2007年3月28日 星期三

【我的身體流著咖喱血...】簡易青咖喱薯仔雞翼 (附食譜)


冇錯 ... 又係咖喱  ... 因為要清左前幾日煮

白咖喱雞扒時剩下的 200 毫升椰汁 + 被我冷落o係廚櫃裏、五月到期o既青咖喱醬丫嘛!

第一次煮青咖喱,但味道好對路啊

!大家不妨試下!

 

【簡易青咖喱薯仔雞翼】 二人份

材料

青咖喱醬一包 (第一次用佳廚牌,但覺得好好味啊)

椰汁 200 ml (多點、少點也沒關係啦!)

洋蔥  半個  (乾蒽粒都可以!)

泰國金不換  少許  (我在街市的香草店買了 $1。去泰式小店當然也有啊。呢個係重點材料,一定要有啊

)

辣椒粉  適量

油  適量

雞翼 8-10 隻

薯仔 1 個

做法:

1. 雞翼先解凍,用糖、鹽、豉油醃 1 小時以上 (我仲加埋辣椒粉 )。薯仔切大件。

2. 雞翼和薯仔用 180 度焗爐焗約 15-20 分鐘至燶燶地,或用鑊煎香亦可。我貪用焗爐可以逼o的油出來呀。

3. 平底鑊下一湯匙油,炒香洋蒽粒。加青咖喱醬炒 1 分鐘至香氣溢出。

4. 加椰漿煮滾。

5. 加雞翼和薯仔炆 10-15 分鐘 (耐o的都得,不過我冇咁多時間   又唔鍾意o的雞翼爛晒咁)

6. 臨熄火前加金不換葉和辣椒粉調味,攪掂!

 

同場加映:菜湯必勝法

   用白菜仔滾o既菜湯最甜美!

   切 3-4 片薑拍鬆,先炒香白菜仔,然後先加 2 大湯碗水滾湯,可以去除草腥味和菜仔的寒涼。只要加幾片魚片和少少豉油調味,啖湯已經好鮮味!


今晚水果:番石榴

番石榴含有非常豐富o既維他命 C,健脾消滯,係飯後良果。仲有降血糖療效,非常適合糖尿病患者食用。

冷知識 - 食得多番石榴會便秘?!

Yeah ~ 因為番石榴含有鞣質,有收歛止瀉o既作用,所以食得太多可能會引致便秘啊 ~ 最好是去核吃啦 (好似我咁,切埋畀我家丁笨 B 爸爸吃,對佢幾好呀 ) ~


47 則留言:

  1. 嘩...兩個人食十隻雞翼咁多.......... 比一隻我!

    回覆刪除
  2. 你都好鐘意整咖喱wo!我未病時都成日整咖喱架!因為天皇鍾意食咖喱!依家病左咖喱唔啱我食! 我都整過白咖喱,另外仲有紅咖喱雞同黃咖喱牛腩! 我好細個時已經知道食番石榴會便秘,所以唔會買黎食!

    回覆刪除
  3. 嬌俏黃夫人, 〝答傘〞先!你同你老公緊係好細食ka la! 兩個人10隻雞翼唔算多啦!我整雞翼時都會整10-12隻!如果笨B爸爸帶lunch box,我覺得唔夠tim ar!

    回覆刪除
  4. b 媽... 我同黃生又點會細食吖~~~ 你唔記得我地有個 瘋狂西餐 咩?! 仲有我地兩個都係肥人黎o架喎~!~~~ 我宜家又整緊麵包布甸喇!(老公今日農曆生日..) 又食~~~

    回覆刪除
  5. 又食咖哩真是咩色都俾人食均啦!

    回覆刪除
  6. Cindy:嘩,你呢期捕我o的新 blog 捕得好快喎 係呀,我同笨 B 爸爸口味好 match,都係咁鍾意食辣野,所以泰國菜 & 咖喱係我地至愛! 唔想整得咁密架,但罐椰漿開左之後唔可以擺咁耐嘛,又唔想整甜品 ~ 黃夫人:係咯,乜你咁細食呀 唔怪得知你咁瘦喇!我都想好似你個胃咁細呀 喂,呢個青咖喱醬唔錯,得閒買來試下 ~ 不過記住記住要買埋金不換,真係畫龍點睛呀!

    回覆刪除
  7. Cindy:哈哈,畀你估中,笨 B 爸爸係「睇餸帶飯」架!佢知道今晚煮青咖喱後,就話明天帶飯喎! 又唔早o的講,人地只準備左 10 隻雞翼o乍! 好在有一個大薯仔坐鎮,所以畀左 4 隻佢明天帶,今晚佢食左 4 隻,我只食左 2 隻 (真係難為了家嫂 ) 查實雞翼咁肥,我不嬲都唔敢食咁多呢 珍妮仔:係啊 ~ 我今個月都整勻咁多隻色咁滯啦!哈哈哈!

    回覆刪除
  8. 聽日會唔會整日式咖哩呢? 都好好味架, 我係jusco$10店買d日式咖哩磚, 嘩! 好味道飯都食多幾啖, 你又試下啦 ~~~ 反而我無見過青咖哩醬, 係百佳有得買架可?

    回覆刪除
  9. 個瘦字無可能 match 係我身上囉.... 唉.... 我影婚紗相果陣差唔多 140 磅呀... 同埋....你o係邊個街市買到金不換呀?! 我多數都係去旺角街市買餸,但放工去到都七點幾喇...... 返工果頭就近北角街市,但未去過呀~

    回覆刪除
  10. 你個菜湯我以前成日煮, 不過我用紹菜, 係我個潮州朋友教我整.

    回覆刪除
  11. 勁勁勁~~上次個隻白咖喱粉, 仲係我搵緊邊樹有得賣既時候, 你就再整左隻青咖喱!! 跟唔切丫~~

    回覆刪除
  12. 嘩,係整係食兩隻雞翼,真係廿四孝老婆! 但如果比著我可能都會咁,只要心愛的人喜歡食自己煮既野,自己食少d無所謂啦!

    回覆刪除
  13. Sheena 媽:青咖喱 ... 我o係惠康 superstore 買的,我估百佳 superstore 都應該有 ~ 細舖有冇就唔知啦!如果你去開泰式小店買金不換,可以o係o個度買埋青咖喱醬啦 (未必是呢隻牌子,但泰國出的,都應該好對路啦 !) 話時話,我好少食日式咖喱的,因為唔辣丫嘛!真係好食? 黃夫人:喂 ~ 咁又睇唔出喎!得啦 ~ 你嬌俏丫嘛,呢樣夠晒 ~ 你去o個兩個街市我都唔去o既 ... 但我知北角街市勁多野賣喎!你睇下有冇泰國小店 or 一o的賣香料o既舖頭 ~ 唔駛去超市搵勒,一定冇 ! minicorgie:菜仔仲甜架 紹菜 ... 陳師傅以前都成日整畀我飲,係咪加蝦米啊?

    回覆刪除
  14. Erica:嘩,你咁樣唔得,快o的行動喇! Cindy:哈哈,你講中晒我o的行為 ... 當笨 B 爸爸鍾意食時,我會特登食少o的,留多o的畀佢;佢唔欣賞時,我會勁快咁食晒佢,免得佢o依o衣哦哦

    回覆刪除
  15. 笨B媽媽呢排好勤力煮飯仔喎... 我就唔乖啦!! 好耐冇落廚... 因為新工比較忙同夜放....所以冇廚飯...

    回覆刪除
  16. 我奶奶响天台都種咗棵金不換 (我地叫佢做九層塔),要佢做調味料上天台摘D葉落嚟就可以煮餸喇!仲有葱呀、蘆薈、珍珠菜呀.....都唔洗去買囉!

    回覆刪除
  17. 嘩,呢個先處理雞翅的方法好窩!d 咖哩汁起碼無甘肥膩呀!!Good !!

    回覆刪除
  18. 笨b媽: 咁o岩o既? 昨晚我都整左咖喱耶!!!! 亦都係好正呀!!! 但我地太急於開餐都無閒情去影....哈!! 呢個天氣, 食d激野, 個人無咁dull 啊... 講番你個 "番外篇" 之 "外番篇"--"番石榴"...我一直覺得便秘o既唔唔...個shape ..係似 ....番石榴架.... 不過我又好鍾意佢陣清香

    回覆刪除
  19. 薯仔雞翼係我「飛彿」呀 ...........B爸唔想帶就俾我啦 我一個人一次都可以食5-6隻嫁

    回覆刪除
  20. 笨b媽媽 咁啱我今日中午又同同事食泰國青咖哩喎! 真你啱喇! 我今日好忙呀 因為要清晒三月三十日前到期嘅文件債 我明天及後天要入營 無時間做嘢 今日放工仲要整定明天行山的午餐及老公這兩天的小食 忙到而家先得閒上網呀! 你今日問我嘅問題急唔急呀? 如果唔急我出camp先覆你 因為說來話長 如果急嘅你明天直接call我 電話講唔駛打咁多字呀!

    回覆刪除
  21. 笨b媽媽, 你真係好叻, 本來今餐係屋企煮.... 但係最終都走咗去食sushi~~ 好味好味

    回覆刪除
  22. 我今日又肚痛呀!!! 乜有效架??? 等我試試先~~ 你試試利川咖哩煮咖哩呀!!! 好好味架!!!真架!!! 知你係辣妹一名 我都係喎~~~以前曾想參加鬥辣比賽架!!!

    回覆刪除
  23. 笨B爸最近有沒有胖了呢?

    回覆刪除
  24. 忽然之間..好似去左泰國咁呀

    回覆刪除
  25. 俾你搞到我心思思想食咖哩添,好,明天就去吃咖哩飯﹗ 不過我冇笨b爸爸咁有口福,有人煮埋啲愛心咖哩俾佢食。我只好光顧大快活啦﹗

    回覆刪除
  26. 我鍾意番石榴汁多d.....番石榴太硬

    回覆刪除
  27. 好好味呀!!!! 我又試吓整先~~ 好鬼鐘意你d材料簡介!!! 好清楚~~~ 順便問吓...d bubble点寫中文字上去ga??? 我寫極都淨係出問號 -??????- 好奇怪....

    回覆刪除
  28. 你要加油整多d好嘢又post多d簡單既食譜出嚟, 我依家想煮嘢食第一時間睇番你個blog教過d乜, 而我又認為我會煮到的跟住做, 真係好多謝你呀, 我老公有無好嘢食靠晒你哪!!!!

    回覆刪除
  29. Christina 小魚仔2007年3月29日 上午3:44

    南瓜笨B媽 ~~ 個咖喱好正 你好鐘意整咖喱 ( 你咖喱Fans )

    回覆刪除
  30. B 媽 ~~ 我覺得我身體流既 係辣椒血呢 咖哩都係我非常愛既 不過 咖哩我都一定要加好多辣椒 每餐飯都一定要辣椒 即使去餐廳食飯 都要叫一碟辣椒仔黎送飯食 所以 總結 ~~ 我既係辣椒血 你阿 ~~ 搞到我又想煮 green curry 等我又去揾嚇我呢度有無呢個牌子阿 見到你既薯仔 即刻就想食辣咖哩

    回覆刪除
  31. 你好哦笨B媽媽 !! 我叫拔拔 .....第一次响你個blog度留言~~ 不過我就一早已經睇晒你個blog啲網誌~~ 你好勁喎介紹咁多好野比我地做參考...謝呀 !!

    回覆刪除
  32. 唔好意思, 可唔可以教我點樣o向篇entry度加入d咁cute o既 icon公仔呀? 麻煩晒~

    回覆刪除
  33. 我就唔會流血...我只會流口水呢... 青咖喱要好有椰汁味...好味呀。

    回覆刪除
  34. 係喎 而家天氣咁濕 食curry就最好不過!! 呢個weekend可以一試 姐姐sat去我home食飯 問下佢想唔想食先 不過佢唔like 椰汁 我自己整curry 鐘意落埋蕃茄&香茅架薯仔我就會煎香佢 (灑上curry powder) 會入味好多 不過焗呢個方法都幾好喎

    回覆刪除
  35. 你呢個青咖哩會唔會好辣呀?

    回覆刪除
  36. 嘩, 咁多番石榴嘅..

    回覆刪除
  37. 番石榴加話梅粉,好好味架,你試下啦!

    回覆刪除
  38. 嘩......好多嘢食呀......

    回覆刪除
  39. 睇完之後好肚餓... B媽你好衰吖~~~! 整d野食咁靚, 好似好好味咁... 我條肚虫醒哂啦...

    回覆刪除
  40. 各位:嘩 ... 蟹 ~ 果然大家都好喜歡吃香喝辣哦!同道中人!yeah ~ 今晚懶呀 (查實係因為買左本新出o既壹周刊,心急想刨 ),唔逐篇覆啦 美美小丸子:我第時有個天台,都打算種一堆香草,隨時可以用,我覺得勁正呀! 阿愛:你呢個辣妹介紹o既,一定係好野喇! 利川咖喱o係邊度買啊?惠康有嗎? Cake:你打o的字出問號,會唔會因為o個o的係「香港字」呢?有o的字係出唔到架 ... pingu:我揀得o黎煮o既野,難極有限 (如果唔係,點稱得上「練精學懶」初班煮飯婆 ) 我煮得出的,成功率至少有 90% 呀! 士蕉拔拔:哈哈,一個青咖喱竟然吸引到你呢個潛水 blog 友浮上面留言,感動-ing!得閒多o的o黎坐啦 Vi:你可以睇下 表情公仔 呢篇 blog,你可以在裏面 copy & paste,或到我介紹o個o的網站度攞o黎用 ~ 布冧仔:青咖喱唔乜點辣架,所以我倒左一大堆辣椒粉落去呀 Madam Tsui:我尋晚食番石榴時,就係諗緊呢樣野!因為去泰國時買當地的新鮮番石榴,佢地係有話梅粉灑面架!酸酸甜甜咁好好味架 ~ 我今日就係去左二記 (二德惠),咁o岩見到包梅子粉 ($30 ~ 幾貴哦 !),我估應該係類似o既野卦 ~ 買左番來試,試完話你知好唔好味呀下!

    回覆刪除
  41. 但我覺得番石榴d核係最甜ga

    回覆刪除
  42. 但我最鐘意就係食果d核呀!但為免冇屎屙 ....都係.....

    回覆刪除
  43. THIS CURRY DISH 好正 AR!! I LIKE YOUR TRICK OF BAKING THE WINGS INSTEAD OF FRYING OVER THE STOVE. THE LATTER=GREASY & MESSY. THX. I WILL TRY SOON - 要大辣!!

    回覆刪除
  44. 好似好好味! 如果我可以早啲向你學習以家庭為重,咁我可能唔會去到呢個無可挽回嘅地步... 祝你哋一家人永遠都幸福快樂!

    回覆刪除
  45. 我媽整咖哩雞翼薯仔唔會煎雞翼架... 你的好似好好食. 等我今晚叫亞媽整俾我食先

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: