2006年8月6日 星期日

幾乎買得成的村屋 (2)

【回憶 - 2005年7月 - 2006年4月】

呢間係我地第二間幾乎買得成的村屋,亦係我地用盡任何方法,都買唔成的村屋 ...

第一次睇呢間村屋,都算係無心插柳。因為當時已經睇左好多村屋盤,都冇乜邊間o岩我地心水,諗住都係算勒。但畀我地遇著一個非常有熱誠的年青經紀*,佢非常不厭其煩咁車我地四處兜,希望幫我地搵到一個心水盤。

* 呢位年青經紀,大大話話招呼左我地 二、三十 (唔係樓盤的數量,而係見面的次數!) 當中應該有 10 次係睇呢個盤) ...  卒之招呼左我地成年 ~ 不過最後都變埋 friend!

最初睇時,呢度仲係得一個非常地盤 feel 的「石屎"朗"」,幾乎完全睇唔出佢乜野樣。但我地幾乎一見傾心,因為一來佢位置方便,兼且屋外景觀都幾開揚;二來業主就係住o係隔離屋,呢間村屋係屋苑裏六棟之中其中一棟,對於我這初次住村屋的人來說,感覺比較安全。最重要的,係呢間屋的方位同我地相當之夾!

因為最初仲係好地盤 feel 的關係,所以業主都未諗定個價。如是者,我地o係半年之內一共去左八次,親眼目睹佢由一間石屎醜怪屋變成粉紅色靚屋的過程。最攪笑係,連業主o個兩隻大狗,由第一次吠到我地傻,到最後爬上我地度 lam lam lam!

可能我地表現得太喜愛呢間屋,又可能係業主太有米,比較視錢財如糞土,所以佢係 ... 唔肯賣!

正式o黎講,係佢唔肯分層o黎賣。明顯地,我地又冇錢買晒成棟。所以,淨係分唔分層賣呢個 point,亦已拉鋸了數月之久。最後佢肯考慮,但出價係完全超出我地能力範圍之外 - 個數字,係比市價高 20%、比銀行估價低 10%、兼且一個崩都唔可以減 ...

我地以為,愚公既可以移山、鐵柱亦可以磨成針,我地應該都可以靠誠意感動下呀業主啦!所以我地就密密 visit,甚至新年係抱左個大果籃去拜年!我諗睇樓睇成咁,都算經典啦卦 ...

很、很、很、很 (下刪一百個很) 可惜地,業主都係鐵石心腸,決定要金唔要心!... 既然我地可以做o既都做晒,買左成年六合彩又冇中過,咁唯有放棄呢間 dream house 喇 ...

今云都真係非常地失望架!所以,間唔中再經過時,我都仲係忍唔住成日偷望架 ...

 

 


 

4 則留言:

  1. 屋尼樣野, 可遇不可求 或者... 當妳住落左妳地現在那一間, 妳會比這一間更愛上它...

    回覆刪除
  2. 斯洛:我今日睇番o的舊 post 緬懷一番時,先發現你呢段留言 (之前 miss 左覆,唔好意思) 你果然有「神算」天份 而家回望番,好在我地買唔到粉紅色屋 ... (所謂強扭的瓜不甜 ... 如果果時夾硬要用o個個價買,我地應該會欠下朋友一筆債 for 首期、冇錢結婚、冇錢渡蜜月、冇錢買傢俬 .. ) 所以,凡事都係量力而為好 --- 最後買左而家呢間屋,我地銀根可以鬆動少少,唔駛連首期都要借;最重要o既係,我地因為買左而家呢間屋,所以有機會參與整個建屋過程 ~ 對於熱愛家庭生活o既我 & 笨 B 爸爸,真係一份莫大o既喜悅 & 成功感啊!呢個 Project,將會係我倆一個美好回憶 ~

    回覆刪除
  3. from 小雲 20070411 K 先生唔得閒 , 佢找了另一位 T 先生帶我們睇樓 , 剛巧好似係睇妳睇中的第 2 間粉紅屋 , 想確認一下 . 請問妳間屋嘅位置係咪元崗村呢 ? 同埋當時要幾錢呢 ? 我都幾鍾意 lee 間屋所以有 d 問題想請教 : 1. 佢唔係裡面覆式 , 咁妳原本諗住點打通兩層 ? 2. 側邊有一大片低左落去嘅雜草 , 係咩來 ? 會唔會引好多蚊來呢 ? 3. 據妳所講 , 間屋嘅方位同妳地好夾 , 咁有冇 d 簡易嘅方法讓我知道同間屋夾唔夾呢 ? 真係唔該曬妳呀 !!

    回覆刪除
  4. 我 真係 喜愛呢間屋, can you let me know how much this would have cost if convenient?

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: