2007年2月28日 星期三

自選難度 + 自由發揮 = 豬扒菜飯 (決勝秘訣募集中!)

 

笨 B 爸爸話畀我知o聽日可以帶飯 (因為冇約同事出街食),我就諗住整樣可以做埋飯盒的菜式

 ~ 其實我好想整上海排骨菜飯,因為笨 B 爸爸每次去開台灣小店都必定點的,一定係佢最鍾意食架啦!

 

可惜,我搵o黎搵去都搵唔到個食譜

(如果大家有必勝秘方,請話畀我知!  要好似o係街度食o個o的架喎 ~) 唯有自由發揮喇 ~    我o既自選難度係 2.8 環迴三周半轉體不成撻左落地  ~ 不過都請掌聲支持 ~

笨 B 爸爸見我忙到一頭煙,又攪到個廚房好似地震咁,「禮貌上」都對我o既努力大表欣賞,仲猛咁話好好味 ~ 不過我自己試過後,只可以叫做合格,但同台灣店o既排骨菜飯實在太唔似啦!  There is so much room for improvement ~

 

等我介紹下今晚食左o的乜野,然後先詳述我點樣整喇!各位高手,唔該過幾招來丫 ~ 感激感激!

 

今晚的碟頭飯:自由發揮炸豬扒 + 菜飯

今晚湯水:一物二用小棠菜滾湯 + 魚片

今晚甜品:冰糖綠豆沙,走陳皮 (我唔鍾意o的陳皮味) 走海帶 (我唔明點解要落海帶,嫌麻煩)  

笨 B 爸爸的飯盒

 

================================================================

笨 B 媽媽自選難度自由發揮豬扒處理法

Step 1 - 買豬扒:叫左大叔切得薄o的架啦,都咁厚o既?佢地一定係冇「薄切」呢個概念架勒

Step 2 - 剁豬扒:用刀背剁鬆豬扒兩面,慌死唔夠鬆, 竟然用刀背都可以剁到o的肉飛出界!


Step 3 - 浸水:陳師傅教o既 ... 佢話畀豬肉「吸水」20 分鐘,o的肉會嫩滑o的架喎!不過我形住自己做錯左o的野,因為浸完一輪之後,我唔覺o的水少左喎 (即是冇吸到?)

Step 4 - 印乾:為免水汪汪,我用廚房紙先印乾豬扒才醃

Step 5 - 醃豬扒:用左o的乜野呢?都幾自由發揮架!見到乜就摷乜 ... 包括糖、醋、豉油、蒜蓉、指天椒、雜香草、豉油、生油 ...   不過,我只醃左 10 分鐘,應該係醃得太短時間咯!  因為一食就知唔多入味,哈哈!

Step 6 - 炸豬扒 (冇影到):平底鍋內下油,用大火先煎封兩面,然後轉中火炸到熟,最後再轉大火上色 & 逼返o的油出來,事成後放在廚房紙上索油 ...

 

===============================================================

菜飯做法 (3 碗份量) 

Step 1:預先浸好 1.5 嘜米

Step 2:四兩小棠菜切細塊  ... (查實我覺得自己切得太大!大家可以再切細o的)


Step 3:鍋內下油鹽,先炒菜莖、然後加埋菜葉,半熟時加入米和適量水份 (喜歡的話可以用上湯,or 加一茶匙雞粉),慢慢煮到半熟狀態 (約10 分鐘),然後倒入電飯煲繼續煮熟


================================================================

後記:唔該晒笨 B 爸爸幫我收拾殘局,攪掂地震過後的廚房!啜啜啜

2007年2月27日 星期二

我簡單,but 我真材實料 --- 二人海鮮粥

今日本來想整上海排骨菜飯

cooking ,但諗起笨 B 爸爸話過o聽日唔帶飯,咁不如留返呢個菜式o聽晚先煮喇!(查實我搵緊個正宗食譜但仲未搵到,唔知煮唔煮得成 )  尋晚食得咁飽,今晚就清淡o的,食粥喇! 

 

大少奶話佢最怕食粥,但我同笨 B 爸爸就相反,極為喜歡食粥  ~ 基本上各種粥都鍾意食 (如果你在我呢個站內 search 粥的話,應該會搵到好多篇出來 !)  其實粥真係好好食啊,乜解救我個 honey 大少奶唔鍾意食呢下 ~  

 

為免笨 B 爸爸又話我虐待佢 (佢成日話我得白粥同青菜,抗戰咩 )  我今晚整左個真材實料海鮮粥過佢嘆!雖然我整得稀左少少 (技術問題),但因為材料十足,好鮮甜架!

【上圖】大家估下呢碗粥裏面有乜野料?


【上圖】就係以上呢o的啦!

1. 扇貝 6 隻 --- 去泥腸,用鋼絲刷大力刷洗貝殼 (查實可以起左o的肉來用,不過我想連殼影相,所以要洗得非常乾淨)

2. 蠔仔 4 兩 --- 要逐隻檢查有冇蠔殼,否則咬到你牙都崩!稍為清洗,隔水備用。放入粥前先用少許雞粉及生粉輕力拌勻,可以提升鮮味 & 冇咁縮水。

3. 游水鮮蝦 16 隻 --- 大約半斤。我買左一斤,剩餘的放在冰格,可以 keep 一星期 (話時話,如果剝殼用的話,先放在冰格雪 2 個鐘,易剝殼好多架!笨 B 爸爸教我的

4. 吊桶半斤 --- 拔去頭部和魷魚骨,切下觸鬚留用 (哎吔!我唔記得左,丟晒 ),撕去表層紅色衣,清洗乾淨內部,橫切一圈圈備用

做法:先煲好白粥底,然後將以上材料放入粥裏滾多 10 分鐘,加雞粉和胡椒粉調味,攪掂!

【上圖】年卅晚整

大吉大利大豐收的剩餘物資  --- 南瓜,我將佢切成極細粒加埋落粥度,增加甜味和色彩

【上圖】同場加映飯後甜品 --- 芝麻卷,在街市小食店買的

2007年2月26日 星期一

蝦碌蒸魚篇 の 蒜蓉豆豉蒸烏頭

識得我耐o既 blog 友都知,我不嬲都唔駛下廚o既

cooking  ~ 做女時有個煮餸勁掂o既陳師傅 (即是我阿爸) 負責掌廚,嫁左之後又有一個同樣煮餸幾掂o既笨 B 爸爸負責料理  ~ 其實我都唔想咁懶架!鬼叫佢地成日嫌三嫌四咩!我o既宗旨就係:
你咁叻,不如你負責煮喇!  

 

啊呵呵呵 ~ 就係咁,我就呃左幾廿年飯食咯   ~

 

不過,有時我都會「獲利回吐」一下o既   成日白食,唔係幾好意思架嘛 ... 況且,話晒我都係一隻巨蟹,點都要煮得一兩味o既 ~

 

今晚我整左笨 B 爸爸最鍾意食o既蒜蓉豆豉蒸烏頭,幸好黃油十足,總算肥美嫩滑 ~ 其實過程之中都幾蝦碌架!因為

1. 我以為魚檔個牌寫住 $18 (一條),即刻揀條至大o既 ~ 原來佢係 $18 一斤,只不過個「一斤」字樣畀o的魚遮住左!條魚足足一斤9兩,食到我地兩個傻呀  

2. 條魚大得滯,個鑊蓋冚唔晒!好在我識得蒸多兩分鐘   o岩o岩好熟!

3. 原來個魚販冇清乾淨個魚肚,有一舊大肥膏o係度!好在唔係污糟內臟o者!否則又畀笨 B 爸爸打 PP!

 

哈哈!其實蒸烏頭真係幾容易架喎!雖然係第一次整,但都成功呀!等我話畀大家知點樣整喇 ~

 

【蒜蓉豆豉蒸烏頭 - 2 人份】

材料:

烏頭   一條 (買小型的約一斤就好啦)

豆豉   一小包 (在街市的南貨店買,只要 $1)  份量約 3 湯匙

蒜頭   半個

做法:

 1. 魚販 suppose 已幫你劏好條魚,不過都要清洗下條魚,順手睇下有冇未清乾淨o既魚內臟 or 肥膏

2.  切蒜蓉,稍為清洗豆豉

3.  用石磨將豆豉和蒜蓉一起舂碎混合 (如果冇石磨,用攪拌機亦可。甚或乎用刀切碎都 ok 架!)

4.  將魚放在碟上,然後將蒜蓉豆豉平均鋪在魚面、魚底和魚肚

5.  如果一斤的烏頭,只要大火蒸 7 分鐘就 ok 啦!(都要視乎條魚的厚薄和爐頭火力 ~ 要講少少經驗啦)

 

【圖一】今晚的家常便飯

【圖二】蒜蓉豆豉

【圖三】製作過程

【圖四】蝦碌鏡頭 --- 條魚太大!魚尾走出來啦 ~     (鑊蓋冚唔實,蒸氣會走失,唔夠熱架)

笨 B 爸爸教我蒸呢條斤半重o既烏頭要 9 分鐘,我見咁「情況」就自行加到 12 分鐘,o岩o岩好 ~

【圖五】我最鍾意食的 1:1  紅米飯


【圖六】每個星期飲一次紫菜湯,補充碘質和無機鹽,good 呀!



Linkwithin

你可能對以下文章有興趣: