2007年12月31日 星期一

2007 笨氏回顧

尋日睇到大少奶那篇 「2007」,才驚覺原來咁快又過左一年!


2007 的我經歷了頗多轉變,在身份上、工作上、住所上、行為上、心態上都改變了。其實這些轉變在 2006 年開始便逐步出現,不過 2006 年的過程是顛簸的、不明朗的;踏入 2007 年中期,局勢開始穩定 (噢!好像在講國家大事 ),有了明確方向,心態也逐漸調適過來了。


讓我也來總結一下今年的


 


【喜


  嘻,當然是做了「人妻」啦   婚禮非常簡單,但非常窩心


  和笨 B 爸爸親身參與的「小屋仔.大 Project」順利完工,擁有自己的快樂小天地


  和家人見面更多了,關係更親密了 ~ 這對重視家庭的巨蟹來說,實在是十分欣喜的事


  遇上好機會,事業有新的發展


 


【怒


  ... 有架!不過,唔記得晒 lu ~!


 


【哀   】


 touch wood 今年沒有遇上甚麼太哀傷的事 (只是愛哭的巨蟹還是間中會哭)   雖然曾經得到但又失去一樣東西 ~ 不過,既然不屬於我的,由它去吧!


 


【樂


  變笨-ing  ~ 這是一個 on-going 的變化,我還會繼續愈變愈笨的


「笨」在我的字典內,是一個 positive 的字,主旨是「無傷大雅的事,就不要看得那麼真,笑笑就算吧」,方法是「戴著 soft 鏡看天下」 


學習重點是「多欣賞、多讚美、多包容、多感恩;少批評、少抽秤、少稜角;不計較、不執著、不妒忌、不憎恨、不貪婪、不尖酸」  噢!好高境界!有排學!


當然,關乎原則或是重要的事 (e.g. 工作),我不會笨的,大家放心


  認識了好多新朋友,也和斷線的舊朋友們再接線了   原來一天到晚潛在水底的我,還是有好多真心朋友的,好感恩呢  


 


【展望 2008  】


  繼續做個好老婆 ~ 和笨 B 爸爸繼續相愛


  和家人關係更親密,多點時間侍奉爸爸、媽媽、奶奶,多點機會和弟妹相聚


  工作順利,早日站穩住腳,打晒所有怪獸!


  和朋友們開開心心,多見面或少見面都好,經常保持聯絡,互相關心互相幫助


  研發笨 B 笨 C


  繼續努力變笨、繼續努力寫 blog!


 

2007年12月30日 星期日

第一次在戶外打邊爐

今晚獲邀參加一個好特別o既火鍋餐


特點之一,係o係戶外打邊爐


雖然今晚未係最凍 (天文台話元旦會跌破十度)


但坐o係室外,真係相當寒架呢 ~


所以大家都 keep 住努力淥淥淥 ... 食食食 ...


 


特點之二,下兩張相就會講到 ... 大家估下先 ...



就係用自家種o既芥蘭和日本大根 (即白蘿蔔) 打邊爐啦!!!




收成蘿蔔的一刻,實在好興奮!!!



多謝師姐 Fiona 的邀請 ~ 今晚好開心,好滿足呢!   好 enjoy 即興約埋聚下餐、閒話家常 ~


 


【同場加映】


話說小妹唔食牛肉,但【兒興泰】老細成日同我推介佢o的安格斯牛肉 (好攪笑,佢已經知道我唔食牛,不過每次見到佢,佢都係忍唔住同我又讚一次,仲會興奮到入雪房拿畀我睇 )  今日有機會啦!我唔食o者,笨 B 爸爸同師姐伉儷都食,可以試下啦!


 


買左一磅安格斯肥牛,只是 $65!!!同樣貨色,在「叔婆」要賣百多元一磅呢!


(P.S. 老細話呢期肥牛好旺場,今日都幾乎買唔到,要等到下晝四點貨到才有!大家有買趁早 ~)



師姐的平台花園種左好多棵日本蕃茄,好大棵好強壯!嗚!點解我種得咁差的


2007年12月29日 星期六

紙巾泛濫事件

免費紙巾泛濫,報攤又送、七仔又送、OK 都送


有時行過街邊又有廣告宣傳紙巾派


 


話說笨 B 爸爸每天必看明報,以前在報攤或便利店買,減 $1 不送紙巾,相安無事


家陣冇得減價,就個個搭包紙巾代替


每星期 7 份報紙 + 1 份雜誌,共收 8 包紙巾


一個月即是有三十多包


攪到我成屋都係,下圖只是部分 (有部分拿了給陳師傅!)


後面o個兩打自己買的紙巾,擺到就快生草都未用過



我已經開始「揀擇」,質素唔好的,寧願唔要,免得攞完又唔用咁浪費


一包包「散收收」,我搵個蛋卷盒入起佢,幾整齊!



哈哈 ~ 個蛋卷盒係經過加工的 ~ 用罐頭刀把上蓋除去,就成為一個硬淨好用的無蓋儲物盒啦!


我用電動開罐刀,開出來的罐頭邊緣完全唔刮手的。唔知道用手動開罐刀開完會否刮手呢?若然刮手,就唔好咁整啦 ~


2007年12月27日 星期四

娃娃菜鮮肉卷

哇哈哈 ... 我呢期真係好離題


當個個 blog 友都在寫聖誕大餐時 ... 我o既主題依然係「簡易菜式」


HOHOHO ... 唔緊要喇!


查實呢個菜式簡易得來,都幾出得下大場面


若然唔係做冬出街食,我或許會擺佢上枱


今次冇跟食譜,純粹亂來,但效果好 good 呢!




材料之一:豬肉


冇錯,你見到o既係一舊豬展


原本買來煲湯,但後來因為雪櫃有一隻竹絲雞要消滅


所以就將佢拿來攪攪震啦


呢度有半斤多o的



材料之二:娃娃菜


娃娃菜係存倉精選,襟擺程度同紹菜有得揮架!


呢期可能當造,我覺得味道好鮮甜呢


我將每棵最外邊的 4 塊葉撕下來用,而中間個芯呢?可以縱切一開四煮米線用,先用蒜蓉炒香然後才加水做埋湯底,好正架!



Step 1:用攪肉機攪碎豬肉,用糖、鹽、豉油、雞粉、生粉醃好備用


呢個攪肉機係笨 B 爸爸買的,好似才 $298,但我覺得相當好用



Step 2:半個洋蔥切粒,拌入豬肉內


推介紫色大洋蔥,味道更香更鮮甜



Step 3:煲滾一鍋水,加少許油鹽,放入娃娃菜葉烚至軟身 


我覺得用鉗子幫手好便利呀!(可能因為我的筷子功太差 !) 



Step 4:在每一片娃娃菜葉上,放上一湯匙份量的絞肉,捲好,排在碟子上



Step 5:用大火蒸 10 分鐘


Step 6:想好味o的又體面o的,可以做個獻汁 --- 用 2 粒大瑤柱浸軟搣絲,加入用剩的絞肉和蒸出來的汁 (有需要可再加水),加蠔油和糖煮滾,最後用馬蹄粉埋獻再均勻倒在鮮肉卷上即成。


 


後記:唔用娃娃菜的話,可以用紹菜或生菜代替



 


兩個人的簡單晚餐,一個餸、一個湯,有菜有肉,我覺得 ok 架啦 ~ (梗係喇,我係負責煮o個個丫嘛 )


Linkwithin

你可能對以下文章有興趣: