終於有新作！Apple Carrot Muffin (附食譜)

實在好耐冇焗野啦！今次咁神心，皆因公司足球隊要參加比賽，為左慰勞一下各隊員，我決定重出江湖 ~ (整緊o個陣，實在好擔心會失敗！因為事先張揚左，如果交唔到貨，好樣衰架嘛 )

呢款口味o既 muffin，都係第一次整架咋 (實在好有冒險精神 ... ) 皆因我想整o的健康o的又特別o的o既口味，所以o係云云 muffin 食譜之中，就揀左呢款 Apple Carrot Muffin o黎整啦！有幾健康？材料之中主要成份都係新鮮o既甘荀同埋蘋果，再加埋提子乾，提供左好多食物纖維同埋天然甜味，所以糖份都係落好少啫！最重要係，竟然油份都好少！只係三湯匙植物油，已經可以整到 16 個 muffin 出來 ！若果係其他口味o既 muffin 食譜，同樣份量的話，隨時係落 200 克牛油架！3湯匙 vs 200 克 喎，大家識計喇！  

【難度】

【銀兩】視乎你屋企有幾多現成材料可以用喇 ... 如果重頭買過晒，我諗 $80 喇 (因為要買冧酒、玉桂粉之類，呢o的貴o的)

【準備時間】1 小時

【烹調時間】45 分鐘 (我個焗爐細，要分開 3 次 x 15 分鐘)

【上圖】材料一覽 ... 冇出鏡o既包括油、冧酒同埋食用梳打粉

【上圖】因為要用隻淡味o的o既油來整 (花生油太「香」) 我特登去惠康買油，畀我發現左支新野 - 橄欖葵花籽油，好似幾健康咁！

【上圖】準備過程中最痛苦係刨甘荀同埋蘋果，刨到手都軟埋！甘荀用幼刨，蘋果用粗刨

【上圖】將所有材料撈埋一齊，呢下最易，唔使好似整蛋糕咁要甚麼技巧

【上圖】裝落 muffin 模時，七至八分滿已經 ok，漲起後就o岩o岩好！

【上圖】呢個食譜總共整左 16 個 muffin，用個籃仔堆起，好有成功感哩

甘荀  300 克

紅蘋果  1 個

自發粉  2 杯

梳打粉  1 茶匙

玉桂粉  2 茶匙

糖  1/2 杯

云呢拿香油  1 茶匙

中蛋 3 個 

沙拉油  3 湯匙 (其他淡味植物油均可)

提子乾  1/2 杯

冧酒  適量

 

做法：

 

(1) 用熱水稍為沖洗提子乾，然後加入適量冧酒浸透備用 à 此舉可以令提子乾香o的同埋冇咁乾架！

(2) 刨甘荀絲 & 蘋果絲備用 à 要有耐性 … 刨完之後包你手瓜起展！

(3) 將粉類 (自發粉、梳打粉、玉桂粉) 過篩備用

(4) 將所有材料混合後，最後加入隔好水o既提子乾

(5) 用匙羮將麵糊舀入 muffin 模內至七至八成滿

(6) 放入預熱 180 度o既焗爐內焗約 15 分鐘，攪掂！