2007年1月29日 星期一

薑汁撞奶 の 「流流地」試驗篇

 

我同笨 B 爸爸都好鍾意食「義順牛奶公司」o既薑汁撞奶,而每逢我地鍾意食o既野,我都想試下o係屋企「東施效顰」一下 ~ 不過,由於我通常都會出盡法寶,搵一個睇落最簡單快捷o既食譜來整  ~ 因為,我不嬲o既宗旨都係:二人煮飯仔,簡簡單單求求其其清清淡淡咪好囉 ~ 複雜o既話,不如出街食啦,咁先至可以促進經濟繁榮丫嘛 ~ 大家話係咪 ...

 -->  好一個貪精學懶o既藉口!嘻嘻!

 

我見坊間流傳o既薑汁撞奶食譜材料雖然簡單,但過程好似好複雜咁 ... 睇完都唔敢試  但幾個月前睇到

大少奶整,佢講到超級簡單兼隨意,攪到我心思思!難得買到老薑 (好似好少見有老薑賣),就即管試下啦!

 

第一次試驗結果:流 ... 流 ... 地 ...

 

因為大少奶講到咁隨意,咁我就學佢好隨意咁整啦 ~ 我相信係撞奶o既手勢未拿掐得好,所以撞出來o既薑汁撞奶,幾乎只留得「薑奶」下場 ... 幾驚呀   好在,我放多 15 分鐘之後,都總算變左乳酪質地 ...

 

今日再問左大少奶秘訣,等我今晚再試下先!成功左再報告呀下 ~

【上圖】大家唔好畀隻匙羹呃左 ... 其實碗薑汁撞奶凝結得唔係幾好架!頂多係似 yoghurt,未係義順o個o的質地 ~

【上圖】看圖識薑 ~ 上面o個碌大o既係老薑,o的皮厚o的、深色o的 & 紋理較窄。下面o個兩舊細o既係生薑,明顯上 ... 比較後生呀呵

【上圖】我用磨茸器磨完之後,就搵呢個濾網壓o的薑汁出來用 ~ 呀,唔知薑汁同凝結效果有冇關係呢?

 

笨 B 媽媽版 --- 好「流」o既製作過程 

睇番條片,撞奶個過程實在太「流」,都唔係「撞奶」o既!  今晚要試下將個煲揸高o的先!
 

24 則留言:

  1. 好似用老薑會好d..笨b媽媽..你用邊隻奶? 全脂 or ?

    回覆刪除
  2. Sally Ho 莎莉豪2007年1月29日 上午8:02

    義順o個D唔係薑汁撞奶, 係薑汁燉奶, 經過大火燉的, 而葫蘆館o個D就係薑汁撞奶, 質地就流 ... 流 ... 地 ... 所以在家做撞奶係咁嘅. 你怕流 ... 流 ... 地 ... 就要燉奶啦!

    回覆刪除
  3. 笨B媽媽:義順d薑汁奶好唔好味我唔知 ,我樓下同媽子(佐敦)都有間,佢D早餐勁難食 ,我同Jenny情願行過格離街食澳州人奶公司d早餐

    回覆刪除
  4. 哈哈哈...幾好喎...有埋影片睇..一定學得識呀~~~~~

    回覆刪除
  5. 笨B媽﹕我屋企做薑奶都係好簡單,鮮薑汁三茶匙,放入碗,撞入熱鮮奶,等幾分鐘就搞掂。薑汁唔夠,奶就凝固唔到架啦﹗另外,好似“莎莉豪”咁講,薑奶同燉奶係兩係野黎個喎,薑奶係流流地,勉強凝固到,燉奶先係豆腐花咁實少少既。

    回覆刪除
  6. 苯b媽媽, 你係咪貪靚用左脫脂奶呢? 唔夠脂肪佢好難"杰"嫁, 最perfect係用水牛奶 ... 不過香港好似冇wor! 總之一定要全脂, 有咁fat得咁fat! 你都上左岸, 唔怕啦!

    回覆刪除
  7. 我想用我個friend d 口吻話下你先 (佢見親我食d肥野都會話我: 死肥婆, 肥死你呀 )

    回覆刪除
  8. 打令 其實無固體咁實又比液體凝結,但都唔會好似你咁要十五分鐘

    回覆刪除
  9. 俾心機呀笨B媽媽, 今晚再撞過 不過睇你條片又真是幾易喎, e ......都可以考慮整俾亞仔食呢

    回覆刪除
  10. 俾D心機......整.... 薑汁撞奶....啦

    回覆刪除
  11. 你向高難度挑戰喎!

    回覆刪除
  12. 我以前啲同事都試過整,都係流流地架

    回覆刪除
  13. 溫馨提示! 原理薑含有蛋白酶,能與牛奶內的蛋白質發生化學反應。牛奶內的一種蛋白質由可溶的狀態轉成不可溶的狀態,使牛奶凝固。 5名就讀天主教母佑會蕭明中學的中四學生發現薑汁撞奶的製作原理,與生物科所學的知識相違,故去年9月起以傳統中式甜品作科學研究。成員周慧欣解釋,「薑汁撞奶是由加熱的牛奶混合新鮮的薑汁凝固而成,凝固是因為牛奶中的蛋白與薑汁中的生化酶產生生化反應。當我們做02年的會考生物科試卷時,卻發現大多數生化酶遇到高溫便永久變質,不能作生化反應。」她們做了逾130次實驗,並造訪甜品店以了解這種甜品的製作過程。研究結果支持薑汁撞奶需要煮沸牛奶的說法,但要藉着6次「拉奶」(把奶互相冲倒至湯碗內)的程序,以助牛奶降溫,令其處於62至67℃。這樣做可避免生化酶變質,亦能夠促成生化反應。評判讚賞他們探究出家傳戶曉食物背後的科學道理,評定為今屆「香港學生科學比賽」的研究作品組冠軍。]

    回覆刪除
  14. 各位:今晚試整時在每碗用了 3 茶匙的薑汁,但效果和尋晚差唔多,都係要成 15 分鐘先凝結 ~ 可能o的奶仲係太熱 or 撞奶撞得唔夠好 ~ 不過大家都話係「流流地」,咁即是「得得地」喇!哈哈哈哈哈 ~ 呢兩次都係用蒙牛全脂奶,真係肥死我咯 ... 唔得,要試下 vanlily 推介阿堅o個個低脂代糖版先得 ~ Cindy:多謝你o既資料啊 ~ 咦,咁可能我的牛奶仲係太熱喎 ~

    回覆刪除
  15. Hi 笨 B Mama , 見你今日無啦啦咁衝咗入我個 blog 度 , 當然係好開心啦 !! 咁啱對呢個 "薑汁撞奶" 有 d' 認識 , 不妨硏究下 : 1. 薑 , 一定用老薑 , 磨碎後壓汁 (1碗約1.5 湯匙) ; 2. 奶 , 呢樣好緊要 , 要用 " 維記高鈣低B奶, 唔係, 係低脂奶至啱 ; 3. 碗 , 放入薑汁前 , 先預熱 2 min (放入鑊度 , 隔水蒸熬就 OK) ; 4. 煲奶 , (絕對不能滾) 你已經做啱一半 , 另一半係要加糖 1茶匙 ; 5. 撞奶成唔成功 , 就睇呢樣啦 , 你話緊唔緊要 ?? 預備一個凍煲 , 首先將熱煲既奶撞入凍煲內 , (為之一次) , 再將奶撞回熱煲 (為之第2次) , 如是者 , 共撞 10次 , 最後奶應在熱煲內。(拉奶目的 , 是要將空氣撞入奶中 , 不宜拉過高) 6. 將奶倒入薑汁碗內 (已蒸熱) , 不要移動碗 , 三分鐘可吃。 注意 : 你可留意薑汁內白色的物質 , 就是它令到奶與薑產生化學反應 , 撞奶前 , 要攪拌致看不到白色才 OK 你再按以上方法試 , 希望你成功啦 !!!

    回覆刪除
  16. 笨b媽媽 我次次整呢個都係流流地 無次成功架! 我喺祁福食過用水牛奶撞嘅薑撞奶你實好多架 真係好正架 不過到而家我都未成功做到呀! 吁另外又多謝你介紹點揀老薑呀!

    回覆刪除
  17. 笨B媽媽, 我成日都好想整, 但係好似要好耐時間prepare咁, 所以到依家都未整過!

    回覆刪除
  18. 笨B媽﹕原來你用蒙牛,唔怪得之唔得啦﹗用新鮮牛奶啦﹗ 等得閒既時候我去整個簡易版,做完話你知啦﹗

    回覆刪除
  19. 笨B媽媽 : 我答o左你tag我d問題ar, 但係 唔可以link番去你篇blog 嘅引用到呢? ( http://hk.myblog.yahoo.com/iam-ggleung/article?mid=363&prev=373&next=361 )

    回覆刪除
  20. 我以前聽蘇施黃個節目,佢話一定要用維記架,不如你轉用維記試下得唔得。

    回覆刪除
  21. 試多幾次你就可以開番檔笨B薑汁撞奶喇...

    回覆刪除
  22. 笨B媽媽﹐ 我次次都攪到一獲泡﹐唔知薑汁要幾多份量﹐你成功的話﹐指教一下好嗎? 嘻

    回覆刪除
  23. 路過搭咀... 我用過維記高鈣低b奶 (綠色屋仔)成功... d奶唔可以咁熱, 貓眼滾... 之後撞幾次至撞落薑汁度... 如果成功唔駛等0架... 得左!

    回覆刪除
  24. 薑汁撞奶呀, 一次可以滿足我兩個願望: 薑+ 奶. 我鍾意多d薑, 正氣, 驅風, 保暖, 一物多用. 奶又可以養步顏, 正.

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: