2007年3月20日 星期二

砂鍋雲吞雞o既好朋友 --- 火鍋雲吞嘉美雞 (超讚!連做法)


某日笨 B 爸爸刨明報時,見到人地介紹某食店o既砂鍋雲吞雞 ,佢就大興問罪之師 

 ...

 

笨 B 爸爸:喂係喎!我上次咪整左個好好味o既雲吞雞o既?!你做咩冇 post 出o黎呀
?!

笨 B 媽媽:幾廿年前你整o個次下話
 ... 係好好味呀 ...

笨 B 爸爸:係囉,咁好味梗係要話畀大家知喇!你呢期淨係 post 自己整o個o的野,唔駛 post 我o個o的架啦?!

笨 B 媽媽:你估我唔想架
 ... 之不過你上次o個煲整得好核突,用個大湯煲整,o的材料撈到亂晒籠,o的菜又變左梅菜,我連相都冇影呀 ...

笨 B 爸爸:咩 ... 核突呀
?!好味就得啦

笨 B 媽媽:咩呀!整o的咁核突o既野上去,一陣我o的 blog 友睇見到唔開胃,咁點算先
!我每次 post o個o的菜式,雖然冇大少奶咁有心思擺晒 setting 咁影,但至少都稍為執得整齊o的先可以 post 啊!我都有o的要求架!

咁啦,你教我點整,我o聽晚整一次,到時我用個火鍋煲仔,o的材料咪可以放得靚o的、又可以 keep 住熱辣辣咁食囉!

笨 B 爸爸:唔 ~ 有得食 ~ 咁今次放過你喇!嗱,你o聽日整時,要咁咁咁咁咁
...

 

所以,尋晚我地就整左呢個「火鍋雲吞嘉美雞」勒!笨 B 爸爸話激讚呀!(我謙虛,個標題寫超讚算啦 ...)

砂鍋雲吞雞大家就食得多,o係出面賣仲唔平添!但可惜o既係,出面食o既有時都唔係真材實料   可能用左冰鮮雞、o的湯底又可能係搵罐頭雞湯整的 ~ 自已o係屋企整,只要買o的靚料,求其放埋一煲,都好味到你唔信呀!

 

大家睇下我尋日買左咩野材料 ~

   嘉美雞半隻 (以前講

嘉美雞粥 及 海南雞飯 時介紹過,每個街市得一檔有得賣架o乍 ~ 認住個 banner)

   北京小棠菜 1 斤

   勁大粒鮮蝦雲吞 1 打

   金華火腿  (切 2-3 片出來用)

   日本清酒 (幾廿年前買o黎整

清酒煮蜆剩落的)

   瑤柱仔 (在陳師傅家又食又拎的)

   薑  3 片

屋企無啦啦又唔會有個砂鍋o既   不過用火鍋爐一樣咁正!一來o的材料可以擺得整齊o的養眼o的,二來可以用個爐暖住 ~ o係天氣仍然涼涼地o既夜晚食,簡直無以尚之呀!

 

【做法】

1. 半隻嘉美雞唔駛切,洗乾淨血污,用 2 茶匙粗鹽和 2 茶匙清酒抹勻兩邊,醃 30 分鐘

2. 用大湯煲熬雞湯 (呢個 step 唔用火鍋煲,以免滾瀉) - 先下 4 公升水煲滾,下金華火腿片、瑤柱仔、薑片和雞,再滾起後,轉中細火煲 1.5-2 小時

3. 將雞湯移入火鍋煲中 (如雞湯有剩,可先用碗裝起,食咁o的再添入鍋內),將小棠菜和雲吞加入,滾起就可以食架啦!連調味料都唔駛落,係咪勁易先!

 

【笨 B 媽媽小貼士】

   雞湯如有少量油,唔駛隔油啊!因為烚菜要有少少油才好味啊!

   隻雞唔駛切架!煲左兩個鐘之後o既雞 ... 一攞起就散晒咁滯 ... 我幾經艱苦先勉強保留到上半截完整放落個火鍋度影相o乍

   呢個火鍋雲吞嘉美雞份量可以做湯又做餸,配埋一碗飯,其實足夠 3-4 個人食   尋晚我都冇食飯呀 (但我仍然煲了 1:1 的紅白米飯畀笨 B 爸爸食)

 

沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: