2007年3月18日 星期日

令我最自豪的 ... 炒飯必殺技 (附笨 B 媽媽示範炒飯 video)


9 號仔o既笨 B 媽媽,經常畀 1 號仔o既超級挑剔王笨 B 爸爸踐踏* 

 ,攪到冇晒信心,成日覺得自己煮餸好不濟  shy  ~ 經常一臉無奈  ~

(*笨 B 爸爸按:咩挑剔王呀!完美主義丫嘛,唔彈下,邊有進步架
!) 

 

好在,一碟冷飯提醒左我,其實我炒飯 ...

好掂架

 

 

想當年仲係同屋企人住時,間唔中陳師傅陳師奶出左街時,都要整下野畀細佬食 ~ 我o既炒飯,可以令相當偏食o既細佬,成鑊食晒架!我可以炒到o的飯「粒粒跳」架 ~  諗番起都自豪-ing

 

今次出手,笨 B 爸爸都死o係我手上!又係成鑊清晒呀 ! 所以,呢篇o的語氣係有少少「嚣」架,大家暫時忍受下啦

 

未講點炒前,先來睇下相:

 

【下圖】遠睇 --- 掂

【下圖】近睇 --- 更掂    o的飯一粒粒分開、唔油膩、調味o岩o岩好,真係好正架  ~

【下圖】下面呢碟,已經係第二日再做的了

(因為有人食過返尋味,話我上次整得太少
 )  應笨 B 爸爸要求,今次炒的酌量落多少少油,因為佢要再香口o的喎 !話時話,陳師傅整畀我的 DIY 辣椒醬真係無敵,平時已經用來點野食、醃肉用,原來用o黎加落咖喱炒飯度 ... 係天下無敵架!

【下圖】第二次炒o既係「香辣咖喱豬頸肉炒飯」,其實炒飯用咩材料都得,基本上係消滅殘餘物資o既最佳方法!

【video】笨 B 媽媽示範炒飯 


【香辣咖喱豬頸肉炒飯】二人份

材料:

急凍豬頸肉  半盒 (約 150 克)

飯   3 飯碗

洋葱  半個切粒

雜豆  1 飯碗

蛋 1 個打散

辣醬  適量

豉油  適量

油  適量

咖喱粉  適量

做法:

1. 豬頸肉趁仲o係急凍狀態時切粒 (易切o的),解凍、用鹽、糖、豉油稍醃半小時

2. 先炒熟豬頸肉備用。炒到微焦最好

3. 平底鑊中下油 2 茶匙,炒香洋葱粒。洋葱粒半透明時,加入 2 湯匙咖喱粉炒半分鐘至香味四溢

4. 再加 1 湯匙油 (因為洋葱粒和咖喱粉已索晒o的油),將飯倒入

5. 勤力地炒飯-ing  (請參看 video) 炒到飯粒鬆散。如果覺得咖喱味未夠,可以一邊炒一邊再落o的

6.  加蛋 --- 飯中間挖一個穴 (請看 video),加油、加蛋液、炒到蛋液半熟,將旁邊的炒飯撥入,繼續努力地炒

7.  加雜豆 --- 雜豆呢o的又易熟又易變色o既配料,係臨完成前兩三分鐘先好落,否則炒到老左唔好睇

8.  加 1-2 湯匙豉油調味。喜歡食辣的可以加埋辣醬。快速拌勻。攪掂!

 

【笨 B 媽媽炒飯小秘訣】

   好多人話炒飯要用冷飯、要用絲苗米 ~ 但其實用新鮮煮o既飯都得,只要煮o既時候落少o的水 (約少 10%) 兼焗佢一陣等飯粒乾身o的 ,就可以用來炒架啦!我用 1:1 的紅米和油粘米,效果一樣好!

   飯粒一定要乾身、要鬆。我習慣炒o既時候先順手整鬆o的飯粒,但如果唔熟習,可以預先整鬆o的飯粒才拿來炒 (將冷卻左o既飯放入膠袋裏,然後用湯匙或飯勺壓散,咁o的飯就唔會周圍飛啦 !)

   用來炒飯o既材料要少水份,否則會攪到o的飯黐埋一舊!正如我上面呢個炒飯咁,o的豬頸肉都要預先炒熟左先架,一來香口o的,二來減少水份

   炒飯o既鑊要夠熱。我全程用中大火 (所以要好勤力地炒 )。油量未必要好多,但一定要塗勻成個表面。 

   加蛋o既時候個鑊要夠熱,仲要炒到半熟先好混和飯粒,否則會黐埋一舊 (video 中有示範)

   正如我在 video 中所講,炒飯最緊要勤力 !要 keep 住不斷咁炒,兼且一邊炒一邊整鬆o的飯粒。

   做咖喱炒飯時,o的咖喱粉先用洋葱粒/ 乾葱粒炒過,會香好多架

 

 

 

40 則留言:

  1. 連笨b爸都讚...一定好好味嫁!!! 用咖哩炒飯??? 新野喎~ 仲要係健康match既紅米飯tim!!!!

    回覆刪除
  2. 我也很想吃啊~!

    回覆刪除
  3. 我係新人,多多指教@@ 妳炒飯好得呢!! ^^

    回覆刪除
  4. 真係睇見都流哂口水,我既豬先生就無苯b爸咁好喇,因為每次我問佢好唔好食,佢都係OK喇<--呢句已經係最好喇,因為好多時都係差D乜、多左D乜.一直我都有個大計,搵日唔煮飯佢食,等佢無野可以再挑剔

    回覆刪除
  5. 冬菇:你今晚好快啊 話時話,我又係用你盒印度咖喱粉炒的 (雖則佢話 chicken masala,但我好 flexible o既!) 好香好好味呀!超讚 ~ Maggie:唔講得笑 ~ 呢碟野真係掂 ~ 炒o既時候已經令我自己流晒口水 ~ 但整好後,我只食左少少,因為畀笨 B 爸爸掃晒! pp:觀迎光臨啊 ~ 多謝你支持我呢個初班煮飯婆 ~ 多o的o黎交流交流喇 莎莎:哇哈哈 ~ 笨 B 爸爸好衰架,如果唔好的,佢會彈到我飛起;但好味的 (如呢個炒飯),佢會話 ok,但狂風掃落葉食埋我o個份 ! 我投訴話,你畀個「激昂」樣讚下我得唔得,跟住佢就整個咁o既樣出來啦 ~ 假到暈

    回覆刪除
  6. 嘩,個賣相好得窩 ~~ 我見到有紅米?真係未試過炒紅米飯窩 ~~

    回覆刪除
  7. Qoo 圖案o既碟~~ 你次次都cup 到甘鬼靚,我都5 捨得吃啊... 我尋晚剛剛好吃炒飯. =,= 同你碟真是差好遠啊 我碟也油到死,好咸, 材料一般..(外賣) 如果自己整的話,就會一pat 炒飯 期待你的recipe..

    回覆刪除
  8. b媽 好正喎! 期待緊你的經驗分享呀 我次次炒飯水準都好飄忽 希望睇過你的示範後 以後都能炒到粒粒跳的炒飯喇!

    回覆刪除
  9. Christina 小魚仔2007年3月19日 上午2:00

    好期待你個食譜呀 ~~~ 真係整得相當有水準。

    回覆刪除
  10. 我都係一號仔, 不過我唔覺得自己好挑剔喎.

    回覆刪除
  11. B 媽 ~~ 真係喔 ~~ 真係粒粒彈喔 好得o既一個炒飯阿 o甘o既粒感 真係好好食 有無加辣椒仔食阿 我食炒飯一定要加辣椒阿

    回覆刪除
  12. 真失禮, 想問咩叫1號仔同9號仔呀??? 你煮嘢食都唔得, 咁我咪仲失禮.....講笑咩???

    回覆刪除
  13. 呢個是唔是你話笨b爸爸食完讚你果飯呀! 真是炒得唔錯呀!

    回覆刪除
  14. haha,好似好好味喎

    回覆刪除
  15. 果然炒到一粒粒分開架

    回覆刪除
  16. 一直都好欣賞陳師傅既辣醬,每次係妳個Blog一見到就口水流 今次用埋黎炒飯,一定野味到停唔到口呀....真係超讚呵

    回覆刪除
  17. Mrs Kwong:本來唔係特登用紅米炒飯,只係第一次做時,咁o岩有碗 1:1 紅米油粘米冷飯,咪攞o黎炒下囉 ~ 效果又幾好喎!所以第二次整,係特登煲左煲新鮮飯o黎炒架 一樣咁正! poppennysun:你又講得冇錯喎 ~ 出面o的炒飯,唔係間間整得好食,一係好油、一係好乾、一係唔夠味 ... 所以我好少o係街度食炒飯架 小魚兒/ 小魚仔:我 upload 左條 video,你睇下啦 ~ 炒飯只要鑊熱、手快、勤力,就好易炒得好架啦 靚 B:哈哈,笨 B 爸爸都係咁自稱喎 影子:有啊 ~ 我點會唔加辣呢 不過我唔係落新鮮指天椒,而是陳師傅的私房辣椒醬 ~ 絕頂好味 ~ pingu:哇哈哈!我失手o個o的冇擺上來o者 (不過都好似擺過一兩次,e.g. 冇交流的南瓜蒸排骨 記唔記得?) 珍妮仔:是也!不過佢都係讚得好含蓄,只係話「幾好」,要我逼先擺出一副激昂樣 Rebecca:炒飯係我少數拿手o既菜式,真係幾 ok 架 Alice:水份 & 火候控制得好,o的炒飯就會粒粒分明架啦 莎莎:唔好講笑 ... o的辣醬真係 ... 好好味 ... 真係冇胃口時聞到都會醫返好 !我有時會變態到就咁「筆」一羮o黎食架

    回覆刪除
  18. 笨 b 媽媽把聲好誘人啊~~~

    回覆刪除
  19. 黃夫人:下?咁咪變左「誘人的炒飯示範」?! ...

    回覆刪除
  20. 苯B媽媽果然持家有道,將各樣殘餘物資增值再增值,變成一樣又一樣好好味的食物。正正正﹗

    回覆刪除
  21. 嘩~ 你好勁呀, 好多野都識整黎食, 最勁係用d 殘餘物資都變好味野吖嘛。見到個炒飯我都好想試吖... 佩服佩服!!

    回覆刪除
  22. b媽 掂喎! 等我又黎炒炒先! 想問你煮紅米飯有先浸水的嗎? 我次次都要浸兩個鐘 如果唔係就煮唔透 但咁就令我成日都煮唔到紅米飯 因為放工回來再浸兩個鐘就真係太夜了 如返工前浸又浸太耐 煮出來又唔好食!!! 點算好呀!

    回覆刪除
  23. Angel/ 火柴貓:哈哈,其實呢o的只係雕蟲小技,我諗煮開飯o既人,個個都叻過我呀 我係初班煮飯婆丫嘛,難得搵到樣野叻,梗係要攞出來大肆宣揚下 小魚兒:可能我鍾意有口感,所以我從來唔浸米o既 ~ 笨 B 爸爸煮的話,佢就會浸半個鐘至 1 個鐘 ~ 其實煮紅米時只要稍稍落多o的水 (比普通米多 10%) 飯熟後焗得耐少少,如果有 10-15 分鐘,咁都會好煙靱好好食架! 當然,如果你攞o黎炒飯的話,就唔好浸米啦!否則o的飯太軟,好難炒得靚呢

    回覆刪除
  24. 笨b媽媽, 你好得呀! 一派賢良淑德

    回覆刪除
  25. 你好pro呀, 真係好似都市閒情咁教人煮餸 我老爺以前做餐館, 有秘訣, 佢教用冷飯, 加鹽水撈下先放雪櫃, 炒時真係粉粉分開唔痴架, 唔洗炒到咁攰~ 咁炒飯d調味就返, 唔洗落咁多鹽or soy sauce. 笨b媽媽, 你又試下啦~

    回覆刪除
  26. 圖文並茂~~~ 勁呀!!! Cake又学到嘢~~

    回覆刪除
  27. Just looking at it makes me hungry.

    回覆刪除
  28. 原來平日我的炒飯次序亂晒架, 我重先炒熟O的蛋, 再雜菜粒..才加飯, 這個睇落去真係好好食啊, 不過好似多油左少少 (一時又話少油一時又話多油, 哈~! )

    回覆刪除
  29. 嘩 ~ 苯B媽媽好勁呀 !!

    回覆刪除
  30. Jessica Tak Tak Lui2007年3月20日 上午5:11

    學會了, 謝謝; 今晚馬上即席揮毫.

    回覆刪除
  31. b媽 唔該晒 其實我都有落多咗水嘅喇 不過煮好後就無焗 下次試吓焗吓佢睇睇得唔得先!

    回覆刪除
  32. I LOVE 笨B媽媽! 其实.................你应該叫「 叻B媽媽」

    回覆刪除
  33. 露絲公關手記2007年3月21日 上午6:50

    單手邊抄邊講邊拍都得? 神乎奇技呀

    回覆刪除
  34. 專業炒飯高手呀!!!

    回覆刪除
  35. 笨b媽媽, 你好叻呀~ 其實龍少某程度上都好似笨b爸爸, 我整咩佢彈咩!!!

    回覆刪除
  36. 太好了~~~ 發現左你個blog , 等我平時煮飯可以有多D 新餸菜! 唔使諗到頭都大埋

    回覆刪除
  37. 你好叻呀!!我覺得lee個炒飯,好方便整來帶飯返工食啊~~

    回覆刪除
  38. 由細到大, 我都好鍾意食炒飯架, 自己都有炒, 但就一般, 你解釋得好詳細!等我偷下師先!

    回覆刪除
  39. 咦~ 我又黎搭下訕先~~ 我都好鐘意食&煮炒飯架~~ 話時話, 呢樣係我第一樣學識整既食物!! 因為阿媽話, 叫一個中二學生煮晒成餐飯就冇可能架啦~ 就教我整炒飯, 等我肚餓時可以有野食丫麻!! (自己煮自己食!) 我都有個tips~ 就係如果煮飯時落左太多水, d冷飯即使雪過夜都好黏, 好難炒開粒粒分明, 但我發現, 只要雪時不要包到咁實, 留返個開口, 等個雪櫃抽走d飯既部份水份, 就好易整到粒粒分明架啦!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: