2006年8月10日 星期四

二人冬蔭功

【主題】二人冬蔭功 (附食譜)

【難度】

【銀兩】約30大洋

【準備時間】30分鐘

【烹調時間】10分鐘

朋友們見過我幾個劣作蛋糕,食過我幾塊簡單曲奇,就認定我係烹飪高手。每次聽到佢地o既讚賞,都令我汗顏不已。

原因一:其實我做過o既菜式,比起很多網友來說,實在一般得不能再一般、BB 得不再BB

原因二:由於家父廚藝甚佳又相當嘴尖,我舊時係阿爸護蔭之下幾乎冇乜機會下廚,除了佢棋癮大起之時。難得有機會煮,都只係炒下飯、烚下菜呢o的出不得廳堂的東西。o係我o既定義中,美女廚房冠軍至少必須蒸得好一條魚 (明顯上,我仍然o係過生與過熟之間掙扎中)

原因三:我非常幸運地遇到同我麻辣級o既笨 B 爸爸,易更加幸運地,呢個係鍾意下廚兼煮得一手好菜o既「好男人」--> 莫非我「食神」托世?!生命中o既兩個男人都咁煮得 ...

 

我雖然廚藝不精,不過我都好鐘意想像一道菜係點整出來架。呢樣都係笨 B 爸爸o既喜好,所以我地經常談論各種食材和煮法。不過由於懶、由於冇時間、由於冇耐性、由於唔識、由於怕麻煩等下刪一百項的理由,我大部分時間都只是得個講字...

 

呢個冬蔭功,就是麻辣級o既笨 B 媽媽同爸爸最愛之一。今次自己做,明顯是因為屋企附近間惠康有預先包裝好的冬蔭功香料+小包裝的草菇+小包裝的鮮蝦,完全附合二人煮飯仔的份量要求!

 

材料(2人份)

冬蔭功香料包 (內含黃薑、香茅、指天椒、檸檬葉、青檸、辣醬包) 1

草菇1 小盒(如果o係街市買,恐怕至少要買四両卦)

鮮蝦1 小盒(o係街市要買四両會不會給人「兇」?)

鯇魚片1 小盒(可以唔加,我只係順手...)

蕃茄醬4 湯匙(我煲下煲下諗到o既...加左好好味!)

泰國魚露1 湯匙

 

做法:

(1) 將香料包內的材料洗好,黃薑切片、香茅切細條、指天椒切粒備用。

(2) 剝去鮮蝦中段的瞉,留下蝦頭和蝦尾不剝。挑去蝦腸,切雙飛。<-- 如果懶過我,可以將整隻蝦原原本本的用... 絕對沒有問題!哈哈

(3) 燒滾兩大碗水,除左青檸之外,將其他香料包材料丟進去煮三分鐘。

(4) 加入蕃茄醬拌勻

(5) 將草菇、蝦及鯇魚片加入,煮至再沸起

(6) 熄火,擠入青檸汁及加魚露調味,攪掂!

 

8 則留言:

  1. 我會學下整先 其實我都食辣,我都鍾意食泰菜0架!

    回覆刪除
  2. 嘩~~等我又跟你個食譜整下先~好方便 ~隻蝦...好吸引 ~ 我好明白你的心情...因為我家將軍大人廚藝超讚...而且味雷比美國軍事用地雷還要利害 ...所以小時候想要入廚房做菜也真的難得很...往往就是下午的時候將軍大人不在家就拿自己做白老鼠試試做做這個菜那個菜的~哈哈~

    回覆刪除
  3. 紫羽嫣:以前唔知o的材料o係邊度買時,就覺得好煩好難咁,但而家o的超市乜都有細細包,甚至包好晒二人/ 家庭份量咁,實在好方便! 係啦,我阿爸同我男友 (笨 B 爸爸) 都咁鬼煮得,攪到我都唔知整乜好!不過正如我所講,正常時候佢地都會煮埋俾我食,仲正喇 ~ 呵呵呵呵呵

    回覆刪除
  4. 正正正正正 我同v叔都好鍾意食辣辣泰菜,等我都試下先

    回覆刪除
  5. 睇張已經好正啦! 唔知味道 O 唔OK呢

    回覆刪除
  6. 哇 ~~ 看到這味 流口水了 我最喜歡的 tomyam kung 阿

    回覆刪除
  7. 有個低b問題: 蕃茄醬係咪=茄汁 ?

    回覆刪除
  8. 原來惠康有冬蔭湯包, 真係第一次知... (可能我極少望湯包...)
    我通常用家樂牌既冬蔭湯粒 (泰版), 煮下麵咁, 好味!!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: