2007年3月4日 星期日

超簡單 + 勁好味 = 椒鹽雞軟骨!

細個時屋企煮o既飯菜都好 standard,雞軟骨呢類算係「奇形怪狀」o既物體從未o係飯桌上出現過,我甚至都唔知有呢樣野添! 原來雞軟骨係雞o既膝頭哥來呀 ~

第一次食,應該係大個左,第一次同朋友去日式餐廳 ~ 哇蟹   ~ 好野o黎架喎,煙煙靱靱又卜卜脆、鹹鹹地又香香地,真係食唔停口呀!

從來都唔知呢樣咁好味o既小食,原來可以o係屋企自己整,仲幾易整添喎! 無論用焗爐整或者平底鑊都 ok,大家不妨試下!

 

材料 (2-3 人份量)

急凍雞軟骨  1 包  (我在佳宝凍肉市場買)

椒鹽/ 淮鹽 適量 (是但有邊樣就用邊樣喇!)

檸檬  (用來唧汁灑在雞軟骨上調味,但我唔記得買,冇用到!)

 

解凍方法

   千祈唔好用「慢速」解凍方法,因為會腥到無倫!

   用大約 50 度的熱水 + 2 茶匙鹽混和,將急凍雞軟骨倒入,浸 10 分鐘

   隔水,用廚房抹手紙印乾,就可以醃架啦 ~

醃料

  好簡單,就咁用椒鹽/ 淮鹽灑勻表面,醃佢兩三個鐘就得!(醃耐o的入味o的)

製作方法

   亦都係好簡單 --- 今次我用平底鑊整,唔駛落油,就咁用中火慢慢炒佢 15-20 分鐘就 ok 架啦!

心得

   雞軟骨要整到燶燶地先好味,一來脆o的香口o的,二來o的油逼晒出來,冇咁肥膩啊!

   千祈唔好落油,因為出油出得好犀利    睇下下面第二張圖就知 ~ 我諗三湯匙油都有呀!

   上碟前先用廚房抹手紙吸油,再灑上椒鹽/ 淮鹽,就攪掂啦!

   喜歡的話,亦可以用焗盤放入焗爐 (約 160 度) 焗約 15-20 分鐘,期間要翻一翻






37 則留言:

  1. 笨b媽媽 正喎 原來你都鍾意食呢味 我的最愛呀! 以前街市無得賣架 屋企硬係食唔到喇 但以前食雞脾時我已經專食呢粒軟骨嘅喇 而家街市有得賣 我硬係唔執輸喇! 你都識用熱水來解凍 叻喎!

    回覆刪除
  2. 小魚兒:我以前食雞脾,從來都唔知有呢粒野架! 係咯,細個時都唔興呢類大型凍肉店o既,都唔知有咁多得意野賣! 我仲灑左o的意大利雜香草同黑椒,等佢香o的冇咁滯呀!

    回覆刪除
  3. 呵.. 好味啊! 出街食, 20幾蚊先得個少少. 有次我男友買咗個即焗裝, 成個紙袋放入焗爐焗好, 搖幾搖, 食得!

    回覆刪除
  4. too bad,我唔食依味嘢,覺得咬落去好核突,自己啲軟骨會軟曬,打冷震 (又唔見我食肉覺得咬緊自己。。。)不過多謝B媽教路,我可以煮比我honey食,佢好鍾意食軟骨架

    回覆刪除
  5. 雞軟骨,好好食,我當係補充骨膠元咁,雖然唔知得唔得,嘻嘻

    回覆刪除
  6. 打令 到你整我唔食既野,我唔食架! 唔知點解我係唔食架!第一次食完覺得怪怪的就怕左

    回覆刪除
  7. minicorgie:係咯,o係出面食,廿幾蚊係得少少架o乍 ~ 泡泡:咁誇張?其實我都怕食古靈精怪野,昆蟲呀o個o的一定一定唔會食,雞軟骨都算係「正常食品」啦 ~ 整得佢鹹鹹地脆脆地,其實幾好味架! 小倫:我覺得應該得! 雞軟骨含有大量膠質同蛋白質架嘛 ~ honey:喔噢!嗱,咁一人讓一步,你唔好買榴連上我屋企食,我就唔整白粥同埋雞軟骨招呼你!

    回覆刪除
  8. 出面日本餐廳真係掙到笑喎, 賣成$20一串

    回覆刪除
  9. 打令 你整雞軟骨加白粥最多唔食、買外賣、你唔好唔記得我係摷雪櫃能我 但買榴槤上你屋企,你唔食都聞到呀 哼!

    回覆刪除
  10. 我同老公都好鐘意食呢個架!係喎!好耐好耐冇整過喇喎 不過好怕舊骨出面"痴"住果d肥肉呀

    回覆刪除
  11. 露絲公關手記2007年3月4日 下午5:26

    嘩!雞軟骨~ 好野黎架!!! 好易整咁喎,星期二用黎送" Prison Break"先!

    回覆刪除
  12. 我鍾意呀~~ 咦?睇黎我都識整喎!!等我都試下先~~ 真係食左會靚?

    回覆刪除
  13. 原來咁易做! 多謝.

    回覆刪除
  14. 見到咁多油已經唔想食, 我要戒呢d野...(雖然我都鐘意食) b媽: 大少奶唔帶, 我帶!

    回覆刪除
  15. 睇相已經聞到好香咁喇... 食落係咪卜卜聲架...嘻。

    回覆刪除
  16. Madame Pi:其實在出面食野,所付出的有一大部分去左舖租呢 所以有時真係唔係好值! honey:弊弊弊!你一定搶晒我雪櫃o的 Lemon Coke Light o黎飲!一定要收埋佢先! vyvy:你煎/ 焗得佢夠燶就好好多架啦,因為o個舊肥油會融化晒 (你睇我都融左成三湯匙油出來 ) 我試過煎得唔夠,食落去呢 ... 嘩,一大舊肥油咁,好恐怖兼好肥膩! 露絲:係好易整喎 ~ Prison Break 係乜來呀?酒? 李小姐:照睇 ... 食左會靚 ... 仲可能會肥 (因為始終有脂肪),都係要適可而止 大洗慳妹:係好易做的,不妨自己試下 ~ 靚 B:哼 .... 你 ... 你你 ... 咁對我?!

    回覆刪除
  17. 這種小食真係勁好味架

    回覆刪除
  18. 我好鐘意食嫁~ 咩原來唔使炸都得咩?! 太好喇~~~~~~ 我一定會整尼個食啊!!!!!

    回覆刪除
  19. HIHI, 第一次留言, 你好呀!!! 我老公上次都有整過, 不過就有D怪怪味 , 等我叫佢用你既方法先

    回覆刪除
  20. 我都好鍾意食雞軟骨架, 超好味, 我都要搵日試下先 !

    回覆刪除
  21. 嘩,我都超鐘意食呢個~~~你個解凍方法好新呀,係咪特別雞軟骨係咁架? 我有機會一定會試整架﹗thx

    回覆刪除
  22. 有排都唔識整

    回覆刪除
  23. 我細個就好專意食雞軟骨的,媽媽蒸雞呢,屋企人一定留番有雞軟骨那件比我。到大了拍拖識到個老公勁鐘意食雞脾的,初初比雞脾肉我咬我唔要,後來知道我對中間粒骨情有獨鐘時,都會留番比我的,他有時會話好似好可憐咁,食剩舊雞脾骨先比你食......hahha.... btw.......我私人覺得粒雞軟骨都是原裝在雞脾上那些的好味d,給折出來的味到差了一些.......

    回覆刪除
  24. Alice/ Sweet Panda:係呀,真係易整又好味o既小食,口痕起來隨時有得食!正! vanlily:你咪炸佢添呀 ... 我見有o的食譜係沾粉炸,我心諗 ... o的油唔炸出來,仲要沾粉炸,肥膩死 ... 一諗起咬落舊肥膏度個感覺,打冷震呀 大楷 B 媽媽:雞軟骨係有o的怪味啊,所以要用熱鹽水出出水先,同埋用惹味o既椒鹽來醃囉 ~ Pink Pink the Poon:我o係網上面查資料時,見到好多人都話雞軟骨唔可以就咁解凍 (會好腥),要用呢個方法架,所以我咪跟囉 織天使:你試下啦,真係好易! man yi:你講得好好笑呀 ... 真係食剩支骨畀你咬 我以前食雞脾,都冇發現o個度有舊軟骨

    回覆刪除
  25. Christina 小魚仔2007年3月7日 上午7:12

    等我今晚買包雞軟骨來試下先

    回覆刪除
  26. 勁呀! 你d食譜好好, 又清楚又易明! 我都要努力了!

    回覆刪除
  27. 哈~~我試整左啦~~一 take 過成功,多得你教導~~thx ~~

    回覆刪除
  28. OH~~LEE個好good呀~等我試下先~

    回覆刪除
  29. 苯B媽媽...我跟你呢個食譜試整左個椒鹽雞軟骨喇!
    超成功!男友仲大讚好味道添呀!

    回覆刪除
  30. 我今日正咗好好味
    THX

    回覆刪除
  31. 笨b媽媽~ 我睇左你個blog好耐嫁喇~ 你不論煮野食, 同起屋都好叻啊~
    我今次跟你個食譜整左雞軟骨, 超讚啊~ 連班蛋散都話好味!
    你今晚夜d過來睇下喇! thx!

    回覆刪除
  32. 好多謝板主,真係又簡單又方便呢 !

    回覆刪除
  33. 真係好簡單喎~我男友好喜歡吃雞軟骨的,原可以自己整。謝謝你呀

    回覆刪除
  34. 如果加點腰果仲正!!

    回覆刪除
  35. 好好味..我岩岩先整來食下..果真簡易又好味..真係要多謝你 ^^

    回覆刪除
  36. 點解你D雞軟骨咁細粒既..我又係佳寶買..但係勁大粒囉=.=勁硬勁難食

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: