2007年1月29日 星期一

【新屋採購日誌】米格熱能

每次聽天氣報導時,講完市區溫度,總會搭多句「新界地區會再低兩三度」

  ~ 對於一個本來已經怕凍o既人 (我),淨係聽到呢句,已經打多兩個冷震 ...

所以,電暖爐將會係我地新屋不可或缺o既電器 ~ 我纏左笨 B 爸爸好耐叫佢買二合一冷暖氣機  佢都唔肯,因為對於佢呢個仿如內置發熱機o既人o黎講,佢唔會明白點解新馬仔要唱「冷 ~ 得  ~ 我 ~ 騰 ~ 騰 ~ 震 ~ 」o既 ... 佢話多隻香爐多隻鬼,二合一冷暖氣機一定係易壞o的o既喎!    仲有,佢話如果要 heat up 成間屋,要好多 energy,o徙電喎!

但由於我大力表達不滿,兼且經常o係佢面前表演凍死 look ,佢卒之肯考慮買番幾部暖爐放o係屋企唔同o既位 ~  嘻嘻!成功-ed!

 

以下就係我地買o黎試下o既米格熱能,如果好用o既話,就會再買多兩部 (因為我需要一部放浴室、一部放廳 & 一部放o係睡房) ~

 

【參考資料】

牌子:Bionaire

火力:1500 瓦 (另有 1000 和 2000 瓦可供選擇)

優點:快速加熱、恆溫裝置、唔會令空氣乾燥、可以放浴室、低溫網面防止灼傷、有時間制、非常輕身

價錢:$1100 (千色店)

 

【笨 B 媽媽試用後感】

   佢真係開機 3 分鐘即刻有熱力出,但肯定唔似暖風機咁快感覺到暖 ~ 因為暖風機係「吹」o的暖風出來,而呢部係靠發熱板發熱,慢慢將周圍o既氣溫提升 ~  

   亦因為咁o既原因,我覺得冇咁乾燥喎 ~ good

   好鍾意佢有個恆溫制,最高可以較 27 度,升到指定溫度後就會停機,唔怕過熱及o徙電

   真係好輕,我地o個日買完部機後順手買米,呢部野仲輕過包米 (咕喱笨 B 爸爸話o既)

   佢個扁身設計好o岩浴室用,可以 mount 在牆上,好慳位

   係大部左o的 (因為佢係扁身設計),如果係市區樓,或者覺得比較阻定 (好似我地而家試緊機咁,擺o係個細小o既客廳度,覺得佢好大舊)

   整體感覺唔錯,我諗我都會買多兩部架啦 ~


 

 

36 則留言:

  1. 香港已經不算凍了,如果俾你去到北方,可能要背住暖爐走了

    回覆刪除
  2. 開暖爐記得係旁邊放一大柸水呀! 皮膚會無咁乾的~

    回覆刪除
  3. 乜笨b爸爸咁似我老公, 又係話會唗電喎, 佢地又唔諗吓凍親要睇醫生咪一樣唗錢! 好彩佢都比你買呢款heater, 如果好用, 我都買番部先!

    回覆刪除
  4. 冬天暖爐不可少,我地係人一部,二貓一部.....不過開得耐就好乾燥,唔知呢個係咪真係咁好

    回覆刪除
  5. 我尋晚都攬住左佢睇電視, 哈哈

    回覆刪除
  6. 好似又真係幾好咁喎 ~

    回覆刪除
  7. 我屋企都有wo 不過我覺得冇咩用咁 都係怕凍既mama 沖涼果陣用

    回覆刪除
  8. 你呢部暖爐好型呀...同我屋企用緊o個隻好唔同呢 $1100 都唔錯呀... 對比下我屋企個暖爐好似好危險呢...

    回覆刪除
  9. 笨B媽:老媽子知你地新屋凍 ,早排同我講已買了一個暖爐比你同笨B爸(不用打比佢,因已買了 )

    回覆刪除
  10. M&N:嘻,所以我都唔會叫笨 B 爸爸帶我去落雪地方旅行 ~ 慳唔少 BeanieJaNeT:yeah ~ 知道 ~ 不過呢部機冇暖風機咁乾的 布冧仔:係咯!你話係咪丫!佢地都冇解o既 ~ 郎媽:咁我要用耐o的先知 ~ 到時再報告 ~ 靚 B:你食正西北風,冇計啦 ~ 眼訓妹薯薯/ 阿懶:暫時來講,我都覺得呢款比起傳統o個o的暖爐好 ~ celia:沖涼時真係好凍架 ~ 唔小心好易冷親架 ~~~ 翔江一號:不是吧 ... 其實 ........... 你見我地o既起屋過程同埋買電磁爐就知,我對於屋企用o既野 ........... 係一定要自己揀架 ................呢個係巨蟹座o既「缺點」來架 ... 似乎我都係要整個 shopping list + wish list 出黎好o的 免得大家破費破得無辜辜 ~ 開頭唔整,就係免得大家破費;而家睇黎都係要寫番個 ...

    回覆刪除
  11. 基本上我係一個無體溫嘅人,一到冬天活動範圍就只能在被窩裡,熱風機、充油式、發熱管式及“圖“磁式的暖爐也用過了,不是太乾就是凍僵也未有暖到,或是只能在暖爐的三、四呎範圍內活動,真是苦不堪言,但用過分體的二合一冷暖氣機之後,分別真係好大,成間屋都暖晒。不過部窗口式就麻麻地,好嘈!我都有D後悔!至於電費﹣吾理得咁多,吾通成日冬眠咩!

    回覆刪除
  12. 哈哈.... 4小咪都有電氈啦!!!

    回覆刪除
  13. 幸福小女人- Diana2007年1月30日 上午10:53

    笨B媽媽... 呢個介紹唔錯喎, 我又係一個極度怕凍既人,, 依家身處杜拜稍為好D.. 可以避過香港既冬天... 但我二月返HK, 又要忍受嚴寒之苦... 等我又要睇下呢舊野放唔放得入我間房先!!

    回覆刪除
  14. 真好!!!有電熱爐, 祇是我身處的臺灣應該沒有HK泠吧!!! 我的BLOG http://hk.myblog.yahoo.com/jw!BiOiowOUFRs0T2mH4ziNTeQ4 多‧多‧指‧教

    回覆刪除
  15. 我老爺屋企也用這種暖爐, 我隻貓日日瞓起暖爐隔離, 不知几歎!

    回覆刪除
  16. 原來我屋企果部同你一樣牌子呀! 我個model係 BH3900 無你果隻咁長.

    回覆刪除
  17. 笨 B 媽媽, 你未來屋仔可以種好多盆栽,好羨慕呀!你第時種多d,種埋香草,post上黎同我地分享! 上年去過三姨的五星級碧桂園的家,便愛上了,因為有大花園可以種野!成日都叫天皇買間俾我,但都係早d訓擺!

    回覆刪除
  18. 笨b媽媽 呢兩日石崗七點時只得三四度喳! 朝日真係好唔願起身返工呀! 不過日常生活就不受影響 可能因為凍慣咗喇! 希望你都能盡快適應喇!

    回覆刪除
  19. 小胡子:嘩蟹,你o既怕凍程度高我幾班喎 要冬眠 ~ Yan Yan:4 小咪咁嘆? Diana:係喎,你o係杜拜返來,一定唔慣啦 ... 不過呢幾年香港已經唔算太凍架啦 ... 淨心院:歡迎光臨 ~ 台灣唔係仲凍過香港架咩? 靚 B:我之前睇過你畀我張相,應該都係都一個牌子 ~ 你o個個係 1000 W 乎? Cindy:我會架!我一直都想有個小香草園,煮餸時即摘即用,超開心 ~ 不過我驚打理不善,生唔出o乍 ... 小魚兒:唔係下話 ... 你話你間屋冬暖夏涼,咁三四度o既冬天感覺如何呀?

    回覆刪除
  20. 笨b媽媽 咁屋企又真係唔係好凍喎 早上的室內溫度竟然都有十五六度喎! 我見房同廳嘅寒暑表溫度都一樣 照計唔會錯卦 所以喺屋入面我都唔係著好多衫咋!

    回覆刪除
  21. 笨b媽媽 唔記得咗答你︰ 咁三四度o既冬天感覺如何呀==> 其實都無咩特別,只係 超想打邊爐呀 你搬入黎後大把藉口打邊爐喇! 正如我所言 喺屋入面真係唔係好覺架 唯一最有感覺的 就係早上由暖烘烘的被窩內掙扎起身的時刻 真係好痛苦架! 除咗呢樣 都無咩特別囉!

    回覆刪除
  22. 笨B媽媽, 「新界地區會再低兩三度」, 係就係成日聽, 但我又唔係咁覺. 如果係真, 我呢度咪日日得十度八度? 不過呢! 黎明時就真係最凍嘅時候, 當我凍醒時我就知那天或大概得十度, 但我眼瞓就不會理凍, 繼續我的死睡. 既然你側近有個「內置發熱機」笨B爸爸, 你時時攬實佢咪就得囉. 俾個機會佢鍚你, 好sweet呀!

    回覆刪除
  23. 小魚兒:咁都好 ok 喎! 咦,你間屋真係好正 ~ 冬暖夏涼 ~ 得閒要入來參觀下 ~ 皮 2:係呀,笨 B 爸爸真係一個人肉暖水袋,我晚晚都要佢攬住我,攬到暖晒先畀佢放開架! (有時攬得太耐,仲會「過熱」添呀! )

    回覆刪除
  24. 笨b媽媽 隨時歡迎喇!

    回覆刪除
  25. 笨B媽媽: 我只能講句...........你好幸福呀 笨b爸爸自己本身對住你已經係一座熱情的沙漠, 但是你 佢幾下, 佢就為你而買米格熱能, he's so nice ar

    回覆刪除
  26. 睇左你四十幾篇 "小"屋仔,大Project ,好感動呀,你可以親眼望住自己間屋,由冇到有,太幸福太感動啦~~

    回覆刪除
  27. 係呀, 放杯水係附近, 當然唔好太近會有倒瀉水落暖爐的危險, 真係冇咁乾架.

    回覆刪除
  28. 笨B媽媽,我都怕凍架, 因地方細, 唔比買暖爐, 又怕買電氈 ~ 好彩..家父後尾係公司抽獎有部暖風機....好野...(不過今季都未開 ~~~)

    回覆刪除
  29. http://www.bionaire.com/europe/ProductDetails.aspx?cid=129&pid=2017 1500 W 呀......嘩, 好勁~~~

    回覆刪除
  30. 我係大棠真係好凍, 要開暖風機 + 放濕機~~~, 我覺得你可以先買2部, 一部係房, 一部就toilet, 廳會好d..... 因為3部好似多左d......

    回覆刪除
  31. GG:我 左好多次架啦 ... 李小姐:歡迎光臨 ~ 哇!你好勤力啊!一口氣睇晒四十幾篇呀 ~ 係呀,我地擺左好多心機 & 時間落呢個小屋仔 project 度,睇住佢一日一日「長大」,真係幾有滿足感架 大洗慳妹:多謝你的小貼士 ~ GG:雖然我成日話凍,查實今年都好似未試過十度以下 (市區) ~ 靚 B:yeah,買黎主人房用嘛 ~ Sheena 媽:哈哈,我都仲記得你講,你o個度好凍丫嘛 ~ 希望我間屋仔冇你o個度咁凍 ...

    回覆刪除
  32. 米格熱能 ~~ 對我本來好正 , 我會放在 浴室 但~~~~~一見到價錢真係好費$1100 可能將來老公都覺貴呢¬¬

    回覆刪除
  33. 係呀暖爐係冬天恩物0黎0家!! 我上年已經買左,帶著佢通屋走,如果唔係都唔知點過個冬天! 不過都幾乾燥嫁,飲多D水同生果就無問題啦!

    回覆刪除
  34. 我都係住村屋架, 不過係住西貢, 琴日朋友send左你呢個"村屋大計"俾我睇(可能我屋企都係裝修緊卦 ), 一口氣睇晒你咁多篇"報告", 都好戥你開心 講下我屋企啦, 因為我屋企已經好多年樓齡, 因為外牆都有漏水情況 所以諗住從新裝修過, 最初都話想全幢拆左再起架, 奈何我地無錢買全幢, 我地只係住三樓連天台, 地下同二樓個業主都費事采你 , 地下個業主同你一樣都係原居民自己要返, 不過佢已經移左民, 間屋都係租俾人住, 二樓個業主就抱住"各家自掃門前雪"o既心態過日子........ 好喇, 講返間屋裝修先, 我今次只係做外牆同天台, 外牆同你個廁所D磚有D似, 都係灰色砌"工", 但係就用白色砂膠做"掃口"(即係你話果D色粉呢), 用砂膠可以更佳防水功效, 而天台我地從新再做過地磚, 其實幾年前都做過一次, 可惜我見你都已經做左"防漏", 唔係就會介紹你用一隻叫"鋼膜"o既防漏, 早幾年裝修都係用呢隻(見報紙賣廣告, 所以買返o黎試下), 呢隻野真係好掂, 呢幾年天台真係無滲水現象出現, 之前係直頭滲水滲到連三樓天花石屎都跌落o黎 , 所以迫於無奈要裝修o羅 見到你搵到自己dream house, 真係開心, 其實呢幾年好多"城市人"搬去村屋住, 貪佢舒服同地方好用, o岩o岩搬入去都會覺得好唔方便架, 一唔記得買少少野都會好大鑊, 但係慢慢發覺越來越鍾意呢D生活, 反而你叫我出旺角我仲會驚添(人多車多, 環境又噪), 從此又多一個村姑喇....... 係呢, 你會唔會諗住養返隻狗狗呢? 我會覺得有安全感D....

    回覆刪除
  35. 睇完您呢篇米格熱能, 對您部機真係好有興趣, 但奈何好多地方都唔見有... 終於, 尋日比我係旺角間國美度搵到佢的踪跡...不過, 佢標價2000W賣HKD998...比您部平少少...唔知係咪唔受歡迎而跌左價? 定係佢真係唔係好work呢?? 笨B媽媽: 以用家身份講下您入到村屋之後, 部機係咪一樣咁掂ar~~ p.s. 國美話2000W的, 適用範圍200呎...咁大過200呎又會唔會唔得呢??

    回覆刪除
  36. 想問下幾時會有用後報告出呀,依幾日咁凍,你頂唔頂得住呢? 我去睇左,都想買呀,睇左你依個牌字同埋另一隻turbo(平少少),size 高少少但比你依隻短少少,當初乜野因素令你選擇依隻呢? 我想睇埋你既用後報告先去買。謝謝!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: