2006年8月20日 星期日

露荀蝦卷 - 備料中

【難度】未知,整完話你知

【銀兩】露荀 $15 一盒,蝦滑 $21 半磅

【準備時間】由於唔駛打蝦膠,斷估應該好快

【烹調時間】條露荀咁幼,應該好快攪掂!煮完再話你知

早前睇左大少奶整o既露荀蝦卷咁靚,攪到我都心思思想試下 ~ 上次走去街市買唔到露荀,今日"的"起心肝行去惠康 superstore 買,點知之後再去街市買蝦滑時,竟然畀我見到有露荀 ... 激死 (街市實平好多架嘛)!

至於蝦滑係乜東東呢?咪就係蝦膠囉 ~ 本來呢,本住私房菜 DIY o既偉大精神,應該係自己打埋蝦膠o既!但我知道呢檔o既蝦滑勁新鮮彈牙,質素仲好過自己買蝦返屋企打 (因為有時我地整釀豆腐時都會自己打下蝦膠,但因為技術問題同調味問題,硬係冇整得咁好味)!順手推介一下,冬天買來打邊壚,冇得頂呀!

【上圖】笨 B 爸爸媽媽誠意推介深水埗北河街街市地下 F28 檔,除左有鯇魚、鯪魚等淡水魚外,仲有自家製鯪魚滑、蝦滑同埋墨魚滑,逢親打邊爐季節,晚晚六點幾,o的脆鯇同埋蝦滑都被搶購一空!

【上圖】個凍櫃裏面有四格 (左上) 調味鯪魚肉 (右上) 淨鯪魚肉 (左下) 蝦滑 (右下) 墨魚滑

【上圖】我地今日買左半磅蝦滑 $21

【上圖】打邊爐時至愛之一 - 墨魚滑,好香鮮

7 則留言:

  1. 蝦滑唔係度度都有得買呢,自己打又麻煩...

    回覆刪除
  2. 郎媽:我都係超懶o既人,不過笨 B 爸爸係會自己打架喎!佢會買斤游水蝦雪凍幾個鐘 (易剝殼),起肉切碎,加蛋白再用筷子勁打,打到起膠 ... 我就冇佢咁好氣

    回覆刪除
  3. 聽講話蝦膠係唔係切碎,剝殼去腸後原隻拍爛再攪,咁就起膠啦

    回覆刪除
  4. v 姨:你咁講落又好似係喎 ~ 呵呵呵,係拍扁隻蝦再打,唔係切粒呀 ...

    回覆刪除
  5. 漏咗講,個墨魚滑好鬼正

    回覆刪除
  6. v 姨,呢檔個墨魚滑同蝦滑係冇得架!我地冬天時打邊爐,想打完o的湯可以飲得,就唔買任何肥淋淋o既紅肉同埋人工製品 (e.g. x丸x丸) 淨係買o的全天然o既野,包括菜、脆鯇、嘉美雞、蝦滑、墨魚滑同埋豆腐等 ... 之後o個啖湯鮮甜好味到呢 ... 真係飲到一滴不留,仲唔會肥添! 遲下再整時真係要影相同大家分享下

    回覆刪除
  7. 真係想引死人咩,講下都流緊口水.......

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: