2007年3月23日 星期五

【南瓜之下落 - 上集】極簡易南瓜湯 + 平底鑊版蒜蓉多士

作為一個精打細算o既師奶仔,我必定要推舉南瓜 (仲要係中國種,大大個幾蚊雞o個隻) 為

最佳打斧頭正菜之一!事關我三月頭買左佢番來,足足用左五次先用得晒
!呢個南瓜,我買左 $6.50 o乍 ... 即是平均每次只須 $1.50!!!  

 

等我回顧一下呢個偉大o既南瓜曾經作出o既貢獻喇 ...

   3 月 7 日 ---

南瓜炆排骨

   3 月 12 日 ---
南瓜豬肉餃

  3 月 13 日 ---
咖喱薯仔南瓜雞翼 配印度薄餅

  3 月 22 日 ---
極簡易南瓜湯 配平底鑊版蒜蓉多士

   3 月 24 日 ---
南瓜粿仔

 

今次介紹o既極簡易南瓜湯,係由大少奶啟發我的

  不過我懶,連攪拌機都唔想摷出來 (屋企細就係咁麻煩,o的野用完又要洗乾淨入番晒盒,攪到我都唔想用!)  所以我攞手提打蛋器代替,又得喎!o的南瓜肉仲一絲絲地,幾有口感架!

 

另外,前晚整

酒香提子麵飽布甸時剩左幾片麥方飽,就順手整個蒜蓉飽o黎送湯喇!以前我都間唔中用平底鑊來烘多士架啦,今次試下整蒜蓉飽又如何 ~ 又得喎!
  雖然用焗爐 perfect o的,但冇焗爐o既朋友,不妨又搵平底鑊試下丫,ok 架!

 

【簡易南瓜湯】二人份

中國南瓜切粒   2 飯碗

低脂奶   1 盒

意大利雜香草   適量   

Step 1:在小鍋中放入南瓜粒,水量加至剛蓋過南瓜面,慢火煮軟南瓜,用木勺壓爛

Step 2:加奶 (留一兩湯匙作裝飾用)。如怕奶味太重,可以清水代替部分鮮奶。可用打蛋器慢慢攪拌,有助打散南瓜肉及混和鮮奶。

Step 3:上碟。將少許奶倒在湯面裝飾。可加意大利雜香草及淮鹽調味。攪掂!

【平底鑊版蒜蓉多士】二人份

麥方飽  2片

蒜頭  1 個 切蓉

有鹽牛油  3 湯匙  (如用無鹽牛油的話,可自行加點淮鹽調味)  

意大利雜香草 適量

 

Step 1:將牛油、蒜蓉和意大利雜香草混和,塗在麥飽上

Step 2:在平底鑊裏加一點牛油或橄欖油,抹勻。用慢火先烘香表面 (約烘 3-4 分鐘)。

Step 3:見表面已轉金黃,即可翻轉烘另一面 (大約 2-3 分鐘至金黃色) 攪掂!

【下圖】雖然無焗爐烘得咁平均,但我覺得都可以接受啊!慳水慳力好方法也!





同場加映:南瓜對話

冷知識:食得太多南瓜會變黃面婆?

話說胡蘿蔔素被人體吸收後,就會轉化成維生素 A 被人體使用。如果胡蘿蔔素攝取過多,遠超過人體所需時,過多o既胡蘿蔔素即造成「胡蘿蔔素血症」,令膚色變得黃黃的。

幸好,只要暫停補充胡蘿蔔素,膚色o係一段間後就會恢復正常。

結論係 ~ 無論吃什麼東西,或者補充什麼營養成分,凡事都係適可而止好

~  學陳師傅話齋,人蔘食得多都會死人喇 !營養攝取過量除左會造成身體負擔,仲可能令身體產生不適或各種問題添呀。

我呢個大南瓜足足分左五餐食,分量唔算多,所以我冇變黃面婆呀 ~ 大家放心

(如大家有興趣閱讀關於「胡蘿蔔素血症」o既詳細資料,可以參考杏輝醫藥雜誌)

 

35 則留言:

  1. Darling 有咁多野你唔學,真係揀最容易既來學

    回覆刪除
  2. 果然o係典型巨蟹座o既家庭主婦,我又係買o左個南瓜分o左四次先食得哂, 真你係超值,我老公仲欏D核來種添,一個禮拜已經出哂芽啦!

    回覆刪除
  3. 南瓜對話......好搞笑呀~~

    回覆刪除
  4. 原來南瓜湯可以這麼簡單的. 只是蒜蓉包好像下多了一點蒜蓉, 不過也該好吃

    回覆刪除
  5. B 媽 ~~ 今日呢兩個介紹真係絕頂既好 又好O岩我呢D非常懶既人阿 看起來我都可以介紹既方法呢 最重要就係 你用O左平獲 好O岩仲未有焗爐既我 我真係好用心既看完 我又要學整拉

    回覆刪除
  6. 師奶仔~~ 你儲埋儲埋啲錢點用先??? 南瓜我都好鍾意架!! 用來煮咖哩就正到爆啦!!!

    回覆刪除
  7. 哈哈哈﹗你打斧頭打得咁出面,你唔驚笨B 爸爸炸你型呀?成日都南瓜﹗

    回覆刪除
  8. I love 蒜蓉多士 i will try it with french bread though... I like to eat italian food, and hate to waste food next time if i have bread, i will try it too MAMA has so man creative cooking ways haha,, thanks for sharing` tmr i will start my spring break, one week off ar~~ yeah

    回覆刪除
  9. 我估下集出南瓜糖水...

    回覆刪除
  10. 你個南瓜仲未yark完???!!!!!

    回覆刪除
  11. 我覺得你d相影得幾好,可唔可以話我知你用邊部相機影o架?? 另外,不如你試下整南瓜西米露,我有次係酒樓食過好正,仲有煎南瓜餅都好好味,再唔係整個潮式南瓜飯,用南乳(即係紅色o果d腐乳呢) + 豬肉片 + 蔥段 + 蒜頭,我屋企間唔中會整,將d o野炒至接近全熟放落電飯煲撈埋d飯焗一陣就得(或掉番轉將飯放落鑊略炒都得),係一個濕身d o既飯,但好惹味~~

    回覆刪除
  12. 笨B爸冇投訴: 又係南瓜?!

    回覆刪除
  13. 笨B媽媽,雖然我不是從事出版商行業,但是我見到你很用心製作烹調過程,所以我想問你可有想過將blog上的食譜出書呢?因為我自己的願望也同你現在所做的一樣,可是我比較懶,沒有像你這樣做得那麼仔細,我最多只會將製成品拍下的啫!

    回覆刪除
  14. 笨 B 媽媽 你咁愛食南瓜,介紹你整個 杏汁南瓜紫米露 好易整,仲好好食

    回覆刪除
  15. 笨b媽媽, 你真是一個好慳家的師奶仔,一個南瓜煮甘多款!

    回覆刪除
  16. 如果你有bb, 可以整埋南瓜粥仔添~

    回覆刪除
  17. 嘩~~好勁呀~~我又要學整~~

    回覆刪除
  18. 我都試過你呢隻南瓜湯做法. 我又係怕鬼左搬部攪拌機出來, 打一陣又要洗又要收番. 有次試過用椰汁代奶, 但太"漏". 又試過用少少cream, 都ok. 至於多士篇, 哈哈, 細個時屋企無焗爐, 我阿媽就咁放d包包響鑊面, 好細火乾烘. 都唔錯架.

    回覆刪除
  19. 唔只係大少奶, 連你...連你都引我做南瓜怪~~ 我做x都唔會放過你地嫁!!!!! 會唔會係我去日本前睇到下集啊?

    回覆刪除
  20. 曳 B 媽咪:咁快手o既你 ~ 半夜三更都唔訓覺掛住蒲 blog 呀 話時話,你真係種左o的南瓜出來呀? honey:唔係你估 ~ 如果唔係我邊擔當得到「練精學懶唔易唔整善用殘餘物資靈活變通食你唔死兼有驚喜」呢個形容詞 MC:係呀,我屋企o的南瓜悶得滯,成日傾偈架 Maggie:我好鍾意食蒜蓉架 ~ 呢度我嫌少添啦 ~ 不過又懶,費時再剁多o的 影子:我就係記得你冇焗爐,呢個蒜蓉飽是為你而實驗的 (真的) ~ 阿愛:o殊 剩番o的錢,梗係搵個月餅罐入起佢喇! 話時話,我試左一次將南瓜加入咖喱後唔太喜歡,因為我鍾意勁濃味 + 勁辣,南瓜會降低晒呢兩樣美味因素啊 ~ 不過怕辣o既朋友就o岩晒 ~ 小倫:我唔成日煮,個南瓜擺得耐發左 mould 要丟的話,會畀佢摺櫈侍候就真呀 poppennysun:係呀!善用殘餘物資係美德來呀 ~ 又慳家又環保啊 你有一個禮拜 term break 咁高興呀?咁就要整下野食啦 ~ Yan Yan:哈哈 ~ 今晚你就知 ~ Cake:冇錯 ~ 食足五餐 ~ 簡直有「五餅二魚」o既風味 圓碌碌:查實我部相機唔係好掂當架 尤其o係唔夠光o既環境之下,簡直係鬆郁懞呀!經常令我好沮喪 不過佢影 video 就好好 ~ 係 Sanyo C5 來的,外型有o的似部 DV,幾型仔,但太輕了,所以防震功能九流 ~ 每次影完相,我都要o係 Picasa 或 Yahoo Blog 相簿裏執一輪先可以寫 blog 架 (我有介紹過 Picasa,你睇「網站推介」o個度會搵到架 ) 海洋星女:yeah ~ 唔好浪費嘛 Madame Pi:哼哼,我肯下廚煮畀佢食,唔駛郁扮大爺咯喎 ~ 再咁多投訴我就揼佢 mandy:哇哈哈 ~ 我邊夠資格出書啊 ~ 因為我都曾經經歷過唔識煮野,攪到o的野一鑊泡o既階段,所以我非常明白有作法圖解 + 小貼士對於學習煮一碟餸係幾咁重要o既 所以o係能力範圍內 (如有時間) 我都會盡量解釋得詳細o的,令大家明白o的嘛 小雲:多謝你o既好介紹 ~ 下次再買南瓜時考慮下試整先 珍妮仔:呢個係陳氏宗親o既美德來架嘛! 波師奶:哇哈哈 ~ 來日方長 ~ 實有機會o既 鍚鍚 Erica:yeah,超易整,你都試下喇! Auntie Goo:冇錯!我係覺得超煩架 第時個廚房大少少,情況應該會有改善 期待-ing 冬菇:哇哈哈,我今晚有飯局,可能夜少少先會出 post 啊 ~ 希望你睇到喇!

    回覆刪除
  21. 望着D美食 我又留口水了~

    回覆刪除
  22. 嘩....$6.50有咁大個 我呢樹無咁平....$6.50得斤幾二斤咋

    回覆刪除
  23. 笨b媽媽, 試吓用黎煲粥啦, 好正架~

    回覆刪除
  24. 笨b媽媽諗頭真好,我一直都唔敢用中國既南瓜架,因為我怕佢唔夠香甜,但睇見妳用得咁好,有返信心lu.

    回覆刪除
  25. B 媽 ~~ 真係感動呢   為o左唔辜負你呢份心意 我一定會煮好南瓜湯 & 蒜蓉多士阿

    回覆刪除
  26. 真係好抵食﹗今晚我都食佐個南瓜意大利軟飯﹗

    回覆刪除
  27. 我都要多多向你學習

    回覆刪除
  28. yo..........巧得呢 由於你話極簡易, 攪到我都想試吓整tim

    回覆刪除
  29. 我屋企無咩人食南瓜架 ! 想整都唔得, 兩年前, 我亞媽發現有糖尿病後, 我睇d書話南瓜好, 所以都煮過一輪南瓜, 不過, 後來亞媽出完, 佢自己當然唔會搵自己笨食啦 ! 之後, 我都無再煮 lu.

    回覆刪除
  30. 你真係咩都識!好叻! 南瓜炆排骨、南瓜湯我都試過 but南瓜豬肉餃就真係未試過!又要試試la...... 自從睇完你個blog學試好多新菜式! but my honey就慘la...........

    回覆刪除
  31. 廣東小彥彥:呵呵 ~ 不要流口水啦,就去煮一個吧! See:我都唔知點解咁平 ... 到底個阿姐有冇收錯我錢?! 不過中國南瓜本來都幾平啦 ~ 咪咪吉:雖然呢款南瓜o的甜味唔重,但我諗搵o黎煲粥,笨 B 爸爸未必肯食啊 莎莎:不瞞你說,我都係第一次買中國南瓜返來煮! 但原來幾好喎 ~ 影子:係啊,你一定要整呀 Angel:意大利飯咁正?好味呀 ~~ 呀心:你太睇得起我啦 ~ 查實我煮野唔叻架,笨 B 爸爸叻好多 GG:係極簡易啊!不過南瓜肉會冇咁爛,仲係細絲狀,會有o的口感的,都幾得意 Sweet Panda:其實南瓜係一種高纖又低熱量o既瓜類,食多o的都好架 ~ (當然食太多唔好喇,可能會引致皮膚發黃 ) miumiu:no la ~ 我唔係樣樣都識整架 ~ 尤其是又複雜又麻煩o個o的,我奉旨唔會o係屋企整架

    回覆刪除
  32. Christina 小魚仔2007年3月28日 上午7:49

    你變左 " 南瓜笨B媽 " ~ 你遲D可从出本 【南瓜集 Cook Book 】。

    回覆刪除
  33. 笨B媽媽, 好多謝你個南瓜食譜!!!我只係識整...南瓜雞柳jar~~~!!!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: