2007年3月5日 星期一

【練精學懶 - 10 分鐘菜式】蝦膠蒸釀豆腐

雖然我呢期乖左,肯下廚煮下飯仔 ~ 但壓根兒我都係一個懶煮飯o既人 

  (仲係一個幾誠實o既人添 )  所以,有得揀o既話,我都會盡量煮o的簡單菜式架 ~ 最好洗洗切切o既時間都慳返o個o的呢 ...   複雜o個o的,留返出街食啦 ~ 都要畀o的機會出面o的食肆賺我地錢,促進下經濟繁榮架嘛,係咪 ~

 

今晚整左個蝦膠蒸釀豆腐,前後唔駛 10 分鐘,真係快靚正健康兼清淡呀 ~ 讚!

註:蝦膠係o係北河街某街市魚檔買的,$16 得四兩,唔平呀 ~ 不過呢檔o的蝦膠真係好香
 ~

(之前整露荀蝦卷時都提過呢個魚檔)

【上圖】蒸好後 - 求其用蠔油、糖、雞粉、生粉整左個獻汁淋上,已經好美味  ~

【上圖】未蒸前 - 只要將一磚豆腐切 12 件,然後將蝦膠平均搽好,用大火蒸 5 分鐘就攪掂

【上圖】笨 B 爸爸明天的飯盒菜

【上圖】今晚又食綠豆沙啦!今次食凍o既,仲淋左少少

前幾日整 Tom Ka Soup 用剩o既椰汁落去,好味!

30 則留言:

  1. 蝦膠蒸釀豆腐好正呀 , 一定好味好震~~~~~

    回覆刪除
  2. 甘好餸我過黎食飯啦!

    回覆刪除
  3. 個飯盒好好味呀,笨B 爸爸真幸褔

    回覆刪除
  4. 真是好簡單喎 d 蝦膠 & 豆腐 b4 蒸之前係唔係唔洗調味嫁 e.........笨B媽媽你拎唔拎飯盒 嫁 ?

    回覆刪除
  5. Karen:係啊,呢個餸又簡單又好味架! 珍妮仔:你唔嫌遠的話,無任歡迎 ~ 不過要忍受一下我呢o的「初哥」o既不穩定水準喎 小曲格格:哇哈哈 ~ 笨 B 爸爸都成日煮飯畀我食架! 你睇番o的舊 post,好多都係佢煮的 GG:o的蝦膠同豆腐都係好新鮮的,所以鮮味已經夠晒,我冇再另外醃佢地架啦 (話時話,如果醃o的豆腐,唔知會唔會勁出水 ) 我只係蒸好後整左個獻汁淋上面,已經 very good 話時話,我好少帶飯架,懶攞住個飯盒周圍行呀

    回覆刪除
  6. 打令 有得揀o既話,我都會盡量煮o的簡單菜式架 ~ 最好洗洗切切o既時間都慳返o個o的呢 ... 複雜o個o的,留返出街食啦 ~ 都要畀o的機會出面o的食肆賺我地錢,促進下經濟繁榮架嘛,係咪 ~ 呢句說話不斷見你重覆又重覆,其實你係懶豬、無情趣悶蛋 到你要出街食又話要清淡 你一定要接受【如何變成大少奶之煮得出色、食得招積、少奶超值既培訓課程】

    回覆刪除
  7. P.s不過你今晚個菜式幾好,今星期我擇日試下 你知嗎?我鍾意食蝦膠架

    回覆刪除
  8. 紅米好健康呢,我屋企都係食紅米架。

    回覆刪除
  9. it's really healthy and i am totally your "fans".... i like simple, easy.... and healthy food! if you can cook more 10 minutes meal.... Rachel Ray (30 minutes meal) from Food Network may have to close down and hire you instead!!!!

    回覆刪除
  10. so nice!

    tofu is good for your health coz it has calcium!

    回覆刪除
  11. 更係啦,放工返來都唔想郁啦,重要洗洗涮涮唔好搞 ~~ 所以我的忠旨同您一樣 ~~越簡單越好! 伊!甘您有無發現元朗街市有無蝦膠買呀?好似好彈呀窩!

    回覆刪除
  12. 對我黎講都唔簡單ge la!!! (我都係老實人) wahahha

    回覆刪除
  13. 我喜歡吃紅、綠豆沙多些~~~ 唔該,兩碗紅、綠豆沙外賣丫,快~~~~

    回覆刪除
  14. 簡單d , 清淡d, 人都健康d 嘛! 做d大複雜嘅菜式, 洗鑊都洗死你剌

    回覆刪除
  15. DD餸煮10分鐘就得﹐太好了! 係我地嘅福音啊!! 哈哈

    回覆刪除
  16. B 媽 ~~ 今餐我好鍾意呢 我極度喜歡食豆腐呢 食豆腐o既份量好驚人呢 見到你碟蒸豆腐 好掂呢 係我這個懶人最佳參考呢

    回覆刪除
  17. 笨B媽媽....叻叻啦!!! 我媽咪煮餸都好快!!! 係我煮得慢咋...唔... 唔通我煮嗰啲太複雜??

    回覆刪除
  18. 丫~ 妳煲綠豆沙會會o係佢滾起d壳時loud起d殼昵 ?

    回覆刪除
  19. 笨B媽媽, 你好叻呀, 成日都可以諗到D咁好嘅餸! 我就真係諗到頭爆都諗唔到喇~~ 到時記得預埋我新屋巡禮喎!!!

    回覆刪除
  20. 大少奶:你令我諗起 「My Fair Lady」 + 「穿著 Prada 的惡魔」呀 我都好想做大少奶耶 ,不如你地獄式培訓下我啦 ~ 我梗知你鍾意食蝦膠,你整露荀蝦卷時已經講過啦 ~ 話時話 ... 我出街食時「雖然把口話要食得清淡」但次次 turn out 都暴食架 ! 魔鬼之料理達人:紅米朋友你好 ~ 紅米又健康又有益又有咬口又好味,簡直要大力推廣添呀 ! Alwen:哈哈哈,我都話我可以開番一輯「摩 can cook」,專門教o的練精學懶o既菜式 ! Bagel:豆腐真係好好味,我係o係街市買熱辣辣的新鮮豆腐,仲正呀!好香豆味架 ~ Mrs Kwong:我未變元朗師奶仔耶 ~ 所以仲未參觀過元朗街市 你快o的去巡下,有發現記住話我知 ~ 尤妮斯:咦,咁 ... 似乎你都 ... 唔下廚乜滯喎 你係「促進經濟繁榮黨」黨員來? 屎佬:咁遠,DHS 都蝕晒水啦 你叫噢師奶煲喇,佢都係時候學番兩手啦 ~ Madame Pi:哈哈 ... 我一攪親複雜菜式就會令到廚房地震 ,真係洗仲耐過煮架 提子太太:哈哈 ... 我就最鍾意呢o的簡便菜式架啦 影子:你初一十五食素的話,豆腐必然係你至愛呢 因為變化好多、營養高又好味呀 Yan Yan:梗係啦!你煮o的野超班o既! 我都唔知幾時先會煮o的咁複雜o既野啊 山口:估都估到 ... 唔會啦 我直頭冇呢個概念添呀 ... 下次可以試下!(但其實豆殼含有豐富營養,食埋更加好啊)

    回覆刪除
  21. 咪咪吉:到你要煮o既時候,你就會諗得出架啦 ... 仲會學我咁練精學懶

    回覆刪除
  22. ar...笨b媽媽睇唔山你都幾...懶喎~~ 我又要參加【食得招積、少奶超值】課程啊

    回覆刪除
  23. 好開心睇到你個食譜~~ 今晚就試吓整!!!

    回覆刪除
  24. 個飯盒咁細,佢夠食架啦?

    回覆刪除
  25. vanlily:咩懶呀 ... 我 ... 識得用最少o既時間做最多o既野出來嘛! Flying Cupcake:好呀 ~ 你試下,真係好易整又好味架 Alice:夠架啦 ~ 呢個飯盒佢自己買的,唔係我買畀佢架 (冇虐待佢)

    回覆刪除
  26. 我整咗啦!!! 加拿大冇現成蝦膠唯有自己剁~~ 真係好好味呀!!!!! 又簡單~~ Thankyou笨B媽媽

    回覆刪除
  27. 笨B爸爸都好細食喎, 個飯盒咁細, 佢夠食咩?

    回覆刪除
  28. Cupcake:查實香港都唔係度度有蝦膠賣啊 ~ 咁好彩我屋企附近街市有一個魚檔有自製蝦膠,仲鬼咁好味 o岩晒我呢o的練精學懶o既初級煮婦! win win 夫人:我曾幾何時都問過笨 B 爸爸呢個問題 (因為 我覺得呢個飯盒唔靚又唔防漏,想買過一個畀佢),但佢自己話夠食架 ~

    回覆刪除
  29. 紅綠豆沙,係咪煲滾水dump晒d豆落去煲番佢三五七個鐘就得架喇??

    回覆刪除
  30. 噢師奶:唔駛咁耐啊!洗乾淨o的豆 (我唔興浸水o既,懶 ... 如果浸過夜會快o的煲林) 就咁加水煲,煲 1 個鐘後加冰糖再煲半個鐘就攪掂架咯!二人份量我會落 200 克綠豆 (都幾多下!煲起有兩大飯碗杰撻撻) 由於我係用細煲煲的,所以一次過落唔到咁多水,中途見佢冇乜水我又要再落水加啦!用大煲會方便o的,好似煲粥咁煲而已 ~ 有o的朋友食得 sophisticated o的會在煲的時候趁滾起隔左o的綠豆殼,但我唔會咁做,一來懶,二來綠豆最清熱解毒o既地方就o係o的豆殼度啊

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: