2007年2月23日 星期五

分工合作開年飯

所謂開年飯,查實都只係得陳師傅 + 陳師奶 + 我 + 笨 B 爸爸四人而已 (其他人躝晒出街玩

)  所以非常簡單,我地分工合作,求求其其煮左餐飯出來 ~

 

出場序 (以 workload 排名)

陳師奶:當日陳師奶係主角!負責整佢最拿手o既福建炒米 (但我呢個不孝女,竟然錯手將咁難得o既片段 delete 左 ...
) ~  仲用
房太菜田的大菜頭整左煲好鮮甜o既菜頭肉片滾湯

笨 B 爸爸:本來,o係我娘家食飯,一向都唔駛女婿下廚o既 ~ 之但係某次陳師傅試過佢整o既蒜蓉煎大蝦之後讚不絕口,指定要佢再整喎

笨 B 媽媽:超級無敵懶o既我都略盡綿力 ... 切左o的蒜蓉咁喇 ...

陳師傅:負責擔任食神一職,專責嫌三嫌四

 

【上圖】陳師奶的家鄉炒米粉,材料非常簡單,主角最緊要有紅葱頭同埋魷魚乾,其他配料隨意 ~ 多數落o的雞蛋同埋椰菜就算!但好香好好味架!

各位,係我唔o岩 !竟然將陳師奶炒米粉咁珍貴o既片段 delete 左!  我對陳師奶唔住呀 (因為佢話我淨成日淨係讚陳師傅)!下次一定要再拍過先!



【上圖】笨 B 爸爸的拿手杰作 ~ 蒜蓉煎大蝦!好簡單,只要將大蝦開邊去泥腸,然後將蒜蓉塞入去,煎到兩面金黃就 ok 架啦!

【上圖】好簡單的菜頭肉片滾湯 ~ 用左從房太處新鮮摘來的菜頭,好鮮甜呢

32 則留言:

  1. 我都鍾意食中蝦、基圍蝦, 蒜蓉、白灼都得.

    回覆刪除
  2. 菜頭係咩菜既頭呢 ??

    回覆刪除
  3. 大蝦好吸引呀

    回覆刪除
  4. 我有睇 上一集 , 妳冇講係咩菜 ...

    回覆刪除
  5. 下將蒜蓉塞入D蝦度??? 幾得意! 我見識小, 未聽過 我老公仔咁鍾意 蒜蓉 要試下先得!

    回覆刪除


  6. 哈哈。。。陳師母終于開口0甲醋啦!! 講返句公道説話,您一路真係好少提師母窩! 個蒜蓉蝦好貫切苯爸的一貫煮食的方針:食物配料要有交流!!呵呵。。

    回覆刪除
  7. 個炒米粉好似好正a....點樣可以炒到咁乾身!

    回覆刪除
  8. 很溫馨的開年飯!

    回覆刪除
  9. 好勁呀!我click呢度入來架!

    回覆刪除
  10. 唉也﹗比Telly快左一步添,我都想話俾你知,笨B媽﹗你好厲害呀﹗上左yahoo 頭版,嘩﹗個格位可能值幾千蚊廣告費架﹗

    回覆刪除
  11. 我追左2日終於都睇曬你個blog la..特別係屋仔個邊..真係好令人羨慕ar..可以見睇自己間屋企由0變到而家差唔多起好...

    回覆刪除
  12. 見到你生活既點點滴滴我好感動...一個剛失戀既我...可以睇到你為屋企人煮一餐好既而落淚...加油呀....

    回覆刪除
  13. 笨B媽媽﹗我係第一次黎你板嫁,,見到你地一家人好開心好幸福>v< 我最最最愛食既野就係福建炒米同麻福建炒飯,,因為我係福建人@@" 我以後一定日日黎睇你~~加油!

    回覆刪除
  14. 犀利呀,我都喺yahoo頭板見到你個blog,之前只係見到袋巾成日喺嗰個位出現架咋!

    回覆刪除
  15. Wow! 炒米粉 和 D 蝦睇到流口水

    回覆刪除
  16. 2 個餸睇落去都好吸引呀,攪到我而家好肚餓,我又要食.

    回覆刪除
  17. hihi, can you tell me your mum use which brand of rice noodle to cook

    回覆刪除
  18. 我都見到係你上左yahoo 頭版喔~

    回覆刪除
  19. 真係辛苦哂你囉...切蒜蓉~ 你地4個人整4個餸, 我劍蘭媽...6個人整8個餸!

    回覆刪除
  20. 個炒米真係好吸引!!

    回覆刪除
  21. 嘩!! 真係辛苦你啦!! 切蒜頭..... 辛苦晒喎!!!!!!!! 我阿媽一個人煮5餸一湯呀!!! 咁樣煎蝦會好味啲.. 等有機會試吓先!!!

    回覆刪除
  22. 笨b媽咪:菜頭係乜夥黎架~~~

    回覆刪除
  23. 福建炒米 -- 我十分喜歡 , 如果唔使減肥, 實可以食晒成盒. 菜頭: 即是白蘿白, 福建人叫菜頭.

    回覆刪除
  24. 蒜蓉煎大蝦, 正呀!!

    回覆刪除
  25. Christina 小魚仔2007年2月25日 下午4:33

    簡 簡 單 單 開 年 飯 係 最 好 味 。

    回覆刪除
  26. 皮 2:咁就o岩勒!你第日o黎我屋企,我就叫笨 B 爸爸整各式大蝦招呼你 山口:有啊!最尾o個張相咪講左囉 ~ o個個好大個圓碌碌o既菜頭呢 (其實個真名好似唔係叫菜頭 ... 但我唔記得左房太講o個個名 ) 咪咪貓 & 豆豆龍:yeah!我都最鍾意食蝦架 KT/ MC:咁你就要試下啦!好正架!你仲可以用蒸、煎、焗o既方法整佢,樣樣都好好味!(之前有介紹過: 虎蝦三味 ) Mrs Kwong:哈哈 ~ 陳師奶真係有o的呷醋啊!鬼咩,佢工作狂來的,好少在家煮飯嘛!攪到我冇乜題材可寫 天濛光:係啊,我次次都至少食兩大碗! miumiu:就係可惜我 delete 左條片啊! 陳師奶話唔駛落咁多油架!但要一邊炒、一邊不斷用筷子叉鬆o的米粉,先可以保持乾身兼鬆身!P.S. 佢話最好用排粉炒,效果最好! 小魚兒/ 小魚仔:yeah ~ 一家人圍埋一齊食飯,食乜都咁開心喇! Telly/ 小倫/ 高佬/ net/ 小 Doll/ 莊莊:原來如此 ~ yahoo 咁益我啊 siu-kwan:嘩蟹 ~ 你追小說咁追啊 兩日睇晒?!有冇睇到眼都懞啊 其實最初開 blog 的原因,都係純粹記錄下起屋呢個咁特別o既經歷 ~ 點知愈寫愈多野 vanlily:哇哈哈!劍蘭媽都好勁耶 熊貓 MM:take it easy ... 祝你幸福快樂! 阿情:咦哇 ~ 同鄉啊 ~ 你好你好 福建炒米雖然用o的好 cheap o既材料,但好有家鄉的風味啊! Sviden/ 可樂/ 貓眼:我見佢地都係用好簡單的材料啊!你都可以試下整的 enyalam:陳師奶話用江門排粉的效果最好啊 ~ Yan Yan:伯母簡直係廚神喇!一個人整咁多餸出來,仲要款款都高難度o既!真係要向佢拜師學藝至得啊! 個蝦咁整係好味的!連一向嫌三嫌四的陳師傅都話 good,就真係唔錯架啦! 泳琪/ 懶精:查實o個個唔係蘿蔔,我係因為唔記得房太o個日講「x 菜頭」(詳情要睇番我o既 開心拜年遊記 @ 房太的菜田 啦),所以就咁叫左佢做菜頭而已 係呀,福建話裏面o既菜頭係指白蘿蔔架

    回覆刪除
  27. 蒜蓉煎大蝦 就咁塞o的蒜蓉落去就可以架喇? 好似好易整...不過對我黎講有o的難度呀...

    回覆刪除
  28. 咦 .... B 媽 這幾日我都要煎大蝦呢 見到 B 爸O既招牌蝦好掂阿 淨係O甘簡單 有無其他O既秘方阿 蒜蓉使唔使先炒過阿 炒米粉好正呢 我極度喜歡食米粉呢 但係仲未炒到如此程度呢

    回覆刪除
  29. 阿懶:真係好易架,你試下就知! (雖然冇難度,不過預備時間較長就真,又要洗蝦、開邊、剁蒜蓉、塞蒜蓉 ... ) 影子:冇秘方啊!蒜蓉用新鮮剁的最好味,千祈唔好手多多又剁o的薑落去啊 (因為試過,冇咁好味!) 你可以加o的指天椒碎就真 話時話,呢味蒜蓉蝦可以用煎、蒸、焗o既方法來整,全部都好好味架!你可以睇番以前有篇 虎蝦三味 ~

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: