2006年8月18日 星期五

美食博覽 2006 - 下集

尋日部相機唔夠電,好多新奇o既野都影唔到,今日補返數 ~ 

 好多相,慢慢欣賞 ~

【上圖】呢部係雪糕機 ($2,488),佢整緊雪糕呀!好似攪拌機咁攪下攪下 ~ 隔離o個個華夫筒,係用下面部機整出來的 (唔記得睇幾多錢)

 

【上圖】塊華夫餅 (waffle) 煎好了,用個 cone 模卷緊

【上圖】嘩!朱古力噴泉呀 ... (綠色外殼 $498,上面o個部銀色外殼 $698)

【上圖】好 pro o既 kitchen mixer!成三四千銀一部

【上圖】佢地整出o黎 display o的麵飽好靚!

【上圖】又係 kitchen mixer

【上圖】之前提過o既二人用小電器,樣樣都好迷你

【上圖】迷你電飯煲,淨係可以煮兩個人o既飯 (Food Expo 價$398) <-- 阿姐話出面要賣六百幾喎

【上圖】迷你電飯煲示範用法 - 炆豬手同埋甘荀菜飯!

【上圖】迷你電煎板,只係 $298

【上圖】好迷你o既電火鍋,買滿 $600 加 $10 就可以換

【上圖】勁 cute o既電熱水壼,仲細過酒店o個o的!我估淨係可以煲一杯水自酙自飲!($198)

【上圖】順手影埋,o個檔都有其他煎板、搾汁機呀等等廚房小電器賣架

【上圖】另一檔係賣生鐵鑊、竹鉆板同埋紫砂煲o既,位置近入口。檔主話呢隻生鐵鑊係用日本低溫鐵製造,唔會黐底、又唔會好似易潔鑊咁甩左o的有害塗層出來云云

【上圖】個竹鉆板個樣幾靚!仲好似話唔會好似木鉆板咁積聚污垢

【上圖】另一邊賣紫砂鍋,佢話呢o的鍋可以釋放遠紅外線 (有乜用呢 ... 唔記得左 ...

)

【上圖】整煲仔飯又得 ~ o的紫砂內層可以勁「省」的,唔怕甩野喎

【上圖】佢煲雞湯好似好正


 

9 則留言:

  1. To:笨B媽媽 我想請教你一啲野,果皮大概幾錢???(?_?)

    回覆刪除
  2. 嘩! 你唔係做野睇場架咩? 影咁多相又流口水...好吸引喎!

    回覆刪除
  3. 姿姿:呢個我都唔識答喎 因為我好少用,通常都拿o係我阿爸屋企又食又拎架 (佢自己曬!) 不過我知道果皮o既價錢視乎佢有幾「陳」(即是儲存左幾耐) 陳皮就梗係愈陳愈貴喇 我諗由每兩幾蚊到幾十蚊不等!等我今晚又八下我阿爸先! 皮 2:我公司有擺 booth 呀,不過我唔駛看檔,我只係落去參觀參觀,順手八盡全場咁啦

    回覆刪除
  4. 嘩, 美食博覽好呃人呀.... d野賣得好貴.... 同出面都無分別

    回覆刪除
  5. 惠而浦:你去左嗱?我覺得佢地唔係賣得貴,不過平時出面o既特價太過頻繁,所以咪覺得 Food Expo 賣得咪唔夠抵囉!所以我就算買,都淨係會買超市買唔到o既特別野架o乍!

    回覆刪除
  6. 姿姿:有關陳皮o既問題,我已經請教左我阿爸勒!佢話陳皮愈「新鮮」就愈燥熱,所以買o既時候,要選三年以上、已經變得好深色o既陳皮o黎買。當然,仲要用鼻聞下,聞到有陣好香o既陳皮味至係好野 (如果太「新鮮」,會有一陣青澀o既橘子味,都好香o既;但夠「陳」o既陳皮就會冇左o個陣青澀味,而變成一陣好沉厚濃郁o既甘甜味) 佢話大約 $20-25/ 一兩喎。不過屋企o的陳皮係自己曬的,每年冬天,阿爸都會儲一堆柑皮來曬乾,跟住放入樽內儲存。佢話儲存過程中,間唔中都要攞出o黎曬下,以防生蟲架。 以下呢幅相左邊o既陳皮,係上年冬天整的,而右邊o個o的就擺左三年以上,可以好清楚睇到顏色上o既分別架啦。我o係現場用鼻聞下,都真係有以上講解o既味道分別架喎!

    回覆刪除
  7. 我都又去呀,不過迫人到睇唔到野咩呀!

    回覆刪除
  8. 我都又去呀太多人啦! 迫都睇唔到野咩!

    回覆刪除
  9. 姿姿, 陳年果皮可以好貴架,一般我地煲湯食得過大概二十蚊左右啦! 不過我老豆每年都會曬兩至三盒留番過幾年用!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: