2006年9月17日 星期日

【惹味版】鯇魚腩粥 by 笨 B 爸爸 (附食譜)

想當年o岩o岩識笨 B 爸爸時 (未拍拖),都已經覺得佢同陳師傅幾似 - in terms of 性格、思想同埋喜好 ... 我成日覺得,笨 B 爸爸係上天賜畀我o既一份禮物,佢會代替我自己爸爸,照顧我、呵護我、鍚晒我 ~  (抱歉,有少少肉麻 ~ 其實識我o既人都知我細個時勁怕醜 + 矜持 + 內歛架  不過近年開竅左,覺得凡事唔好收收埋埋,人地鬼知你諗乜咩!我而家學識左將心裏面o既野講埋出來,尤其是對他人o既 appreciation,我絕對唔會慳架!)

講返正題,佢地其中一樣相似o既地方,就係好有煮野食o既天份,尤其鍾意o係出面食過一樣好味o既野之後,就返屋企研究自己整,仲要整得似模似樣 ~ 今次o既作品,係我地o係油麻地某粥店*食過的魚腩粥 ~

* 話說o個間粥店好唔起眼,裝修又老土,但係真材實料,好好味架!等我搵次特登去食下,然後影埋相向大家推介一下先 ~

惹味版鯇魚腩粥 (二人份量)

【難度】

【銀兩】~ $10

【準備時間】2 小時 (可以在醃魚途中開始煲粥,咁就 total 用 2 小時就攪掂啦)

【烹調時間】1 小時

材料:

白粥

鯇魚腩半個 (街市賣約 $10)

葱 1 束

醃料:

鹽  1 茶匙

糖  1 茶匙

豉油  2 湯匙

油  適量

米酒  少許

做法:

00:00 清洗魚腩,切厚片 (太薄的話煲粥時易爛),用醃料醃 2 小時。葱切段備用。

01:00  開始煲白粥  (以我煲開的一小時版本為準)

01:30 在平底鍋加少許油,放入魚腩片煎香。煎到兩面都有少許金黃色即可。

01:45 將煎好的魚腩片和葱段加入白粥裏,再煲 15 分鐘

02:00 攪掂!食得!

 

 


 

8 則留言:

  1. 原來除左大家姓陳外............今晚我都係食粥 想試你呢個,煎香既魚腩睇落好靚 我想問你,你粥上面係唔係加了 味粉 呢?一點點果d,係唔係胡椒粉?

    回覆刪除
  2. 魚腩粥郎爸都好鐘意,不過因為我地麻麻地鐘意食粥,所以好少特登整,想食就會出去食....呢個賣相唔錯喎

    回覆刪除
  3. 面果d 係唔係胡椒碎呀, 佢咁鐘意加少少既 我男友又係好似我老豆, 除左大家係公務員之外, 死慳死抵既性格似到十足十! 好似係佢生出黎咁.

    回覆刪除
  4. 你就好!我男朋友唔識煮,好似話只係識煮公仔麵

    回覆刪除
  5. 點解阿鵬一成都學唔到佢大哥識煮嘢架 你真係食神托世呀 有口福 唔得!第日你搬咗去錦田, 我同阿Blue&Blue爸要成日嚟痴餐架! 加多三雙快呀

    回覆刪除
  6. 大少奶: 我地真係夾架o者 ~ 要同妳做好朋友先 ~ 老 B 講o岩左,上面o個o的係 grinded mixed pepper 來的 郎媽: 食粥好呀,有益健康又唔肥,你地都多o的煲o黎食啦 ~ 老 B: you know me! 我係乜都磨一餐架 (因為我覺得磨胡椒粒好好玩 --> 哈哈,真無聊 ... ) 恭喜你都有個慳家好男友 + 未來老公仔! 小熊子: 咁你快o的特訓下佢啦!如果唔係,餐餐都要食街飯,好慘架 小 Blue 媽: 犀利哩!似乎大家都唔知大伯公煮得兩味喎 (佢聲稱細個時成日o係屋企煮飯,莫非o個時煮得好難食?) 好呀好呀,你地多o的入來黐餐啦!多o的人可以整多兩味,打邊爐/ BB 蕉更加開心!

    回覆刪除
  7. 大少奶: 我愛用的 Peppercorns ~ 因為用量少,費時用百幾蚊買個木製胡椒磨啦 ~ 呢隻個瓶口連埋磨,好方便!(惠康/ 百佳 superstore 都有)

    回覆刪除
  8. 頭先睇 減肥第一步 --- 戒蠔油! , 果碗惹味魚腩粥, 睇到我即刻想食呀 !!!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: