水系統 (呢個好重要,因為我地已經訂左,期望太陽能熱水器可以為我地慳番唔少電費。話時話,電熱水器的功率是 18000W*,係一樣相當耗電o既電器!)

註 1 --- *18000W = 1 小時已要用 18 度電 ... 想像下,當我開著部 23L 焗爐焗 1 個鐘都只係 1500W (1.5 度電)、當我部「大雪櫃」一年才用 485 度電的時候 ...
  當然,冇人沖涼會沖咁耐o既,皮都甩咩!

註 2 --- 太陽能熱水器好用與否,我地要親身試過至知。到時再報導!

 

我地又秉承「買得精叻」o既精神,格勻各大小電器商店o既價錢 ... 然後發現,原來

紀先生都有代理的!價錢固然係平過大型連鎖店好多,連小商店都平過呀 (可能紀先生見我地幫襯左廚櫃,所以計平左畀我地) 連鎖店賣緊 $5,960 x 9 折 + 二百至三百的安裝費,都要 ~ $5,500 一部。而紀先生o個度,~ $4,800 就得啦!正正正 ~

不過,買左兩部,荷包都係勁傷架啦 ... 嗚 ~

 

【圖一:

按此放大

【圖二:

按此放大


後記:由於村屋多數沒有煤氣,所以大部人都是用電熱水爐的。我地是用

三相電,故此可以使用薄款的即熱式電熱水爐 (如是用單相電,就要用大大個的儲水式熱水爐了)  

2007年4月27日 星期五

【意見搜集】驅蚊防蟲方法

哇哈哈 ~ 我今日想整理一下驅蚊防蟲的資料時,摷到咁多段留言呀!大家真係好錫我,我都未問,已經自動送上咁多好提議 ~ 多謝晒你地呀!

 

我稍為整理 & trim 了一下,放在這兒,等其他搵緊相同資料的朋友一覽無遺喇  ~

 

話時話,查實我已搵左中毅鋼閘的羅生度了尺,隨時都可以落訂造蚊網架啦 ...  但前幾日入去時,K 先生同我提過有一個街坊是用「超聲波驅蟲器」的,好似唔平,但據講頗有效 ~ 因為佢住o個個屋苑,一落樓就有蚊咬,但佢在屋企開住部驅蟲器就冇事,蛇蟲鼠蟻都冇云云 ...

我想問大家有用過/ 聽過類似產品嗎?真係 work 架?(事關我睇消委會 2005 年某篇報導,講話呢類產品效果成疑 ... 我 post 左在最下面)  但好吸引,因為如果真係 work,咪唔駛裝蚊網?慳錢之餘又通風o的喎
 

 

Blog 友提供的驅蚊防蟲小貼士:

=========================================================

小胡子:

有一個防虫方法好work架,就係把屋企所有去水渠口,用封箱膠紙密封佢,用到先開返囉,真係小左好多“小強“架!

芊芊媽媽 (Ernice 媽):

不過你住個頭多d蚊(有冇印象年年都講誘蚊指數 … 你隔鄰”牌坊村”都上榜) 要關晒d窗但夏天唔開窗又會焗到間屋好熱 .. 所以最好係通風的窗加蚊網 … 我個時全屋都安晒 … 但後來發覺有點浪費 .. 因為有d窗係唔多開 …尤其夏天返工驚撇雨 .. 好多時開一兩隻通吓風咋

Jingle Bell:

去五金鋪買 d 細格鐵絲網, 固定係每個去水渠位之上, 咁樣 d "小動物" 就入唔到屋但係個去水渠又可以如常運作啦!

五金鋪亦有賣 d 去水渠蓋, 呢個蓋可以 "令" 嘅, 一邊就係完全將個渠口封住, 一邊就係好似網紋咁, 不過呢個蓋成本高 d , 大約十幾蚊一個.

同埋我 suggest 你最好而家裝埋防蚊網, 住村屋呢! 傍晚時份 d 蚊真係唔講得笑, 特別係 5 點至 8 點呢 d 時間, 而家天氣未熱, 所以你未 feel 到啫, 而家 d 防蚊網有 d 係用磁石架! 冇用果時可以成塊除落黎, 你考慮下啦~

AA:

蚊子是最大的敵人, 初時也想貼近大自然, 但一兩天便投降, 我所有門窗都要安裝防蚊網, 包括露台、大門。

蚊帳也是很好的選擇, 因為始終有一兩隻漏網之蚊, 會攪到冇覺好訓 gar; 買定一個 "電蚊拍"以備不時之需啦,  這都是比較自然的防蚊方法。

還有一次我我因一時大意無立刻清理車頭蓋的鳥糞,  第二天便留下一個印, 怎樣也抺不去。 

蟻也是好可怕, 小心不要留下甜點給牠們享用, 否則牠們會全族出動探望你的。那時 "刹蟻粉" 可派上用場了。

Fiona:

鄉村地方多蚊 (我屋企都係),無蚊網就大件事 (唔知你同笨B爸爸惹唔惹蚊) ... 我都知 $$$ 係一個問題,所以當我入伙時我都唔係所有窗裝蚊網 ... 我嘅 theory 係夏天好熱嘅日子就一定開冷氣,其餘唔太熱嘅日子,某啲窗 (with 蚊網) 就長開 (如果你有對流窗咁咪裝蚊網係果兩隻窗) ... 蚊網唔單只 guard 蚊,真係可以話蛇蟲鼠蟻都 guard 到 (我又唔知你屋企周圍環境點),住三樓都其實唔係太高,而且你遲啲仲種花 tim ...

Rose:

蚊網是必需的,一定要裝,不容有失呀!

磁石的比較方便耐用,有些是向上卷或拉下式的,伹很易爛。

饅頭媽:

入伙前滅一次蟲好D, 除左可以清走現有的蟲蟲, D藥水仲可以有幾個月壽命預防蟲蟲特工隊入侵.  除左滅蟲, 學其他bloggers話, 你要封渠位, 買隔網蓋好企缸的去水位等, 小強最like係渠位入屋.

巫婆:

俾個小貼士你啦 (我搬新公司/屋企裝修)都有用架:

1) 因為裝修完一定有d味(油漆/木/膠水); 2) 驅到蟲蟲; 3) 唔好煩同傷害到人: 所以就會用沙薑粉啦 - 佢可以吸味/驅蟲/又唔太影響人, 同埋因為新樓係會比較濕, 佢都可以吸濕架!

你可以用一個個既袋仔裝起, 然後一間房就分別擺係幾個角度, 就唔覺唔覺攪掂啦! 不過當然recommend你未入伙之前攪一次大型既 pest control啦~~~

 

消委會 2005 年有關超聲婆電子驅蚊器成效:

 ===================================================

關注超聲波電子驅蚊器成效-《選擇》月刊第343期(2005年05月14日)


超聲波電子驅蚊器真的能達到聲稱的功效?

這些產品聲稱能有效驅趕叮人的蚊子,消費者委員會向代理商查詢其論據。

根據產品上的宣傳字句,超聲波電子驅蚊器發出的頻率,能模仿雄蚊翼部拍動頻率的聲音,可驅趕叮人的雌蚊。

消委會向6間供應本港市場的超聲波電子驅蚊器代理商查詢其產品的效能聲稱,共有5間回覆,但只有2間能提供測試報告。

代理商提供的報告指出,在實驗室的環境內放置了驅蚊器,比較對照環境會有較少的蚊子,但仍有蚊子飛進。而周圍環境會否影響驅蚊功效有待核實。

超聲波電子驅蟲產品的功效,一直都受關注。

美國醫學雜誌Annals of Internal Medicine和美國疾病控制及預防中心分別指出,超聲波電子驅蚊器不能有效防止蚊子齧人。

美國聯邦貿易委員會在2001年向超過60間超聲波驅蟲產品的製造商發警告信,指出產品上聲稱的功效必須得到科學證明。

在1985至1997年間,美國聯邦貿易委員會共控訴6間公司,指其就超聲波驅蟲產品的成效作出虛假及未被證實的聲稱。六宗個案都以協約解決。

食物環境衛生署的資料顯示,本港的蚊子至少有70種,超聲波電子驅蚊器未必能驅趕所有品種。消委會希望在本港出售的牌子,都能就其產品成效提出獨立的科學證據。

5月分《選擇》月刊亦刊登了其他驅蚊用品的詳細報告。

美國醫學雜誌Annals of Internal Medicine和美國疾病控制及預防中心,都建議用含有避蚊胺(DEET)成分的驅蚊產品。避蚊胺亦即N,N-diethyl-meta-toluamide, Diethyltoluamide, N,N-diethyl-m-toluamide或N,N-diethyl-toluamide.

日常一般使用不需要太高濃度的避蚊胺,10%至35%避蚊胺的蚊怕水已足夠,兒童使用的宜低於10%。

選購含西藥成分而用於人身體的驅蟲產品,如蚊怕水,消費者應選擇在外包裝上清楚印有註冊編號「HK-XXXXX」字樣的產品。

作即時和一般家居使用的除蟲劑,如蚊香或蚊怕貼等,產品均須附有註冊編號「1PXXX」的字樣。

Source:http://www.consumer.org.hk/website/ws_chi/news/press_releases/p34303.html

Linkwithin

你可能對以下文章有興趣: