2006年8月6日 星期日

【元朗】大榮華酒樓

【好味街飯推介:元朗大榮華酒樓】

地址:元朗安寧路 2-6 號 2 樓 (西鐵朗屏站)

電話:2476-9888 (但飲茶係冇得訂位o既)

大榮華咁出名,我相信好多人都慕名幫襯過。不過我就係最近一年先開始幫襯,因為以前仲係香港原居民時,真係好日都唔會入元朗 ...

大榮華最近裝修了,不過好似分別唔大 ... 我見到係o的牆身同柱多左o的畫咁o羅 ~ 枱呀、櫈呀、杯呀、碟呀 ... 全部都冇變!當然o的野食都冇變喇 ... 一樣咁好味!好有傳統茶樓真材實料的好滋味!

大榮華係一間歷史非常悠久o既茶樓,到今時今日,仲保留左好多舊式茶樓o既風味:

(1) 冇得訂位、冇得劃位,要飲茶唔該自己搵位 --> 但由於生意極好的關係,每次去到時都見到非常多人,好難先佔據到一張枱來「企」,多數要企 30 ~ 45 分鐘先有位 ... 我都幾唔慣要咁樣企o係度望住人地食野

(2) 沿用點心車將新鮮出爐o既點心推勻全場,食客一邊食野,一邊要"目及" 實有乜正野行過

(3) o的杯杯碟碟多數都係崩左o既 ...

(4) o的點心依然好有舊式風味,例如燒賣一定有肥豬肉o係裏面!

(5) 埋單要自己攞住點心紙去櫃位埋 ... 我成日諗,個場咁旺,就算有人唔畀錢就咁走左去,都未必發覺得到 ...

雖然好難得地有間茶樓仍然保持各種傳統風味,但我覺得不妨考慮下增設劃位制度,咁可以令食緊o既人食得暢快o的,等食o既人又等得舒服o的咁啦

【上圖】大榮華酒樓外貌 ... 裝修完好似冇唔同過,唔知係咪同幾廿年前一樣架呢?

【上圖】依然保留傳統風味的點心車,載著好味點心周圍走

【上圖】我最鍾意食o既千層馬拉糕,絕頂鬆軟o既鬆糕夾住酥香o既奶黃,出面任何酒樓都整唔到咁好味!

【上圖】今日緣慳一面o既豬腳薑 ... 好香好入味架!

【上圖】胡椒豬肚湯o既豬肚如果可以多少少就好勒!


【上圖】今日試左茶果 (上)、流沙麻蓉飽 (下左) 同南瓜餅 (下右),全部都好有風味!茶果層皮好 Q,裏面包肉餡的;流沙麻蓉飽o的麻蓉好甘香,不過可能蒸得未夠耐,冇流到出來

 南瓜餅都好煙靱,味道同口感有o的似年糕!



4 則留言:

  1. hi, 我做咗元朗友八年啦,見到 topic 咪講兩句囉 ,唔好見怪 。唔只飲茶冇訂位,晚飯訂菜都要 deposit,係咪好勁呢.....

    回覆刪除
  2. 下...竟然如此...?做飲食做得咁招積,韜韜真係無得頂!

    回覆刪除
  3. 笨B媽媽 係呀!係呀! 我都係最鍾意食佢嘅馬拉糕架! 真係鬆軟兼香滑得不得了! 平日我係絕對唔食馬拉糕的人 但經人介紹後一吃便停不了 次次去都一定堂食兼打包! 好正呀!

    回覆刪除
  4. 笨B媽媽 忘記了告訴你 佢仲有個海帶水晶包 唔知你食過未? 又係好正架 正過奶黃水晶包好多架! 不過唔知早茶有無供應 我次次都係去食晚飯架 以前有淨海帶叫 但後來改了一定要叫鴛鴦 逼人食埋D奶黃呀! 真討厭!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: