2007年2月24日 星期六

開心拜年遊記 (三) 羨慕-ing & 肉赤-ing @ 澳門


各位:我地返來啦 ~~~

 

原來我個 blog 畀 yahoo 擺左上主頁,唔怪得知喇!不枉我半年來咁勤力咁寫左近四百篇 blog 呀下,賺左個勁正廣告位 !啊呵呵呵  

今次澳門之旅純粹為左拜年   (幾懶都好,婚後第一年都要帶笨 B 爸爸出來示下眾畀o的鄉親父老見下o既  ) 所以預先冇準備暴食行程,都係由住在澳門的堂兄發板,真係要多謝一下佢地o既熱情款待呢 Thanks   為免失禮,我都唔係下下攞部機出來影相,所以只影左其中一餐而已 ~

 

講返主題,今次澳門拜年之旅,我點解又羨慕-ing 又肉赤-ing 呢?咪就係因為羨慕堂兄堂嫂年紀輕輕 (堂兄仲細過笨 B 爸爸一年!) 就已經有左一對分別 8 歲和 5 歲o既小朋友囉 ~ 佢地話澳門人結左婚一定會好快生仔,仲要至少生兩個!   見佢地一家人樂也融融,我地都要快o的計劃下啦

 

至於肉赤-ing,係講緊我o者 ~ 笨 B 爸爸唔覺o既  ~~~ 我地又o係何生o個度 「deposit」 左二千幾蚊啦!  笨 B 爸爸出門鍾意賭下錢,頂多會用二三千蚊,但好有節制,佢當係娛樂費o者 ~ 不過我太「賢良淑德」,我係覺得好肉赤架  ~

 

話時話,家陣o的賭場多左好多自助賭搏機,隨左各式各樣o既老虎機之外,仲有o的電腦控制o既賭枱畀你玩賭大小、俄羅斯輪盤同百家樂等 ~ 賭注細好多,如果當娛樂,都真係可以磨好多時間架 ~ 我好想偷影,不過唔敢,因為四圍都有閉路電視,我唔想畀o的彪型大漢拉入後巷揼呀!

 

今晚去左氹仔官也街o既誠昌飯店食晚飯,o的水蟹粥好好味呀!

【上圖】由左至右、由上至下

誠昌飯店外貌、炒花甲、水蟹粥 (好多蟹膏!)、豉汁蒸大鱔 (送飯一流!) 酥炸墨魚丸、荷葉北菇蒸雞 (非常香!) 、白灼膶片 (好新鮮!)、炒伊麵 & 田雞粥

【上圖】誠昌飯店介紹

【上圖 + video】為左查探我上次整o既薑汁撞奶是否成功,我地特登去左議事亭前o既義順牛奶公司食左個薑汁撞奶 + 雙皮奶 ~ 結論有二

1. 我上次o的薑汁撞奶其實係成功架!以後可以自己整來食啦!

2. 呢門生意,o的毛利高到嚇死人 ...   

【上圖】官也街有另一間餐廳非常值得介紹 ~ 就係山度士葡式餐廳啦!今次冇去食,但兩年次和笨 B 爸爸拍拖來試過,非常懷念-ing  (佢o係誠昌旁邊隔幾間舖頭)

【video】新葡京成個圓球咁,幾靚架 ~ 

查實我地o個二千幾蚊分別「deposit」左o係新葡京、星際同埋永利度 ~ 不過「存」得最多係新葡京,因為佢多o的野玩同埋賭注細o的 ~

我地有朝一日會提返款架!哼哼  

沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: