2007年3月29日 星期四

【清心潤肺 + 消暑解渴 + 超級容易】紫背天葵凍飲

天氣一熱,我又忍唔住猛咁飲凍野啦

  雖然經常飲凍野唔係幾好 (容易濕重/ 經痛的人不宜),但 ... 我地呢o的血氣方剛o既年青人,好難忍架嘛     

 

如果我唔係太懶,其實都有好多消暑解渴又有益o既飲品o既 ~ 上一年夏天介紹過美白健脾去濕o既

檸檬薏米水,等我再醒多樣好味又健康o既飲品畀大家喇 --- 最緊要易整丫嘛!知啦 ~
  呢個紫背天葵凍飲,20 分鐘攪掂,難度 0.2 分!

 

【紫背天葵凍飲】2-4 人份

材料 

紫背天葵  一飯碗 (唔記得左磅下幾重 ... 好輕架o乍。話時話,藥材店有售)

水  2.5 公升

冰糖  4 湯匙或隨個人喜好

檸檬  隨意 (可以唔加)

做法

1. 紫背天葵略為沖洗,隔水備手

2. 大鍋內下紫背天葵 + 水 + 冰糖,煲 15 分鐘熄火由得佢浸下 ~

3.  攤涼後隔渣、放入雪櫃雪凍就飲得!鍾意o既話可以加片檸檬調味 ~ 攪掂!

(o個 0.2 分難度,畀多左佢添啦

)

冷知識:紫背天葵原貌 ~ o係 google 摷左十幾版先摷到!

紫背天葵屬秋海棠科,是一種矮小的草本植物,長在陰暗濕潤的山崖上,葉面有毛,呈深綠色,葉背紫色。紫背天葵能清熱解毒,潤燥止咳。用開水沖泡,其色紫紅,味微酸,清香可口,能消暑除熱,又有解酒之效。

同場加映:今日忍唔住去左二記 (二德惠) 八卦八卦 ~ 畀我見到梅子粉喎    尋晚食番石榴時仲若有所失咁話如果有梅子粉就好啦 ~ 點知今日畀我買到!好味 ~






44 則留言:

  1. 笨B媽媽, 紫色的飲品好得意,總之是紫色的東西我都會喜歡! 加上梅子粉食生果真是可以更加引出生果的甜味!

    回覆刪除
  2. 唔好飲咁多凍飲呀, 因為你準備要苯b+苯c , 凍飲無益o家

    回覆刪除
  3. 珍妮仔:哇哈哈 ~ 恭喜你 ~ 你做左我第 7777 個留言者啊 ~ 無意中睇到架,咁o岩得咁橋 ~ 哈哈哈! 咪咪貓 & 豆豆龍:咁要趁未有之前 ... 勁飲先

    回覆刪除
  4. 好有益..多謝推介..

    回覆刪除
  5. 嘩!! 石榴加梅粉真係好好味ga....

    回覆刪除
  6. 我都係會用話梅粉跟石榴食架!正呀正呀

    回覆刪除
  7. Hello!!!!!我試過在川菜館吃麻辣火鍋時配這個凍飲,超鍾意呀。原來還可以解酒。多謝分享,會試做。 番石榴加梅子粉,也好喜歡。 (好羨慕你的新屋 ,跟丈夫一起建立,真有意思。)

    回覆刪除
  8. mmm...好好味咁,不過又吾啱我飲啦...(原來食石榴要把中間那部份整開架?我都吾知喲,次次食都係慢慢吐啲核出來,食一個要好耐,試過食吾曬剩低一兩個加青蘋果攞左去榨汁飲,都好好味架.你下次可以試吓)

    回覆刪除
  9. 翻譯那事,原來咁鬼c難,你不說我都還不知喲  我已經叫我阿嫂自己再找人好了...嘻嘻

    回覆刪除
  10. 真係巧易咁喎, 叫亞媽整俾我 先...........你睇我幾懶 e.............有冇話o羊人唔適合飲嫁?

    回覆刪除
  11. 但我想問呢D紫背天葵在那裡買呀???? 有空睇吓我個BLDG呀!!!

    回覆刪除
  12. 我的baby 三個月大,你個一個多大啊

    回覆刪除
  13. 好健康喎~~等我叫mama買d返黎俾我煲下先!!

    回覆刪除
  14. 孤陋寡聞呀我!第一次見梅子粉咋!請問通常梅子粉係點用架?

    回覆刪除
  15. 我返來喇!!! 今次玩得好開心! 不過公司update唔到個blog~ 今晚係blog到見喇~~

    回覆刪除
  16. 紫背天葵,我睇黃又又如本食譜都見過! 我覺得個名同個樣都好靚呀!

    回覆刪除
  17. 哈哈 ~~ B 媽 我屋企長年都有備用梅子粉 我同你一樣 要加上梅子粉 如果無梅子粉 我唔食番石榴阿 無滋味拉

    回覆刪除
  18. smallcow/ 鍚鍚 Erica:好過飲汽水哦 ~ 得閒試下 ~ Yan Yan:我係去泰國時先試過番石榴架梅子粉呢個食法 (笨 B 爸爸話台灣好興啦) 不過尋日買的番石榴太細個,挖完核後得番層皮! 下次都係要買大個o個o的先得 vyvy:靚女 ~ 查實二記以外,邊度仲有梅子粉賣啊? 等我下次唔駛特登去二記嘛 阿莫:是啊,原來很有益的 如果有去過大澳玩,一落船就有檔賣紫背天葵凍飲的小檔子呀!o個度有乾的紫背天葵可以買回家自己煲,阿姐仲會教你有咩益處、點樣煲咁架 ~ BBMAMA:以前細個都唔識啊,係大個睇書先知道原來番石榴的核最好去掉才吃,咁就冇咁容易引致肝熱便秘的 加青蘋果榨汁,好像街上的生果汁店也見過 ~ 不過我懶,懶得摷個攪拌機出來用完又要洗呀 (話時話,我好少買青蘋果,因為我牙齒容易敏感,每次食完青蘋果都覺得好痠軟呢) GG:呢個問題 ~ 我查探下先 不過任何食物都係適可宜止好喇 tungtung:我們的是很久以前遊大嶼山大澳時買的,但我見有網友話藥材店亦有賣啊 小胡子:查實我都只是第一次買梅子粉,我見包裝上說可以用來沖調飲品的 (e.g. 梅子綠茶) 冬菇:你返來啦 ~ 今晚見 Natalie:我第一次聽個名時都覺得個名好靚呢 影子:昨晚吃的番石榴太小型了,也熟了一點,所以番石榴味已很夠 ~ 笨 B 爸爸說大型的番石榴 (台灣叫「芭樂」) 味道清淡一些,果核也少一些,配梅子粉會更美味

    回覆刪除
  19. 我在台灣旅行食番石榴,也是加有梅子粉的!yummy!

    回覆刪除
  20. 上星期我係黃埔既大白佳見到有梅子粉賣~ 因為佢地有個counter專賣台灣野~ 重幾平添 (平過2記!!!)。精打細算既B媽可以去黃埔行下~

    回覆刪除
  21. 但係呢我聽人講,紫背天葵好寒淳架!仲話佢同"賓"大碗一樣有落仔既功效…好誇張…

    回覆刪除
  22. 好似好好飲wo!但唔知啱唔啱我呢?

    回覆刪除
  23. 我都有牙齒敏感架,食酸野啲牙會好痺架~~ 所以我買啲青蘋果通常只用黎榨汁,好少就咁食~~  

    回覆刪除
  24. 我正想問對我呢d 寒底人士0岩飲嗎?

    回覆刪除
  25. 笨媽:我見到您留言比sheena 媽關於廚房的,我都想睇下您有無d真實個案廚房相我都想要參考下,我要重新起過後院連廚房。 所以都要計劃一下~~ 

    回覆刪除
  26. 好感動, 你總係不厭其煩地覆晒大家既回應, 你真係好有心!!! 好難得架! 你個blog又唔係人少, 嘢嘢係咁覆真係唔嘢少.....你真係好哪!!!! 得到你既回應真係好開心架.....加油呀!!!

    回覆刪除
  27. 早前我有個同事用呢種紫背天葵黎整湯圓,佢做出黎既colour係 紫色 既.而且我都食唔到有乜特別味道,所以又忘記左呢樣我從未接觸過既山草藥.但今次見到妳呢個drink,真係好引唔住呀,咁colourful,岩哂依家又悶又熱既天氣飲呀.但我想問,會唔會好寒呀?

    回覆刪除
  28. 笨b媽媽 我出camp喇! 你上次問有關律師樓的事 我都唔知點講好! 律師是另一個律師朋友介紹的 樣樣都跟得好足 查契查得很清楚 但問題也由此而生 你應該記得阿ken講過 我們間屋原本是有露台的 但後來因工序出錯 而沒有了露台 但唔知點解 當初新屋落成後 第一手買的契約及平面圖內仍注明有露台 我們的律師查到這問題 曾對我們說很麻煩 可能律師費會貴很多 可是隔不久 他便告知原來當年第一份錯的契約正是出自他們的律師樓! 正因如此 我們的律師最後不收任何額外的費用 為我們更正返所以契約及屋的平面圖! 就係因為咁 我都唔知話佢地信得過還是信不過! 所以 你同b爸傾傾 看看還要不要他們 如果要的我再給資料你們吧!

    回覆刪除
  29. 笨b媽媽 真係聽就聽得多, 但係真係未飲過 不過, 我寒+燥熱底飲唔飲得架?!

    回覆刪除
  30. 原來二德惠有梅子粉.太好了.點生果好好味,上次去台灣唔記得咗買呀

    回覆刪除
  31. 梅子粉+番石榴? 巧特別耶

    回覆刪除
  32. 露絲公關手記2007年3月30日 下午7:43

    梅子粉超得架喎,等我都去入d貨先,謝謝呢款全新凍飲推介! 剛在東京賞櫻回來,有時間過嚟睇睇吖。

    回覆刪除
  33. 梅子粉+番石榴 超好味~

    回覆刪除
  34. 愚 人 節 快 樂 A

    回覆刪除
  35. 紫背天葵我o係大澳飲過, 我都覺得好好味wor, 原來藥房有得賣.......... 梅子粉可以o係D 印尼材料鋪買到, 約$5 樽, size 好似大牙纖筒少少

    回覆刪除
  36. 天氣咁熱煲黎飲啱晒 透心涼~~~~

    回覆刪除
  37. b媽 元朗千色都有梅子粉賣呀 你第時搬入黎就唔駛去咁遠買喇!

    回覆刪除
  38. 梅子粉加 CHERRY TOMATO 都好正 GA! 多謝笨B媽GE 好介紹! 其实笨B媽真係可以出本書WOR....

    回覆刪除
  39. 我覺得紫背天葵好似利賓納, 以前成日飲, 依家有孖寶反而少咗整.....

    回覆刪除
  40. 紫背天葵係 sogo . uny 有新鮮賣架 ! 煮出黎仲紫 !

    回覆刪除
  41. 請問飲完條脷變左紫色係咪正常o架...thx!!!!

    回覆刪除
  42. Candy:我飲完後 ... 又冇照下鏡喎 下次留意下再話你知!

    回覆刪除
  43. 好呀..thx!!!!(不過我今晚都飲hee)

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: