2007年3月31日 星期六

元朗街坊介紹的好野 --- 台灣麵

好似好耐冇講好味街飯啦 ~ 哈哈!其實為食o既我地,邊會放棄周圍搵好野食o既樂趣呢

 

每次講起元朗美食,各位元朗街坊就會傾巢而出推介佢地o既「美味推介」架啦 ~ 所以我地每次入去,都唔愁冇地方食晏咯    話時話,我地仲有好多間未試啊,好似亞 B 講o既國記粥店喇、小胡子講o既台灣牛肉麵喇、饅頭媽講o既避風塘炒蟹喇 ... 等等 ... 元朗簡直係將香港美食天堂呢個稱號發揚光大啊!

 

今日又去左元朗食晏 ~ 經過大馬路o既養和堂,仲順手買左支馬蹄甘蔗水解渴 ~ 真係好有料到喎,好好味 !飲過返尋味呀!

 

【好味街飯推介 - 台灣麵】

地址:元朗教育路 37 號

電話:2470-7577

備註:我地見到餐紙上仲有另外三間分店,分別o係元朗擊壤路、灣仔道 & 銅鑼灣景隆街

【上圖】佢地冇標榜o的麵係唔係手工麵,但食落口感好好,我覺得似係新鮮打架喎   麵同配料都相當唔錯!話時話,o的台式飲品都幾好味架!


【上圖】教育路呢間台灣麵有好多卡座,坐得幾舒服啊!


【上圖】呢排食得咖喱多,覺得有o的燥 ~ 買支馬蹄竹蔗水潤下喉先 ~ 養和堂的唔錯啊!甜度o岩o岩好

2007年3月29日 星期四

【清心潤肺 + 消暑解渴 + 超級容易】紫背天葵凍飲

天氣一熱,我又忍唔住猛咁飲凍野啦

  雖然經常飲凍野唔係幾好 (容易濕重/ 經痛的人不宜),但 ... 我地呢o的血氣方剛o既年青人,好難忍架嘛     

 

如果我唔係太懶,其實都有好多消暑解渴又有益o既飲品o既 ~ 上一年夏天介紹過美白健脾去濕o既

檸檬薏米水,等我再醒多樣好味又健康o既飲品畀大家喇 --- 最緊要易整丫嘛!知啦 ~
  呢個紫背天葵凍飲,20 分鐘攪掂,難度 0.2 分!

 

【紫背天葵凍飲】2-4 人份

材料 

紫背天葵  一飯碗 (唔記得左磅下幾重 ... 好輕架o乍。話時話,藥材店有售)

水  2.5 公升

冰糖  4 湯匙或隨個人喜好

檸檬  隨意 (可以唔加)

做法

1. 紫背天葵略為沖洗,隔水備手

2. 大鍋內下紫背天葵 + 水 + 冰糖,煲 15 分鐘熄火由得佢浸下 ~

3.  攤涼後隔渣、放入雪櫃雪凍就飲得!鍾意o既話可以加片檸檬調味 ~ 攪掂!

(o個 0.2 分難度,畀多左佢添啦

)

冷知識:紫背天葵原貌 ~ o係 google 摷左十幾版先摷到!

紫背天葵屬秋海棠科,是一種矮小的草本植物,長在陰暗濕潤的山崖上,葉面有毛,呈深綠色,葉背紫色。紫背天葵能清熱解毒,潤燥止咳。用開水沖泡,其色紫紅,味微酸,清香可口,能消暑除熱,又有解酒之效。

同場加映:今日忍唔住去左二記 (二德惠) 八卦八卦 ~ 畀我見到梅子粉喎    尋晚食番石榴時仲若有所失咁話如果有梅子粉就好啦 ~ 點知今日畀我買到!好味 ~






2007年3月28日 星期三

【我的身體流著咖喱血...】簡易青咖喱薯仔雞翼 (附食譜)


冇錯 ... 又係咖喱  ... 因為要清左前幾日煮

白咖喱雞扒時剩下的 200 毫升椰汁 + 被我冷落o係廚櫃裏、五月到期o既青咖喱醬丫嘛!

第一次煮青咖喱,但味道好對路啊

!大家不妨試下!

 

【簡易青咖喱薯仔雞翼】 二人份

材料

青咖喱醬一包 (第一次用佳廚牌,但覺得好好味啊)

椰汁 200 ml (多點、少點也沒關係啦!)

洋蔥  半個  (乾蒽粒都可以!)

泰國金不換  少許  (我在街市的香草店買了 $1。去泰式小店當然也有啊。呢個係重點材料,一定要有啊

)

辣椒粉  適量

油  適量

雞翼 8-10 隻

薯仔 1 個

做法:

1. 雞翼先解凍,用糖、鹽、豉油醃 1 小時以上 (我仲加埋辣椒粉 )。薯仔切大件。

2. 雞翼和薯仔用 180 度焗爐焗約 15-20 分鐘至燶燶地,或用鑊煎香亦可。我貪用焗爐可以逼o的油出來呀。

3. 平底鑊下一湯匙油,炒香洋蒽粒。加青咖喱醬炒 1 分鐘至香氣溢出。

4. 加椰漿煮滾。

5. 加雞翼和薯仔炆 10-15 分鐘 (耐o的都得,不過我冇咁多時間   又唔鍾意o的雞翼爛晒咁)

6. 臨熄火前加金不換葉和辣椒粉調味,攪掂!

 

同場加映:菜湯必勝法

   用白菜仔滾o既菜湯最甜美!

   切 3-4 片薑拍鬆,先炒香白菜仔,然後先加 2 大湯碗水滾湯,可以去除草腥味和菜仔的寒涼。只要加幾片魚片和少少豉油調味,啖湯已經好鮮味!


今晚水果:番石榴

番石榴含有非常豐富o既維他命 C,健脾消滯,係飯後良果。仲有降血糖療效,非常適合糖尿病患者食用。

冷知識 - 食得多番石榴會便秘?!

Yeah ~ 因為番石榴含有鞣質,有收歛止瀉o既作用,所以食得太多可能會引致便秘啊 ~ 最好是去核吃啦 (好似我咁,切埋畀我家丁笨 B 爸爸吃,對佢幾好呀 ) ~


如何在 Yahoo Blog 內加入 Video

有好幾位 blog 友 (包括我的好姊妹山渣) 問過我如何將 Video 加入到 Blog 裏

 ~ 其實 Yahoo Blog 已經介紹得頗詳細,不過 ... 雖則已介紹得幾清楚,我知道山渣係唔會睇得明白o既   因為佢習慣要我「真人發聲」先明架  ~ 所以我製造左個「特備節目」畀佢,順手 share 埋畀大家睇喇

 

笨 B 媽媽小貼士:

   一般用 DC 拍的影片都係 MP3 或 MP4 格式,都已經 ok 架啦。其實 Yahoo Blog 仲可以接受其他格式的 (

必須小於 100 MB 且必須是 WMV, ASF, QT, MOV, MPG, MOD, 3GP, 3GP2 或 AVI 格式及含有音訊的Video)

   由於檔案 size 上限是 100Mb,兼且免得 upload 太耐,大家拍片時可選擇較低像素 (我用開 320x240  30fps,純粹 for blog 用,擺上電視睇應該幾鬆下)

   upload 後的 video 不可以即刻用,要等 thumbnail (預覽圖) 出左先可以用來插入網誌。我的示範影片中有介紹點做。至於幾耐先出到 thumbnail,要視乎你段片的 size。有時幾個字就得,有時等成半日呀 ...

 

【Video 示範 1】如何上載影片


【Video 示範 2】如何將 Video 加入到網誌中


 

【圖一】如何加入影片 - Yahoo Blog 的介紹

【圖二】可以選擇「影像示範」,都係 video 式介紹來的呀!


 

同場加映:

我最近發現 Yahoo Blog 有個新加入的功能幾好,介紹埋畀大家先 ~ 如果大家有o的 blog 唔想全世界都睇到 (e.g. 含有私人相片的) 可以選擇「私人網誌」,然後 define 返係畀「家人」抑或「朋友」睇的。


咁點樣加人地入你個 personal circle 呢?嗱,你可以o係朋友的網誌右上角 click「加入 blog 友名單」

然後 define 番佢係「家人」抑或「朋友」,咁就得架啦!


 

 

2007年3月27日 星期二

西藏蟲草有乜好 Part 2

今日笨 B 爸爸問我:「喂!你上次寫左個蟲草介紹

Part 1,冇左下文嗱?!

嘻 ... 嘻 ... 我記得架 ~ 不過因為呢樣野我唔食o既,所以冇咁 enthusiastic 之嘛 ...   點知屋企有個「訓導老師」會逼我交功課!  費時佢日哦夜哦,等我快快手寫埋佢先 ~

 

重溫一次 Part 1 講過o既 topic 喇 ~

Q1:點解o的蟲草咁貴?平平地o既都要成二千幾蚊一兩?

Q2:蟲草有乜野功用?o岩邊o的人食? 

Q3:西藏蟲草點解貴o的?有乜好?點分辨?

 

好 ~ 繼續我的蟲草 notes ~

Q4:真o既蟲草有咩特徵?

   真蟲草帶有好香o既菇味,如果味道好淡,可能係已經浸煮過 (粹取成份) 然後再曬乾攞o黎賣o既蟲 草,o個o的得番好少功效架

   用口咬碎來試的話,感覺會似食生o既毛豆一樣,好綿好粉,仲會愈o趙愈香,帶點好似雞肉o既香味。假蟲咬落去唔會咁粉,冇肉香味,仲會有o的泥味添!

   真蟲草掐落去會有彈性,有o的蟲草掐落去是硬的,千祈唔好買,因為是浸了鉛水 (重金屬) 用來增加重量的!(笨 B 媽媽按:重金屬中毒好大件事,o個o的真係無良商人 !)

   真蟲草o個條「草」表面係青青黑黑咁色,但搣斷後,個切面是白色的。如果假蟲就冇呢個特徵。另外,真蟲草條草比較靱,但假o既就易斷o的

  真蟲草一共有八對腳,近住個咀有一對、中間四對、近住條草有三對。蟲身會有一節節清晰而對稱o既紋理,假蟲做唔到咁細緻,所以細心o的睇,其實都唔難分辨。

 

Q5:買左蟲草之後,點樣保存?

   蟲草好易發霉,香港又潮濕,所以買返屋企以後,一定要放冰格

 

Q6:蟲草點樣食?

   一般傳統食法都係燉雞、或者同其他補益中藥一齊用,不過因為燉完之後營養都未出得晒,所以最好食埋條蟲,以免浪費

   唔慣食條蟲o既人、或者冇時間燉來吃的,可以考慮將蟲草磨粉 (可同時加入洋蔘或其他藥材),每日食一茶匙,持之以恆,功效都相當唔錯

 

Q7:聽講而家野生蟲草唔可以入口,咁出面o的藥材店點解仲有得賣架?

   上年年底頒佈左個瀕危動植物條例,有一系列o既野生動植物入口香港都受到管制,一定要攞左瀕危證o既商戶先可以入口,並非係人都唔畀入口,否則出面o的蟲草店執晒笠啦

 

Q8:出面o的蟲草咁多 grade,係咪愈貴愈大條愈好架?自己食,買邊o的好o的呀?

   其實而家都有晒科學驗證,大條同細條的冬蟲草成份含量分別不大呀。如果用來送禮,當然大條o的會體面o的喇。但自己食的話,我建議買一兩約 120 條的貨色 (如上圖) 抵食o的。

 

後記:again ~ 呢o的都係我 jot 低再重寫出來的 notes,如有遺漏,請多多包涵

Linkwithin

你可能對以下文章有興趣: