2006年7月31日 星期一

芝士焗龍蝦

【主題】芝士焗龍蝦 (附食譜)

【難度】

【銀兩】約 200 大洋

【準備時間】10 分鐘

【烹調時間】15 分鐘

我第一次整龍蝦,去左海鮮檔買了 2 隻游水的,叫檔主幫我開邊,因為呢下最難!返屋企後沖洗一下,用廚房紙印乾,在上面塗上牛油和蒜蓉,灑少少香草,再鋪幾塊芝士片入 200 度焗爐焗約 12 分鐘至轉金黃色就 ok 啦!至於o的意粉,用了天使麵,因為只要烚 2 分鐘已經熟,好方便!再開鑊用牛油和蒜片炒香,加露荀和天使麵兜勻已經 ok 了!


(1) 香草:我只是用家裏的乾燥香草,是普通在超級市場買的。必買兩款:Oregano 和 Basil,因為用途最廣泛,撈落乜度都冇死 

我整意粉、蕃茄湯、焗蒜蓉飽、焗龍蝦,甚至平日煎蛋都落架
(2) 我係用普通 18L 焗爐焗o既!由於用高溫 200 度焗,所以甚至用多士焗爐都 ok 架!要留意睇住o的芝士幾時燶就真
(3) 我問過個檔主,佢話如果做刺身就要放尿,如果攞去焗就唔駛都 ok。開邊係最難o既,你想像下要將隻生勾勾o既龍蝦由中間剁開兩邊 ... 唔俾佢咬親至奇
所以我叫左檔主幫我攪掂。返屋企自己再沖乾淨和拿走o的內臟就 ok 啦。

 

【上圖】每人有一孖開邊龍蝦,正到呢 ... 自己整就 $100/pax,出去食?double 再加一丫,多謝多謝

【元朗】山西刀削麵

【好味街飯推介:山西刀削麵】

地址:元朗大馬路 212 號華昌樓地下 D 舖

電話:2479-8033

第一次去,係因為睇左明報某一期介紹濕地公園時順手推介的元朗美食。傳媒力量真係勁,攪到我地o既第一次係食唔成o既 --- 因為門口條人龍好長好長!

第二次去,特登揀左個騎呢時間,卒之食到好味的麵!因為個廚房唔算好開放,所以冇得親眼目睹削麵神技,不過根據介紹,師傅削一碗麵約 50 條,一路削一路飛落鍋熱水度,要 1 分鐘內完成,否則第 1 條麵同第 50 條麵口感就會迴異。果然,我碗刀削麵上得好快,由 order 到上菜都唔知有冇三分鐘!

第三次去,係因為覺得真係幾正,食過返尋味。我依然係叫刀削麵,因為鍾意有o趙頭。笨 B 爸爸依然係叫拉麵,因為鍾意佢彈牙!今次兩碗都叫左大辣,爽!

【上圖】中辣的台式紅燒肉刀削麵  ($29) + 手撕雞 ($40) 。對麻辣級的笨 B 媽媽來說,太小兒科了


【上圖】近鏡再望 ... 條條麵都有棱有角,o趙落好 Q

幾乎買得成的村屋 (1)

【回憶‧2005年8月】

經過頭一個月的慘烈戰績以後,我幾乎拒絕再睇村屋盤!因為我以為村屋 = 爛屋,村屋 = 蚊竇,村屋 = 冇雷公!

以為搵大公司睇樓就實冇蝕底,點知,原來睇村屋係要搵「土炮」的!本住畀多一兩次機會笨 B 爸爸的想法,8月時我地開始跟「睇樓王」介紹的村屋經紀睇樓。一跟之下,發現村屋世界多麼美好 ~ 要幾新有幾新,要幾靚有幾靚!當然,我地o既銀兩有限,house 就暫時未輪得到,田原 feel 的漂亮小屋還可以的。

呢間就係我地幾乎買得成的靚靚村屋,不過,拉鋸了個幾月以後,卒之係因為唔到價 (嘻...我地唔到業主意向價) 所以買唔成。當時都好失望下,所以都 keep 左張相留念留念...

【上圖】黃色外牆襯白色窗框,幾咁可愛呀 ...

【上圖】就係呢個客廳 look,令城市人笨 B 媽媽開始愛上村屋 ...

【上圖】嘩 ... my dream rooftop ...

第一次睇村屋

【回憶‧2005年7月】

笨 B 爸爸一直都好想由城市人變成田野人,所以由 2005 年 7 月開始,已經好勤力咁拖住笨 B 媽媽四圍去睇村屋。

笨 B 媽媽一向係西環原居民,識左爸爸之後變左九龍人,但計落一直都係城市人,實在好唔明白點解要住到冇雷公咁遠 ...

第一次睇村屋唔知掟,跟左兩間「實力雄厚」o既 地產公司睇,點知佢帶住我地搭小巴,去左幾處真係幾冇雷公的村屋睇樓。望住o的樓o既外型已經想調頭走,不過咁遠o黎到,勉為其難都要入一入去。入到樓梯位,嘩 ... 應該有幾十隻蚊圍住我虎視眈眈,嚇到我不斷彈下彈下,以防佢地埋到身。當然,咁白痴o既方法係冇乜用o既,所以事後都滿腳蚊眼,痕到飛起。幾乎發誓以後唔再跟爸爸再睇村屋盤。

【上圖】我地不嬲都唔係浪漫o既人,所以冇儲起「第一次」去睇村屋時買的西鐵自悠通 (o個時仲叫做「節日通」添) 呢張係對上o個次入元朗時買的,封套已經不同了 ~

 

 

 

 

Linkwithin

你可能對以下文章有興趣: